ក្រុងសេអ៊ូលៈ ប្រទេស កូរ៉េខាងត្បូង កំពុងដើរឆ្ពោះទៅរកការបង្កើនទំនាក់ទំនងរបស់ខ្លួនជាមួយបណ្ដាប្រទេស អាស៊ាន ដោយប្តេជ្ញាថានឹងបង្កើនការវិនិយោគកាន់តែច្រើនលើហេដ្ឋារចនាសម្ព័ន្ធក្នុងតំបន់ ដើម្បីប្រកួតប្រជែងជាមួយប្រទេស ចិន និងប្រទេស ជប៉ុន។ នេះបើយោងតាមមជ្ឈមណ្ឌល អាស៊ាន-កូរ៉េ។
ការប្តេជ្ញានេះធ្វើឡើងក្នុងអំឡុងវេទិកាការតភ្ជាប់ទំនាក់ទំនងអាស៊ាន (ASEAN Connectivity Forum) លើកទី ៦ ដែលបានប្រព្រឹត្តទៅរយៈពេល ៣ ថ្ងៃនៅទីក្រុងសេអ៊ូលក្នុងសប្ដាហ៍នេះ។
លោក Lee Hyuk អគ្គលេខាធិការមជ្ឈមណ្ឌលអាស៊ាន-កូរ៉េ ដែលបានរៀបចំព្រឹត្តិការណ៍នេះឡើងបានឲ្យដឹងថា រដ្ឋាភិបាលកូរ៉េនឹងប្រមូលមូលនិធិ ១០០ លានដុល្លារនៅត្រឹមឆ្នាំ ២០២២ ដើម្បីបង្កើត «មូលនិធិហេដ្ឋារចនា សម្ព័ន្ធអាស៊ាន-កូរ៉េ» ក្នុងគោលបំណងលើកកម្ពស់កិច្ចសហប្រតិបត្តិការទៅវិញទៅមកក្នុងវិស័យសំខាន់ៗ ៤ ដែលរួមទាំងការដឹកជញ្ជូន ថាមពល ធនធានទឹក និងទីក្រុងវៃឆ្លាត។
លោក Lee Hyuk បានថ្លែងថា៖ «ការតភ្ជាប់ទំនាក់ទំនងអាស៊ាន គាំទ្រដល់ដំណើរការកសាងសហគមន៍ ហើយនឹងជួយដល់ប្រទេសជាសមាជិកអាស៊ានឲ្យធ្វើសមាហរណកម្មដោយខ្លួនឯងបន្ថែមទៀត តាមរយៈការបង្កើតតំបន់ប្រកបដោយការប្រកួតប្រជែង បង្កើននវានុវត្តន៍ និងភាពរស់រវើកមួយ និងផ្ដល់មូលដ្ឋានរយៈពេលវែងសម្រាប់កំណើនប្រកបដោយបរិយាប័ន្ន និងសមធម៌ក្នុងតំបន់នេះ»។
ទោះយ៉ាងណា ខណៈដែលកត់សម្គាល់ថា បណ្ដាប្រទេស អាស៊ាន បានបង្កើនកិច្ចប្រឹងប្រែងជាបន្តបន្ទាប់ ដើម្បីលើកកម្ពស់ការតភ្ជាប់រូបវន្តនោះ លោក Lee Hyuk បានឲ្យដឹងថា ក្រុមហ៊ុនកូរ៉េដែលមានសមត្ថភាពប្រកួតប្រជែងជាច្រើនកំពុងជម្នះជាមួយក្រុមហ៊ុនចិន និងជប៉ុន ដើម្បីទទួលបានគម្រោងជាច្រើន។
លោកថ្លែងថា៖ «ជាមួយនឹងនិន្នាការភាពជាដៃគូឯកជនសាធារណៈ (PPP) បច្ចុប្បន្ន វាមានសារៈសំខាន់សម្រាប់ក្រុមហ៊ុនឯកជន [របស់កូរ៉េ] ក្នុងការបំពាក់សមត្ថភាពសម្រាប់ការផ្ដល់ហិរញ្ញប្បទានគម្រោង»។
