ក្រុងប៉េកាំងៈ ក្រុមហ៊ុនផលិតឧបករណ៍ទូរគមនាគមន៍អឺរ៉ុប Ericsson និង Nokia បានឈ្នះកិច្ចសន្យាផ្គត់ផ្គង់បណ្តាញអ៊ីនធឺណិត 5G ដ៏សំខាន់ក្នុងប្រទេស ចិន ជាជំហានមួយដែលក្រុមអ្នកវិភាគនិយាយថា ជាការបង្ហាញឥរិយាបថបើកចំហរបស់ចិនទៅកាន់ក្រុមហ៊ុនអន្តរជាតិ នៅពេលដាក់ដំណើរការបច្ចេកវិទ្យាល្បឿនលឿនខ្លាំងនេះ។
ដំណឹងនេះកើតមានឡើងបន្ទាប់ពីក្រុមហ៊ុន China Mobile ដែលជាប្រតិបត្តិករទូរគមនាគមន៍ធំបំផុតក្នុងពិភពលោកបើគិតតាមអ្នកប្រើប្រាស់ បានប្រកាសថា ខ្លួនទទួលបានកិច្ចសន្យាស្តីពីការផ្គត់ផ្គង់ឧបករណ៍បណ្តាញ 5G នៅជុំទី១ របស់ខ្លួនដែលមានតម្លៃ ២ ពាន់លានដុល្លារ។
ក្រុមហ៊ុន China Mobile ទទួលបានឧបករណ៍ទូរគមនាគមន៍ MME ចំនួន ១៥៣ យូនីត ពីក្រុមហ៊ុន Ericsson របស់ប្រទេស ស៊ុយអែត ដែលស្មើនឹង ៣៤ ភាគរយ នៃលទ្ធកម្មរបស់ក្រុមហ៊ុន។ ក្រុមហ៊ុន Nokia បានផ្តល់ ៥៦ យូនីត ដែលស្មើនឹង ១២ ភាគរយ។
នៅពេលនិយាយអំពីឧបករណ៍ទូរគមនាគម៍ SAE ក្រុមហ៊ុន Ericsson បានផ្តល់ចំនួន ២៣១ យូនីត ដែលស្មើនឹង ៣៤ ភាគរយ នៃអាជីវកម្មរបស់ក្រុមហ៊ុន China Mobile ខណៈដែលក្រុមហ៊ុន Nokia ផ្គង់ផ្គង់ ៦០ យូនីត ដែលស្មើនឹងប្រហែល ៩ ភាគរយ នៃលទ្ធកម្មសរុប។
វិធានការនេះបានកើតមានឡើង ខណៈដែលក្រុមហ៊ុនផ្តល់សេវាទូរស័ព្ទ China Mobile ពន្លឿនការបោះជំហានឆ្ពោះទៅរកការដំឡើងបច្ចេកវិទ្យាឥតខ្សែជំនាន់ទី៥ នេះ ដែលធ្វើឡើងភ្លាមៗបន្ទាប់ពីក្រុមហ៊ុនទទួលបានអាជ្ញាប័ណ្ណពាណិជ្ជកម្ម 5G។ ក្រុមហ៊ុនមានបំណងផ្តល់សេវា 5G លក្ខណៈពាណិជ្ជកម្មក្នុងទីក្រុងចំនួន ៤០ នៅត្រឹមខែកញ្ញាខាងមុខ។
ចំណែកដ៏ច្រើនរបស់ក្រុមហ៊ុន Ericsson និងក្រុមហ៊ុន Nokia ក្នុងផែនការលទ្ធកម្មរបស់ក្រុមហ៊ុន China Mobile បង្ហាញឲ្យឃើញថា ប្រទេស ចិន ធ្វើតាមការសន្យារបស់ខ្លួនក្នុងការប្រកាន់ខ្ជាប់ទៅនឹងកិច្ចសហប្រតិបត្តិការអន្តរជាតិ។ នេះបើយោងតាមក្រុមអ្នកវិភាគ។
ក្រសួងឧស្សាហកម្ម និងបច្ចេកវិទ្យាព័ត៌មានរបស់ប្រទេស ចិន បានឲ្យដឹងនៅដើមខែនេះថា ក្រសួងស្វាគមន៍ក្រុមហ៊ុនបរទេស ដែលមកចូលរួមយ៉ាងសកម្មក្នុងការសាងសង់បណ្តាញ 5G របស់ប្រទេស ចិន និងការលើកកម្ពស់ការអនុវត្តបច្ចេកវិទ្យានេះ៕ People''s Daily/KC