.jpg)
ក្រដាសប្រាក់ ១០០ បាត ដែលមានរូបរបស់ព្រះមហាក្សត្រថ្មីរបស់ថៃ។ រូបថត AFP
ក្រុងបាងកកៈ ប្រាក់បាត អាចប្រែប្រួលតម្លៃនៅសប្តាហ៍នេះ ខណៈដែលចក្ខុវិស័យសេដ្ឋកិច្ចពិភពលោកនៅតែងងឹតដោយសារភាពមិនប្រាកដប្រជាជុំវិញជម្លោះពាណិជ្ជកម្មរវាងប្រទេសចិន និងសហរដ្ឋអាមេរិក។ នេះបើយោងតាមសេចក្តីរាយការណ៍របស់កាសែតបាងកកប៉ុស្តិ៍កាលពីចុងសប្តាហ៍មុន។
ធនាគារកណ្តាលថៃបានរាយការណ៍ដោយដកស្រង់អត្រាប្តូរប្រាក់ជាមធ្យមរបស់ធនាគារពាណិជ្ជថា រូបិយប័ណ្ណនេះបានឡើងថ្លៃបន្តិចដល់ ៣៣,១៨ បាតក្នុងមួយដុល្លារធៀបនឹងប្រាក់ដុល្លារកាលពីថ្ងៃពុធ និងថ្ងៃព្រហស្បតិ៍សប្តាហ៍មុន មុនពេលធ្លាក់ចុះ ២៩ សាតាង (ឬ ០,២៩ បាត) មកនៅត្រឹម ៣៣,៤៧ ដុល្លារកាលពីថ្ងៃសុក្រ។
កាសែតបាងកកប៉ុស្តិ៍បានឲ្យដឹងថា ធនាគារ CIMB Thai Bank បានព្យាករថា ប្រាក់បាតនឹងកើនឡើងដល់ចន្លោះ ៣៣,១ ដល់ ៣៣,៦ បាតនៅសប្តាហ៍នេះ ដោយបានឲ្យដឹងថា ការប្រែប្រួលតម្លៃរបស់ប្រាក់បាតអាចត្រូវបានកំណត់ដោយអារម្មណ៍ជុំវិញជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន។
ប្រទេសដែលមានសេដ្ឋកិច្ចធំជាងគេទាំងពីរនេះ បានជាប់គាំងក្នុងជម្លោះដកហូតពន្ធទៅវិញទៅមករវាងគ្នានឹងគ្នា ដោយរដ្ឋាភិបាលក្រុងប៉េកាំងគំរាមសងសឹកប្រឆាំងនឹងរដ្ឋាភិបាលក្រុងវ៉ាស៊ីនតោន តាមរយៈការដកហូតពន្ធលើទំនិញរបស់សហរដ្ឋអាមេរិក។
ក្រុងរដ្ឋមន្ត្រីដែលបានចូលរួមកិច្ចប្រជុំប្រទេសក្នុងតំបន់អាស៊ីអាគ្នេយ៍ក្នុងប្រទេសសិង្ហបុរី បានសម្តែងក្តីបារម្ភអំពីផលប៉ះពាល់របស់ជម្លោះនេះទៅលើពាណិជ្ជកម្មពិភពលោក។
គណៈកម្មការគោលនយោបាយរូបិយវត្ថុថៃ នឹងជួបប្រជុំនៅថ្ងៃពុធសប្តាហ៍នេះ ហើយទាំងធនាគារ CIMB Thai និងមជ្ឈមណ្ឌលស្រាវជ្រាវ Kasikorn រំពឹងថានឹងមិនមានការកែប្រែអត្រាការប្រាក់គោលនយោបាយនោះទេ៕ KC
