ភ្នំពេញៈ ខណៈវិស័យសាងសង់នៅកម្ពុជាបន្តកើនឡើង វាបានជំរុញឲ្យការផលិតស៊ីម៉ងត៍ក្នុងស្រុកក៏កាន់តែមានទំហំច្រើនឡើងផងដែរ។
យោងតាមតួលេខក្រសួងឧស្សាហកម្ម បានឲ្យដឹងថាឧស្សាហកម្មផលិតស៊ីម៉ងត៍របស់កម្ពុជាសម្រេចបាន ៣,៦ លានតោនរយៈពេល ៩ ខែដំបូងនៅឆ្នាំនេះពីរោងចក្រដែលកំពុងប្រតិបត្តិការចំនួន ៤ ខណៈរោងចក្រស៊ីម៉ងត៍ ២ ផ្សេង កំពុងដំណើរការចង្វាក់ផលិតកម្មរបស់ពួកគេ។
អ្នកនៅក្នុងឧស្សាហកម្មនេះរំពឹងថា កម្ពុជាអាចនឹងផ្គត់ផ្គង់ដោយខ្លួនឯងបាននៅពេលប្រតិបត្តិការផលិតកម្មពេញលេញ។
តួលេខបានពីក្រសួងឧស្សាហកម្មបង្ហាញថា ការផលិតសរុបនៃរោងចក្រស៊ីម៉ងត៍ដែលទទួលបានអាជ្ញាប័ណ្ណមានចំនួន ៣ ៦៧១ ៤១៦ តោនក្នុងរយៈពេល ៩ ខែនៃឆ្នាំនេះ ដែលរោងចក្រស៊ីម៉ងត៍កំពត បានកើនឡើងដល់ ២,២១ លានតោន រោងចក្រផលិតស៊ីម៉ងត៍ចក្រីទីងផលិតបាន ១,២២ លានតោន រោងចក្រស៊ីម៉ងត៍ក្រុមហ៊ុន Chip Mong Insee Cement Corporation ផលិតបាន ១១៩ ០០០ តោន និងក្រុមហ៊ុន Battambang Conch Cement Company Limited ផលិតបាន ១១១ ០០០ តោន។
លោក ហ៊ត ផេង ប្រធាននាយកដ្ឋានកិច្ចការឧស្សាហកម្មនៃក្រសួងឧស្សាហកម្មបានឲ្យដឹងថា រោងចក្រស៊ីម៉ងត៍ ២ ទៀត គឺក្រុមហ៊ុន Southern Cement (Cambodia) Co.,Ltd និងក្រុមហ៊ុន Thai Boon Rong (Cement) កំពុងដំណើរការសាងសង់ ដែលគ្រោងនឹងបញ្ចប់នៅចុងឆ្នាំនេះ។
លោកថ្លែងថា៖ «ការផលិតនៅពេលនេះមានចំនួន ៣,៦លានតោន ហើយរោងចក្រ២បន្ថែមទៀតកំពុងដំណើរការសាងសង់ ហើយផ្អែកលើផែនការ និងបញ្ចប់ត្រឹមឆ្នាំ ២០១៨ នេះ»។
លោក វិញ ហួរ អគ្គនាយកក្រុមហ៊ុន The Battambang Conch Cement Company Ltd បានឲ្យដឹងថានៅពេលដែលឧស្សាហកម្មទាំងមូលដំណើរការពេញលេញ ការផ្គត់ផ្គង់ក្នុងស្រុកនឹងគ្រប់គ្រាន់។
លោកថ្លែងថា៖ «បច្ចុប្បន្នការផលិតសរុបរបស់យើង អាចផ្គត់ផ្គង់ទីផ្សារស៊ីម៉ងត៍ ៧០ ភាគរយ ដែលយើងនៅតែត្រូវការការនាំចូលស៊ីម៉ងត៍ ដើម្បីឆ្លើយតបនឹងតម្រូវការរបស់ឧស្សាហកម្មនេះ»។
លោកបន្តថា៖ «យើងនៅតែអាចដោះស្រាយទីផ្សារស៊ីម៉ងត៍របស់យើងបានត្រឹមឆ្នាំ ២០២០ ប្រសិនបើរោងចក្រស៊ីម៉ងត៍សរុបទាំងអស់ប្រតិបត្តិការពេញលេញ»។ លោកបន្ថែមថា ការផលិតពេញលេញត្រូវបានប៉ាន់ប្រមាណថា នឹងមានចាប់ពី ៦ លានតោនទៅ ៧លានតោន។
រោងចក្រផលិតស៊ីម៉ងត៍ Battambang Conch Cement Company Ltd ដែលជាការវិនិយោគរួមរវាងក្រុមហ៊ុន Conch International Holding (HK) Limited និងក្រុមហ៊ុន Battambang KT Cement Co Ltd បានដាក់ឲ្យដំណើរការរោងចក្រមានតម្លៃ ២៣០ លានដុល្លាររបស់ខ្លួន ក្នុងខេត្តបាត់ដំបងកាលពីខែមិថុនា ដោយមានសមត្ថភាពផលិតសរុប ៥ ០០០ តោនក្នុង ១ ថ្ងៃ។
លោកឲ្យដឹងថា ទោះបីបច្ចុប្បន្នកម្ពុជានៅតែនាំចូលស៊ីម៉ងត៍ ប៉ុន្តែតម្លៃបានមើលឃើញពីការធ្លាក់ចុះ ដោយសមត្ថភាពប្រកួតប្រជែងតម្លៃកាន់តែប្រសើរជាងពីមុន។ លោកបន្តថា ដោយសារតែកំណើនការផ្គត់ផ្គង់ស៊ីម៉ងត៍ក្នុងស្រុក បានធ្វើឲ្យតម្លៃបានធ្លាក់ចុះពី ៩០ ដុល្លារក្នុង ១ តោន មកនៅ ៨០ ដុល្លារក្នុង ១ តោននាពេលបច្ចុប្បន្ន។
លោកថ្លែងថា៖ «តម្លៃទីផ្សារស៊ីម៉ងត៍ គឺធ្លាក់ចុះបន្តិច ដោយសារការបង្កើនការផលិតរបស់ក្រុមហ៊ុនផ្គត់ផ្គង់ក្នុងស្រុក»។ លោកបន្ថែមថា គុណភាពការផលិតក្នុងស្រុកត្រូវបានទទួលយកដោយការប្រើប្រាស់ក្នុងស្រុក ហើយគុណភាពមានទំនុកចិត្តខ្លាំងជាងស៊ីម៉ងត៍នាំចូល៕ LA