ក្រុងវ៉ាស៊ីនតោនៈ លោកប្រធានាធិបតី ដូណាល់ ត្រាំ នឹងចុះហត្ថលេខាលើកិច្ចព្រមព្រៀងពាណិជ្ជកម្មមួយជាមួយប្រទេសចិននៅថ្ងៃពុធ ដែលលោក ត្រាំ ដែលនឹងប្រកាសថា ជាជោគជ័យដ៏សំខាន់មួយ ប៉ុន្តែវាធ្វើឡើងដោយការចំណាយដ៏ច្រើន បន្ទាប់ពីការជាប់គាំងរយៈពេល ២ ឆ្នាំដ៏ជូរចត់រវាងប្រទេសមហាអំណាចសេដ្ឋកិច្ចឈានមុខគេទាំង ២ របស់ពិភពលោក។
លោក Edward Alden អ្នកជំនាញផ្នែកគោលនយោបាយពាណិជ្ជកម្មនៅក្រុមប្រឹក្សាទំនាក់ទំនងបរទេសបានថ្លែងថា៖ «បញ្ហាដ៏ពិបាករវាងអាមេរិក និងប្រទេស ចិន នៅតែមិនទាន់ត្រូវបានដោះស្រាយ»។
ប៉ុន្តែលោកបានទទួលស្គាល់ថា «ទាក់ទងនឹងនយោបាយ ការណ៍នេះដំណើរការល្អប្រសើរសម្រាប់លោក ត្រាំ» ខណៈលោកឈរឈ្មោះសម្រាប់ការបោះឆ្នោតជាថ្មីនៅឆ្នាំក្រោយ។
លោក Alden បានបន្តថា៖ «សេតវិមានអាចអួតថា ខ្លួន «មានភាពតឹងតែងលើប្រទេសចិន» និងថា «តាមបច្ចេកទេស លោកទទួលបានកិច្ចព្រមព្រៀងមួយ» ជាអ្វីដែលលោកបានសន្យាជាមួយក្រុមអ្នកបោះឆ្នោតកាលពីឆ្នាំ ២០១៦។
យ៉ាងហោចណាស់ការបញ្ឈប់សង្គ្រាមពាណិជ្ជកម្មបានធានាដល់ទីផ្សារដែលទទួលរងភាពចលាចលដោយសារការអាក់ខានជាប្រចាំកាលពីឆ្នាំ ២០១៨ និងឆ្នាំ ២០១៩ ក្នុងគ្រាដែលមានការគំរាមកំហែង ការគំរាមកំហែងតបត និងពន្ធនាំចូលក្នុងទឹកប្រាក់ដ៏ច្រើន។
ការបញ្ឈប់សង្គ្រាមពាណិជ្ជកម្មនៅពេលបច្ចុប្បន្នក៏អាចជួយលោក ត្រាំ ផងដែរសម្រាប់ដំណើរការយុទ្ធនាការតាមរយៈការផ្ដល់ដល់សេដ្ឋកិច្ចអាមេរិកនូវការជំរុញមួយ។
ជាការបន្ធូរបន្ថយដែលមិនច្បាស់លាស់មួយ អតិថិជននឹងមានហេតុផលកាន់តែធំក្នុងការចំណាយដោយមានទំនុកចិត្ត ហើយក្រុមហ៊ុនក៏អាចឆ្ពោះទៅមុខជាមួយនឹងការវិនិយោគដែលត្រូវបានផ្អាកដោយសារការបារម្ភអំពីការកើតមានជម្លោះនេះ។
លោក ត្រាំ បានប្រកាសថានឹងបង្ហាញកាន់តែធំនៅថ្ងៃមុនចូលឆ្នាំថ្មីថា លោកនឹងចុះហត្ថលេខាលើ «កិច្ចព្រមព្រៀងដំណាក់កាលទី ១» នៅថ្ងៃទី ១៥ ខែមករា នៅសេតវិមាន»។
ប៉ុន្តែវាមិនមែនដូច្នេះឡើយរហូតទាល់តែដល់ថ្ងៃព្រហស្បតិ៍ ក្រសួងពាណិជ្ជកម្មចិនបានបញ្ជាក់ពីដំណើរទស្សនកិច្ចរបស់លោកឧបនាយករដ្ឋមន្ដ្រី Liu He ដែលនឹងស្ថិតនៅទីក្រុងវ៉ាស៊ីនតោនចាប់ពីថ្ងៃចន្ទដល់ថ្ងៃពុធ ដែលជាកាលបរិច្ឆេទមួយដែលរំពឹងថានឹងមានការចុះហត្ថលេខាលើកិច្ចព្រមព្រៀងនេះ។
ប៉ុន្តែព័ត៌មានលម្អិតពីទំហំនៃកិច្ចព្រមព្រៀងនេះ នៅតែជាអាថិ៍កំបាំងនៅឡើយ។
លោក Larry Kudlow នាយកក្រុមប្រឹក្សាសេដ្ឋកិច្ចជាតិបានប្រាប់ក្រុមអ្នកយកព័ត៌មានកាលពីថ្ងៃសុក្រនៅសប្តាហ៍មុនថា៖ «ឯកសារទាំងមូលនឹងត្រូវចេញផ្សាយនៅថ្ងៃពុធ»៕ LA