.jpg)
ការវិនិយោគផ្ទាល់នៅក្រៅប្រទេសរបស់ ចិន ក្នុងវិស័យមិនមែនហិរញ្ញវត្ថុក្នុងរយៈពេល ១១ ខែដំបូងក្នុងឆ្នាំនេះ នៅតែមានកម្រិតថេរធៀបនឹងឆ្នាំមុន។ AFP
ក្រុងប៉េកាំងៈ ការវិនិយោគផ្ទាល់នៅក្រៅប្រទេស (ODI) ក្នុងវិស័យមិនមែនហិរញ្ញវត្ថុក្នុងរយៈពេល ១១ ខែដំបូងក្នុងឆ្នាំនេះ នៅតែមានកម្រិតថេរធៀបនឹងឆ្នាំមុន។ នេះបើយោងតាមទិន្នន័យពីក្រសួងពាណិជ្ជកម្មរបស់ប្រទេស ចិន កាលពីចុងសប្តាហ៍មុន។
សេចក្តីថ្លែងការណ៍មួយរបស់ក្រសួងពាណិជ្ជកម្មបានបង្ហាញថា វិនិយោគិនក្នុងស្រុកបានវិនិយោគទឹកប្រាក់ចំនួន ១០៤,៤៨ ពាន់លានដុល្លារ ODI ក្នុងវិស័យមិនមែនហិរញ្ញវត្ថុក្នុងសហគ្រាសនៅបរទេសចំនួន ៥ ២១៣ ក្នុងប្រទេស និងតំបន់ចំនួន ១៥៧ ចាប់ពីខែមករាដល់ខែវិច្ឆិកា ឆ្នាំ ២០១៨។
ODI ក្នុងប្រទេសស្ថិតនៅតាមបណ្តោយផ្លូវក្នុងគំនិតផ្តួចផ្តើមខ្សែក្រវាត់ និងផ្លូវ បានកើនឡើង ៤,៨ ភាគរយធៀបនឹងរយៈពេលដូចគ្នាកាលពីឆ្នាំមុនដល់ ១២,៩៦ ពាន់លានដុល្លារ។
រចនាសម្ព័ន្ធនៃការវិនិយោគនៅក្រៅប្រទេសបានបន្តមានភាពប្រសើរឡើង ដោយការវិនិយោគចម្បងធ្វើឡើងក្នុងវិស័យសេវាកម្មជួល និងអាជីវកម្ម វិស័យផលិតកម្ម រ៉ែ និងលក់រាយ និងលក់ដុំ។
សេចក្តីថ្លែងការណ៍ដដែលបានឲ្យដឹងថា មិនមានការរាយការណ៍ពីគម្រោងថ្មីៗនៅក្នុងវិស័យនានាដូចជា ការអភិវឌ្ឍអចលនទ្រព្យ កីឡា និងកម្សាន្តនោះទេ។
គិតត្រឹមចុងខែវិច្ឆិកា ប្រទេស ចិន បានបង្កើតតំបន់កិច្ចសហប្រតិបត្តិការសេដ្ឋកិច្ច និងពាណិជ្ជកម្មនៅបរទេសចំនួន ១១៣ ក្នុងប្រទេសចំនួន ៤៦ ដោយមានទឹកប្រាក់វិនិយោគសរុបចំនួន ៤២,១៤ ពាន់លានដុល្លារ ដែលទាក់ទាញក្រុមហ៊ុនបានជាង ៤ ៧០០ ក្រុមហ៊ុន។
ក្រសួងពាណិជ្ជកម្មចិនបានឲ្យដឹងទៀតថា ក្រុមហ៊ុននានាក្នុងតំបន់កិច្ចសហប្រតិបត្តិការទាំងនេះបានបង្កើតការងារបានជាង ៣០០ ០០០ កន្លែង និងផ្តល់ប្រាក់ចំណូលពន្ធបាន ចំនួន ៣,២៤ ពាន់លានដុល្លារសម្រាប់ប្រទេសជាម្ចាស់ផ្ទះ៕ People''s Daily/KC