លោកបន្តថា៖ «ស្របពេលនេះដែរ វេទិកាឆ្នាំនេះធ្វើឡើងទាន់ពេលវេលា និងប្រកបដោយអត្ថន័យ ដែលនឹងផ្ដល់ជូនសហគមន៍ពាណិជ្ជកម្មកូរ៉េនូវព័ត៌មានសំខាន់ៗស្ដីពីការផ្ដល់ហិរញ្ញប្បទានគម្រោងប្រកបដោយជោគជ័យ បើកចំហឱកាសកាន់តែទូលំទូលាយសម្រាប់ពួកគេ ក្នុងការចូលរួមក្នុងគម្រោងហេដ្ឋារចនាសម្ព័ន្ធទាក់ទងនឹងការតភ្ជាប់នៅក្នុងតំបន់នេះ»។
មានប្រជាជន ៦៤០ លាននាក់ អាស៊ានជាតំបន់មួយមានផលិតផលក្នុងស្រុកសរុប (ផ.ស.ស) ចំនួន ២,៨ ពាន់ពាន់លានដុល្លារ ដោយមានទំហំពាណិជ្ជកម្ម ២,៦ ពាន់ពាន់លានដុល្លារ និងកំណើនសេដ្ឋកិច្ចជាមធ្យមប្រចាំឆ្នាំ ៥ ភាគរយ ហើយរដ្ឋាភិបាលកូរ៉េ នឹងបង្កើនពាណិជ្ជកម្មទ្វេភាគីរវាងភាគីទាំង ២ ដល់ ២០០ ពាន់លានដុល្លារត្រឹមឆ្នាំ ២០២០។
បច្ចុប្បន្ន អាស៊ានដែលជាមហាអំណាចសេដ្ឋកិច្ចឈានមុខគេទី ៥ ក្នុងពិភពលោក ដើរតួនាទីដ៏សំខាន់ក្នុងសេដ្ឋកិច្ចពិភពលោក។ តំបន់នេះគឺជាដៃគូពាណិជ្ជកម្មឈានមុខគេទី ២ របស់ប្រទេសកូរ៉េ ដោយទំហំពាណិជ្ជកម្មទ្វេភាគីបានកើនឡើងដល់ជិត ១៥០ ពាន់លានដុល្លារកាលពីឆ្នាំមុន។ តំបន់នេះជាទិសដៅវិនិយោគឈានមុខគេទី ៣ របស់កូរ៉េខាងត្បូងផងដែរ ដោយមានទំហំវិនិយោគ ៥ ពាន់លានដុល្លារ កាលពីឆ្នាំមុន។ នេះបើតាមរបាយការណ៍របស់អង្គភាពសេវាពន្ធគយកូរ៉េ។
របាយការណ៍នេះបង្ហាញថា ប្រទេស កម្ពុជា ឈរលំដាប់ថ្នាក់ជាទិសដៅវិនិយោគទី ៧ របស់កូរ៉េខាងត្បូង មានតម្លៃ ១៣៧ លានដុល្លារកាលពីឆ្នាំមុន ខណៈដែលវៀតណាម និងសិង្ហបុរី ឈរលំដាប់ឈានមុខគេ ដែលបានទាក់ទាញជាង ១ ពាន់លានដុល្លារក្នុងប្រទេសនីមួយៗ។
តួលេខបង្ហាញថា ទំហំពាណិជ្ជកម្មរវាង កម្ពុជា និងកូរ៉េ បានកើនឡើងដល់ជាង ៨៦០ លានដុល្លារកាលពីឆ្នាំមុន ក្នុងនោះកម្ពុជាបាននាំចេញទៅកូរ៉េ មានតម្លៃ ២៦១ លានដុល្លារ ខណៈដែលការនាំចូលមានតម្លៃ ៦០៣ លានដុល្លារ។
ក្នុងអំឡុងវេទិកានេះ ប្រទេសអាស៊ាននីមួយៗ កំពុងព្យាយាមបង្ហាញការវិនិយោគហេដ្ឋារចនាសម្ព័ន្ធប្រកបដោយសក្ដានុពលរបស់ខ្លួន ដើម្បីទាក់ទាញវិនិយោគបន្ថែមទៀតពីកូរ៉េ។
