.jpg)
លោក Obstfeld កំពុងឆ្លើយសំណួរក្នុងកិច្ចប្រជុំ IMF/WB នៅឆ្នាំនេះ ។ រូបថត AFP
ក្រុងវ៉ាស៊ីនតោនៈ សហរដ្ឋអាមេរិកនឹងចាប់ផ្តើមទទួលរងឥទ្ធិពលនៃការថមថយកំណើនសេដ្ឋកិច្ចពិភពលោកនៅឆ្នាំក្រោយ ប៉ុន្តែគួរតែគេចផុតពីការដើរថយក្រោយនៃសេដ្ឋកិច្ចថ្មីមួយ។ នេះបើតាមការឲ្យដឹងពីប្រធានសេដ្ឋវិទូនៃមូលនិធិរូបិយវត្ថុអន្ដរជាតិ (IMF) កាលពីថ្ងៃអាទិត្យ។
លោក Maurice Obstfeld ប្រធានសេដ្ឋវិទូរបស់មូលនិធិ IMF បានថ្លែងថា «យើងបានព្យាករថា សេដ្ឋកិច្ចអាមេរិកនៅឆ្នាំ ២០១៩ មានកំណើនទាបជាងកំណើនដែលយើងកំពុងមើលឃើញនៅឆ្នាំនេះបន្តិច» ខណៈដែលវិធានការសារពើពន្ធនិងថវិការបស់រដ្ឋបាលលោកត្រាំចាប់ផ្តើមថមថយ។
លោកថ្លែងបែបនេះក្នុងបទសម្ភាសមួយជាមួយកាសែត Wall Street Journal និង Financial Times តែប៉ុន្មានថ្ងៃមុនពេលលោកចូលនិវត្តន៍ពីស្ថាប័នផ្តល់ប្រាក់កម្ចីលំដាប់ពិភពលោកមួយនេះ ។
លោក Obstfeld បានថ្លែងថា៖ «ការថមថយកំណើនសេដ្ឋកិច្ចនៅឆ្នាំ ២០២០ នឹងមានខ្លាំងជាងឆ្នាំ ២០១៩ បើតាមទិន្នន័យដែលយើងកំពុងមើលឃើញ»។
មូលនិធិ IMF បានវាយតម្លៃឡើងវិញដោយទម្លាក់ការព្យាករពីកំណើនសេដ្ឋកិច្ចសម្រាប់ឆ្នាំ ២០១៩ របស់សហរដ្ឋអាមេរិកមកនៅត្រឹម ២,៥ ភាគរយពី ២,៨ ភាគរយដែលខ្លួនបានរំពឹងទុកសម្រាប់ឆ្នាំនេះ ។
លោកថ្លែងថា៖ «សម្រាប់ប្រទេសដទៃទៀតនៅលើពិភពលោក គឺវាហាក់ដូចជាខ្យល់មួយចំនួនកំពុងធ្លាយចេញពីប៉េងប៉ោងដូច្នេះដែរ» ដោយលោកបានចង្អុលបង្ហាញកំណើនសេដ្ឋកិច្ចទាបជាងការរំពឹងទុក នៅតំបន់អាស៊ី និងអឺរ៉ុប។
លោកបន្ថែមថា៖ «ការណ៍នោះ នឹងត្រឡប់មកវិញ ហើយក៏ប៉ះពាល់ដល់សហរដ្ឋអាមេរិកផងដែរ»។
ដូចដែលគាត់បានព្យាករជាច្រើនខែមកហើយ លោក Obstfeld ជាថ្មីម្តងទៀតបានបង្ហាញការសោកស្តាយចំពោះជម្លោះពាណិជ្ជកម្ម ជាពិសេសរវាងសហរដ្ឋអាមេរិក និងប្រទេស ចិន ប៉ុន្តែក៏មានជម្លោះរវាងសហរដ្ឋអាមេរិក និងដៃគូពាណិជ្ជកម្មផ្សេងទៀតផងដែរ រួមទាំងតំបន់អឺរ៉ុបដែលគំរាមកំហែងដល់កំណើនសេដ្ឋកិច្ចសកល។
ប៉ុន្តែលោកបានច្រានចោលនូវលទ្ធភាពដែលថា ពិភពលោកអាចនឹងមើលឃើញវិបត្តិសេដ្ឋកិច្ចដ៏ធំមួយផ្សេងទៀត ដូចនៅក្នុងទសវត្សរ៍ឆ្នាំ ១៩៣០ ជាពេលដែល «ពាណិជ្ជកម្មបានដួលរលំទាំងស្រុងក្រោមសម្ពាធនៃការរឹតបន្តឹងពាណិជ្ជកម្ម»។
លោកថ្លែងថា៖ «នៅពេលនេះ ខ្ញុំមើលឃើញភាពតានតឹងដែលកំពុងបង្កការខូចខាតដោយសារការវិនិយោគជាសកលនិងផលិតកម្មជាច្រើន ត្រូវបានផ្សារភ្ជាប់ទៅនឹងពាណិជ្ជកម្ម តែនឹងមិនអាចដួលរលំដូចដែលយើងបានឃើញក្នុងទសវត្សរ៍ឆ្នាំ ១៩៣០ ទេ»៕ AFP/NS
