.jpg)
យន្តហោះ 777X ចុះចតបន្ទាប់ពីហោះហើរសាកល្បង។ រូបថត AFP
ក្រុងអេវឺរ៉េតៈ យន្តហោះរយៈចម្ងាយឆ្ងាយ 777X ថ្មីរបស់ក្រុមហ៊ុន Boeing បានហោះហើរសាកល្បងជាលើកដំបូងកាលពីថ្ងៃសៅរ៍ ដែលជាជំហានឆ្ពោះទៅមុខមួយសម្រាប់ក្រុមហ៊ុននេះ ដែលចក្ខុវិស័យរបស់ខ្លួននៅតែមិនច្បាស់លាស់ដោយសារវិបត្តិយន្តហោះ 737 MAX។
យន្តហោះដែលមានម៉ាស៊ីនភ្លោះធំបំផុតក្នុងពិភពលោកនេះបានចុះចតនៅទីលាន Boeing Field នៅជិតទីក្រុង Seattle បន្ទាប់ពីហោះហើរបានប្រហែល ៤ ម៉ោងនៅលើអាកាស ក្រោយពេលដែលបានពន្យារពេលអស់រយៈពេលជាច្រើនខែ និងដោយសារបញ្ហាអាកាសធាតុក្នុងរយៈពេលប៉ុន្មានថ្ងៃថ្មីៗនេះ។
ខ្យល់ខ្លាំងបានឈានទៅរកការពន្យារពេលហោះហើរជាលើកដំបូងរបស់យន្តហោះនេះកាលពីថ្ងៃសុក្រ ហើយក្រុមហ៊ុនបានស្តីបន្ទោសលើបញ្ហាអាកាសធាតុសម្រាប់ការពន្យារពេលហោះហើរកាលពីថ្ងៃព្រហស្បតិ៍ ដែលមានភ្លៀងធ្លាក់។
ប៉ុន្មាននាទីក្រោយមកបន្ទាប់ពីម៉ោង ១០ ព្រឹកម៉ោងនៅអាមេរិកត្រូវនឹងម៉ោង ៦ ល្ងាចម៉ោងសកល យន្តហោះបានហោះឡើងពីផ្លូវរត់ដែលមានទឹកភ្លៀងនៅទីលាន Paine Field ក្នុងទីក្រុងអេវឺរ៉េតដែលជាទីតាំងផលិតកម្មនៅភាគពាយព្យនៅអាមេរិករបស់ក្រុមហ៊ុន Boeing។
ការហោះហើរដំបូងនេះដំបូងឡើយគ្រោងនឹងធ្វើឡើងនៅពាក់កណ្តាលឆ្នាំ ២០១៩ ប៉ុន្តែត្រូវបានពន្យារពេលដោយសារបញ្ហាម៉ាស៊ីនដែលផលិតដោយក្រុមហ៊ុន General Electric និងផលវិបាកនានាជាមួយនឹងស្លាប និងសូហ្វវែរ។
ថ្ងៃសៅរ៍នេះបានបង្ហាញពីការហោះហើរដំបូងនៃអ្វីដែលជាការហោះហើរសាកល្បងជាច្រើន។ ប្រសិនបើការហោះហើរទាំងនោះដំណើរការទៅល្អ ក្រុមហ៊ុន Boeing នឹងដាក់ឯកសារជាផ្លូវការស្នើសុំការអនុម័តពីរដ្ឋបាលអាកាសចរណ៍សហព័ន្ធ (FAA)៕ KC