កម្ពុជាបានចាត់ទុកខ្លួនឯងថាជាមជ្ឈមណ្ឌលនៅអាស៊ានសម្រាប់ការដឹកជញ្ជូន ដោយគ្រោងបង្កើតទីតាំងឡូជីស្ទីក ៦ និងអនុទីតាំងចំនួន ២៥ នៅទូទាំងប្រទេសស្ថិតក្រោមគោលនយោបាយភាពជាដៃគូឯកជនសាធារណៈ។
ក្នុងវគ្គពិភាក្សាក្នុងអំឡុងវេទិកានេះ លោក ពេជ្រ ឈៀង អគ្គនាយកនៅក្រសួងសាធារណការ និងដឹកជញ្ជូន បានអំពាវនាវឲ្យក្រុមវិនិយោគិនវិនិយោគលើហេដ្ឋារចនាសម្ព័ន្ធក្នុងប្រទេស កម្ពុជា។
លោកថ្លែងថា៖ «អ្នកមកវិនិយោគនៅកម្ពុជា អ្នកមិនគ្រាន់តែមានប្រជាជន ១៥ លាននាក់ប៉ុណ្ណោះទេ ផ្ទុយទៅវិញអ្នកនឹងបម្រើប្រជាជនជាង ៦០០ លាននាក់»។
បច្ចុប្បន្ន គម្រោងហេដ្ឋារចនាសម្ព័ន្ធសំខាន់ៗរបស់កម្ពុជា ត្រូវបានផ្ដល់ឲ្យទៅក្រុមហ៊ុនចិន ដូចជាគម្រោងផ្លូវជាតិតម្លៃ ១,៩ ពាន់លានដុល្លារពីភ្នំពេញទៅក្រុងព្រះសីហនុជាដើម។
លោក Lee Hyuk បានឲ្យដឹងថា ខណៈដែលកម្ពុជាជាទិសដៅមួយក្នុងចំណោមទិសដៅដ៏មានសក្ដានុពលសម្រាប់ក្រុមហ៊ុនរបស់កូរ៉េនោះ ប្រទេសនេះគួរតែមានតុល្យភាពខ្លះ។
លោកបានលើកឡើងថា៖ «ខ្ញុំគិតថា មានឥទ្ធិពលចិនខ្លាំងពេកនៅកម្ពុជា ហើយខ្ញុំគិតថា ការពឹងផ្អែកខ្លាំងពេកលើប្រទេសមួយគឺជាហានិភ័យមួយ»។
ប៉ុន្តែលោក ពេជ្រ ឈៀង បានឲ្យដឹងថា ផែនការតភ្ជាប់ផ្លូវដែករបស់កម្ពុជា ទៅវៀតណាម នឹងបើកចំហយ៉ាងទូលំទូលាយស្ថិតក្រោមគោលនយោបាយ PPP។
លោកបញ្ជាក់ថា គម្រោងមួយផ្សេងទៀត គឺការតភ្ជាប់ផ្លូវដែកពីភ្នំពេញទៅព្រំដែនវៀតណាម ជាផ្លូវដែកដែលខ្វះការតភ្ជាប់រវាងអាស៊ាន និងទីក្រុងគុនមីងរបស់ប្រទេស ចិន ដូច្នេះវាជាអាទិភាពចម្បងមួយ ហើយយើងកំពុងធ្វើការងារជាមួយការវិនិយោគឯកជន ជាពិសេសជាមួយ PPP»។
យោងតាមមជ្ឈមណ្ឌល អាស៊ាន-កូរ៉េ តម្រូវការហេដ្ឋារចនាសម្ព័ន្ធនៅបណ្ដាប្រទេសអាស៊ាន ត្រូវបានព្យាករថា បើគិតជាទឹកប្រាក់នឹងមានចំនួនប្រហែល ៣,៣ ពាន់ពាន់លានដុល្លារត្រឹមឆ្នាំ ២០៣០៕ LA