ក្រុងណានឆាងៈ គម្រោងសរុបចំនួន ១០៤ គម្រោងត្រូវបានចុះហត្ថលេខាកាលពីថ្ងៃអាទិត្យក្នុងសន្និសីទពិភពលោកស្តីពីឧស្សាហកម្មនិម្មិតពិត (VR) ដែលកំពុងធ្វើឡើងដោយមានតម្លៃកិច្ចសន្យាចំនួន ៦៣,៣ ពាន់លានយន់ (ប្រហែល ៩,២ ពាន់លានដុល្លារ)។ នេះបើតាមអាជ្ញាធរមូលដ្ឋាន។
សន្និសីទដែលបង្ហាញបច្ចេកវិទ្យាចុងក្រោយបំផុត ផលិតផល និងអាជីវកម្មដែលពាក់ព័ន្ធនឹង VR និងការរុករកឧស្សាហកម្ម VR ដែលអាចបំពាក់បច្ចេកវិទ្យាអ៊ីនធឺណិត 5G បានបើកដំណើរការកាលពីថ្ងៃសៅរ៍ក្នុងទីក្រុងណានឆាងដែលជាទីក្រុងរបស់ខេត្តជាំងស៊ី ប្រទេសចិន។
គម្រោងទាំងនេះគ្របដណ្តប់លើវិស័យទូលំទូលាយជាច្រើនរួមជាមួយនឹងចង្វាក់ឧស្សាហកម្ម VR រួមទាំងការផលិតគ្រឿងផ្គុំ ការអភិវឌ្ឍសូហ្វវែរ និងកម្មវិធី VR។ នេះបើយោងតាមនាយកដ្ឋានឧស្សាហកម្ម និងបច្ចេកវិទ្យាព័ត៌មានរបស់ខេត្តជាំងស៊ី។
លោក Yang Wenbin អភិបាលរងទីក្រុងណានឆាងបានថ្លែងនៅក្នុងកម្មវិធីផ្គូផ្គងធុរកិច្ចក្នុងឧស្សាហកម្មនេះថា៖ «ទីក្រុងណានឆាងបានបង្កើតផែនការមួយសម្រាប់ការអភិវឌ្ឍឧស្សាហកម្ម VR ក្នុងគោលបំណងបង្កើតខ្លួនឯងទៅជាទីក្រុង VR លំដាប់ពិភពលោកនៅត្រឹមឆ្នាំ ២០២៣»។
សន្និសីទនៅឆ្នាំនេះបានទាក់ទាញអ្នកនៅក្នុងឧស្សាហកម្មនេះជាង ៧ ០០០ នាក់ និងអ្នកតាំងពិព័រណ៍ក្នុងប្រទេសចិន និងមកពីបរទេស ២១៥ នាក់មកតាំងបង្ហាញក្នុងពិព័រណ៍ VR នេះ៕ People''s Daily/KC