.jpg)
ផលិតផលអាហារ និងភេសជ្ជៈ ដែលដាក់តាំងលក់នៅក្នុងក្រុមហ៊ុនផលិតអាហារដ៏ធំរបស់កូរ៉េ CJ។ រូបថត សហការី
សេអ៊ូលៈ ក្រុមវិនិយោគិនរបស់កូរ៉េខាងត្បូងនឹងសម្លឹងលើការវិនិយោគកាន់តែខ្លាំងលើវិស័យកែច្នៃអាហារ និងកសិកម្មនៅកម្ពុជា ជាជាងឧស្សាហកម្មបច្ចេកវិទ្យា។ នេះបើតាមអគ្គលេខាធិការមជ្ឈមណ្ឌល អាស៊ាន-កូរ៉េ។
លោក Lee Hyuk អគ្គលេខាធិការមជ្ឈមណ្ឌល អាស៊ាន-កូរ៉េ (AKC) បានប្រាប់កាសែតភ្នំពេញប៉ុស្ដិ៍ នៅក្រៅជំនួបវេទិកាតភ្ជាប់អាស៊ានលើកទី ៦ នៅទីក្រុងសេអ៊ូល កាលពីសប្ដាហ៍មុនថា កម្ពុជាគឺជាប្រទេសតូចមួយក្នុងតំបន់ ដែលមិនអាចប្រកួតប្រជែងជាមួយប្រទេសផ្សេងទៀតដូចជា វៀតណាម និងថៃ បានទេ ផ្អែកលើមូលដ្ឋាននៃការវិនិយោគលើបច្ចេកវិទ្យា។
លោកថ្លែងថា៖«ប្រទេសរបស់អ្នកត្រូវការប្រកួតប្រជែងជាមួយបណ្ដាប្រទេសផ្សេងទៀត ដូចជា វៀតណាម និងថៃ ក្នុងការទាក់ទាញការវិនិយោគកាន់តែច្រើនពីបណ្ដាប្រទេសផ្សេងទៀតដូចជាកូរ៉េ»។
លោកថា៖ «ប៉ុន្តែខ្ញុំគិតថា ទាក់ទងនឹងការវិនិយោគលើការ កែច្នៃអាហារ ការធ្វើកសិកម្ម និងការវិនិយោគលើ ការសាងសង់ហេដ្ឋារចនាសម្ព័ន្ធ គឺល្អសម្រាប់ប្រទេស កម្ពុជា»។
លោក Lee ឲ្យដឹងថា ក្រុមហ៊ុនរបស់ប្រទេស កូរ៉េ ជាច្រើនបានចាត់ទុកប្រទេស កម្ពុជា ជាទិសដៅវិនិយោគប្រកបដោយសក្ដានុពល។ លោកថ្លែងថា៖ «ដូច្នេះអ្នកដឹងហើយ នៅក្នុងប្រទេស កម្ពុជា អ្នកមានក្រុមហ៊ុនរបស់ប្រទេស កូរ៉េ ដូចជា ក្រុមហ៊ុន Hyundai ដែលកំពុងវិនិយោគលើកសិដ្ឋានដាំស្វាយ»។
លោកបន្តថា៖ «ខ្ញុំគិតថា កម្ពុជាគឺជាប្រទេសតូចមួយ ខណៈវៀតណាមទាក់ទាញកាន់តែច្រើន ដូចជា ក្រុមហ៊ុនអេឡិចត្រូនិក សាំសុង ដើម្បីបង្កើតក្រុមហ៊ុនទូរស័ព្ទស្មាតហ្វូនមួយ»។
ក្រុមហ៊ុន Hyundai Group របស់កូរ៉េបានវិនិយោគ ១០ លានដុល្លារលើរោងចក្រកែច្នៃផ្លែឈើស្រស់ លើផ្ទៃដី ៣ ហិកតា នៅក្នុងស្រុកភ្នំស្រួច ខេត្តកំពង់ស្ពឺ ដែលនឹងចាប់ផ្ដើមប្រតិបត្តិការនៅខែធ្នូនេះ។ក្រុមហ៊ុន សង្ឃឹមថា នឹងកែច្នៃផ្លែឈើប្រចាំឆ្នាំបាន ៥០,០០០ តោន ដែលរួមមានផ្លែដូង ផ្លែទុរេន ស្វាយ និងផ្លែមង្ឃុត។
ក្រុមហ៊ុន Hyundai Group មានសាខា ៤៤ ទូទាំងពិភពលោក និងជាបណ្ដាញដ៏រឹងមាំមួយសម្រាប់ការនាំចេញផលិតផលអាហាររបស់កម្ពុជា។
លោក Lee Hyuk បានឲ្យដឹងថា កម្ពុជាចាំបាច់ត្រូវមានយុទ្ធសាស្ដ្រត្រឹមត្រូវមួយ ដើម្បីទាក់ទាញក្រុមវិនិយោគិនកូរ៉េគ្រប់វិស័យ។ លោកថ្លែងថា៖ «ការទាក់ទាញការវិនិយោគ អ្នកត្រូវតែបន្ថែមភាពជាដៃគូកាន់តែច្រើន ជាមួយក្រុមហ៊ុនកូរ៉េ លើការវិនិយោគ និងពាណិជ្ជកម្ម»។
