ក្រុងស៊ីដនីៈ ការស្រាវជ្រាវថ្មីមួយបានបង្ហាញថា ការវិនិយោគរបស់ប្រទេស ចិន ក្នុងប្រទេស អូស្ដ្រាលី បានធ្លាក់ចុះមកនៅត្រឹមកម្រិតទាបបំផុតរបស់ខ្លួនក្នុងរយៈពេល ៥ ឆ្នាំ ដែលបណ្ដាលឲ្យមានការអំពាវនាវឲ្យរដ្ឋាភិបាលអភិរក្សនិយមដែលទើបនឹងជាប់ឆ្នោតជាថ្មី ត្រូវកែលម្អទំនាក់ទំនងដែលមិនច្បាស់លាស់របស់ខ្លួនជាមួយទីក្រុងប៉េកាំង។
សាកលវិទ្យាល័យជាតិអូស្ដ្រាលី (ANU) បានឲ្យដឹងកាលពីថ្ងៃចន្ទថា បន្ទាប់ពីការកើនឡើងខ្ពស់បំផុតដល់ចំនួន ១៥,៨ ពាន់លានដុល្លារអូស្រា្ដលី (១០,៤ ពាន់លានដុល្លារអាមេរិក) នៅឆ្នាំ ២០១៦ ក្រុមហ៊ុនចិនវិនិយោគតែ ៤,៨ ពាន់លានដុល្លារអូស្រា្ដលីនៅអូស្រ្តាលីពីឆ្នាំទៅ។
ក្រុមអ្នកស្រាវជ្រាវបានឲ្យដឹងថា ចំនួនសាច់ប្រាក់ ដែលហូរចូលក្នុងប្រទេសអូស្ដ្រាលី «មានភាពស្របគ្នាខ្លាំង» ទៅនឹងសកម្មភាពពិភពលោករបស់ចិន លើកលែងតែកាលពីឆ្នាំ ២០១៨ នៅពេលការវិនិយោគនេះបានធ្លាក់ចុះ ៥០ ភាគរយ ពីចំនួន ៩,៦ ពាន់លានដុល្លារអូស្ដ្រាលីកាលពីឆ្នាំ ២០១៧។
ទិន្នន័យនេះនឹងជំរុញឲ្យមានការបារម្ភថា ទំនាក់ទំនងផ្នែកនយោបាយដែលពិបាករវាងទីក្រុងប៉េកាំង និងទីក្រុងកង់បេរ៉ា កំពុងធ្វើឲ្យប៉ះពាល់ដល់ទំនាក់ទំនងសេដ្ឋកិច្ច។
លោក Peter Drysdale សហអ្នកនិពន្ធរបាយការណ៍នេះ បានប្រាប់កាសែតអូស្ដ្រាលីថា៖ «លំហូរវិនិយោគរបស់ប្រទេស ចិន នៅបរទេស បានធ្លាក់ចុះជាទូទៅក្នុងរយៈពេល ១ ឆ្នាំ កន្លងមកនេះ ប៉ុន្តែការវិនិយោគនេះបានធ្លាក់ចុះខ្លាំងនៅប្រទេស អូស្ដ្រាលី»។
លោកថ្លែងថា៖ «វាបង្ហាញថា មានបញ្ហាដោយសារតែទំនាក់ទំនងការវិនិយោគត្រូវបានរងផលប៉ះពាល់បន្ថែមទៀតដោយស្ថានការណ៍នយោបាយ»។
លោកលើកឡើងថា៖ «វាជាសញ្ញាព្រមានដ៏ធ្ងន់ធ្ងរមួយ ដែលយើងត្រូវតែធ្វើកិច្ចការបន្ថែមទៀត ដើម្បីធ្វើឲ្យទំនាក់ទំនងនេះដំណើរការឡើងវិញ។ មានការងារជាច្រើនដែលយើងត្រូវធ្វើ ដើម្បីកែលម្អទំនាក់ទំនងនេះ»។
ក្នុងរយៈពេលប៉ុន្មានឆ្នាំថ្មីៗនេះ ទីក្រុងកង់បេរ៉ាបានរារាំងការវិនិយោគរបស់ប្រទេស ចិន នៅក្នុងគម្រោងហេដ្ឋារចនាសម្ព័ន្ធសំខាន់ៗ ដោយសារតែមេដឹកនាំរបស់ប្រទេសនេះមានការបារម្ភកាន់តែខ្លាំងឡើងអំពីឥទ្ធិពលរបស់ទីក្រុងប៉េកាំងនៅក្នុងប្រទេសរបស់ខ្លួន។
ការសិក្សានេះ ធ្វើឡើងបន្ទាប់ពីមានសេចក្ដីរាយការណ៍នៅដើមឆ្នាំនេះថា ធ្យូងថ្មរបស់ប្រទេសអូស្ដ្រាលី កំពុងត្រូវបានប្លុក ឬជួបប្រទះការពន្យារពេលនៅក្នុងកំពង់ផែរបស់ប្រទេស ចិន។ រដ្ឋាភិបាលទាំង ២ បានបដិសេធសេចក្ដីរាយការណ៍ទាំងនោះ។
ចិនជាដៃគូពាណិជ្ជកម្មធំជាងគេរបស់អូស្ដ្រាលី ហើយធ្យូងថ្មគឺជាការនាំចេញដ៏មានតម្លៃបំផុតរបស់ប្រទេសដែលសម្បូរធនធានមួយនេះ។
សរុបមក ប្រទេស ចិន គឺជាប្រទេសវិនិយោគបរទេសធំទី៩ របស់ប្រទេស អូស្ដ្រាលី ឬស្មើ ១,៨ ភាគរយ នៃការវិនិយោគសរុប។ នេះបើយោងតាមក្រសួងការបរទេសរបស់ប្រទេស អូស្ដ្រាលី៕ AFP/LA