លោកបន្តថា៖ «ប្រសិនបើអ្នកបង្កើតទីផ្សារកែច្នៃអាហារប្រកបដោយគុណភាពល្អដ៏ធំមួយដោយសហការជាមួយក្រុមហ៊ុនកូរ៉េ អ្នកអាចនាំចេញផលិតផលទៅអតិថិជនរបស់ប្រទេស កូរ៉េ បាន»។
លោក លឹម ហេង អនុប្រធានសភាពាណិជ្ជកម្មកម្ពុជា (CCC) កត់សម្គាល់ថា ក្រុមវិនិយោគិនកូរ៉េ បច្ចុប្បន្នចាប់អារម្មណ៍កាន់តែខ្លាំងលើកសិពាណិជ្ជកម្មកម្ពុជា។
លោកថ្លែងថា៖ «ពីមុនខ្ញុំមើលឃើញក្រុមវិនិយោគិនកូរ៉េ វិនិយោគច្រើនលើអចលនទ្រព្យ ប៉ុន្តែបន្ទាប់ពីវាធ្លាក់ចុះ ពួកគេងាកទៅរកកសិពាណិជ្ជកម្មវិញ»។ លោកបន្ថែមថា ខណៈឧស្សាហកម្មស្រូវអង្ករកម្ពុជាបានពេញអស់ទៅហើយ វាល្អសម្រាប់ឧស្សាហកម្មកែច្នៃអាហារ។
លោកបញ្ជាក់ថា៖ «យើងមិនអាចប្រកួតប្រជែងជាមួយប្រទេស ថៃ និងវៀតណាម នោះទេ ទាក់ទងនឹងឧស្សាហកម្មបច្ចេកវិទ្យា យើងនៅតែជាប្រទេសតូចមួយនៅឡើយ»។
លោក លឹម ហេង បានឲ្យដឹងថា កម្ពុជាក៏កំពុងសម្លឹងទាក់ទាញវិនិយោគិនកូរ៉េ ដើម្បីវិនិយោគលើឧស្សាហកម្មគ្រឿងយន្តផងដែរ។
កម្ពុជាឈរនៅលំដាប់ទី ៧ ជាទិសដៅវិនិយោគរបស់ប្រទេស កូរ៉េ មានតម្លៃ ១៣៧ លានដុល្លារកាលពីឆ្នាំមុន។ នេះបើយោងតាមរបាយការណ៍របស់ស្ថាប័នគយប្រទេស កូរ៉េ។
តួលេខបង្ហាញថា ទំហំពាណិជ្ជកម្ម រវាងកម្ពុជា និងកូរ៉េ បានកើនឡើងដល់ជាង ៨៦០ លានដុល្លារកាលពីឆ្នាំមុន។ កម្ពុជានាំចេញទៅកូរ៉េ មានតម្លៃ ២៦១ លានដុល្លារ ខណៈការនាំចូលពីកូរ៉េមាន ៦០៣ លានដុល្លារ។
លោក Kim Hyun-Chul ប្រធាន នៃគណៈកម្មការធិការប្រធានាធិបតីស្ដីពីគោលនយោបាយភាគខាងត្បូងថ្មី បានឲ្យដឹងថា បើនិយាយពីឱកាស កម្ពុជាគឺប្រទេសមួយតាមបណ្ដោយទន្លេមេគង្គ ដែលកូរ៉េ នឹងពិភាក្សាជាមួយពីរបៀបក្នុងការពង្រីកការផ្លាស់ប្តូររបស់ប្រជាជន។
លោកថ្លែងថា៖ «រដ្ឋាភិបាលប្រទេស កូរ៉េខាងត្បូង មានជំនួយអភិវឌ្ឍន៍ក្រៅប្រទេស ហើយកម្ពុជា គឺជាប្រទេសមួយ ដែលយើងនឹងពិភាក្សាពីរបៀបប្រើប្រាស់ មូលនិធិនេះ ដើម្បីបង្កើនការទាក់ទាញ រវាងកម្ពុជា និងកូរ៉េ»។
ប៉ុន្តែ ដោយសំដៅដល់វត្តមានបច្ចុប្បន្នរបស់ក្រុមហ៊ុនចិនដ៏ច្រើន នៅកម្ពុជា លោកបញ្ជាក់ថា ប្រទេសនេះមិនគួរពឹងផ្អែកលើប្រភពតែមួយនោះទេ។
លោកថ្លែងថា៖ «ប្រសិនបើយើងពឹងផ្អែកលើប្រទេសមួយ ការធ្វើពិពិធកម្ម អាចរងការគំរាមកំហែង ហើយកូរ៉េ អាចលើកកម្ពស់ការធ្វើពិពិធកម្មបាន»។
លោកបន្ថែមថា នៅឆ្នាំក្រោយ នឹងមានកិច្ចប្រជុំកំពូលពិសេសកូរ៉េ មេគង្គ ហើយនាយករដ្ឋមន្ដ្រីកម្ពុជាបានស្នើឲ្យមានការពិភាក្សាការធ្វើពិពិធកម្មនៅក្នុងកិច្ចប្រជុំកំពូលនោះ៕LA
