តូក្យូៈ ក្រុមហ៊ុន Hitachi របស់ប្រទេស ជប៉ុន កាលពីថ្ងៃចន្ទ បានប្រកាសផែនការទិញភាគហ៊ុនភាគច្រើននៅក្នុងក្រុមហ៊ុន ABB ជាក្រុមហ៊ុនវិស្វកម្មឧបករណ៍ថាមពលរបស់ប្រទេស ស្វ៊ីស និងស៊ុយអែត ក្នុងតម្លៃ ៦,៤ ពាន់លានដុល្លារ ជាអ្វីដែលនឹងក្លាយជាការទិញភាគហ៊ុនធំជាងគេមិនធ្លាប់មាន។
ប្រព័ន្ធព័ត៌មាននៅក្នុងប្រទេស ជប៉ុន បានឲ្យដឹងថា កិច្ចព្រមព្រៀងនេះធ្វើឲ្យក្រុមហ៊ុន Hitachi ក្លាយជាក្រុមហ៊ុនផលិតឧបករណ៍ថាមពលអគ្គិសនីឈានមុខគេលើពិភពលោក។
ក្រុមហ៊ុនរបស់ប្រទេស ជប៉ុន មួយនេះបានឲ្យដឹងនៅក្នុងសេចក្ដីប្រកាសព័ត៌មានមួយថា ស្ថិតក្រោមផែនការនេះ ក្រុមហ៊ុន ABB នឹងបង្កើតក្រុមហ៊ុនអគ្គិសនីរបស់ខ្លួន ដែលក្រុមហ៊ុន Hitachi នឹងទិញភាគហ៊ុន ៨០,១ ភាគរយក្នុងតម្លៃ ៧០៤ ពាន់លានយ៉េននៅដើមឆ្នាំ ២០២០។
អ្នកនាំពាក្យមួយរូបបានឲ្យដឹងដោយមិនបង្ហាញតម្លៃថា៖ «យើងគ្រោងនឹងទិញភាគហ៊ុនដែលនៅសល់ ដើម្បីឲ្យក្រុមហ៊ុន Hitachi អាចធ្វើឲ្យផ្នែកអាជីវកម្មមួយនេះក្លាយជាក្រុមហ៊ុនគ្រប់គ្រងទាំងស្រុងរបស់ខ្លួន»។
អាជីវកម្មបណ្តាញអគ្គិសនីរបស់ក្រុមហ៊ុន ABB សាងសង់ និងប្រតិបត្តិការហេដ្ឋារចនាសម្ព័ន្ធ ដែលរួមមានឧបករណ៍បញ្ជូនអគ្គិសនី និងប្រព័ន្ធគ្រប់គ្រងនៅក្នុងបណ្ដាប្រទេសជាច្រើន។
កិច្ចព្រមព្រៀងនេះនឹងធ្វើឲ្យក្រុមហ៊ុន Hitachi ក្លាយជាក្រុមហ៊ុនផលិតឧបករណ៍អគ្គិសនីធុនធ្ងន់ឈានមុខគេទី ២ របស់ពិភពលោកដោយប្រាក់ចំណូល នៅពីក្រោយក្រុមហ៊ុន General Electric តែមួយប៉ុណ្ណោះ។ នេះបើយោងតាមប្រព័ន្ធព័ត៌មាននៅក្នុងប្រទេស ជប៉ុន។
សារព័ត៌មានប្រចាំថ្ងៃ Nikkei បានរាយការណ៍ថា ដំបូងកិច្ចព្រមព្រៀងនេះគ្រោងតាំងពីថ្ងៃព្រហស្បតិ៍មុន ប៉ុន្តែភាគហ៊ុនរបស់ក្រុមហ៊ុន Hitachi បានធ្លាក់ចុះ ២,៥ ភាគរយចាប់ពីពេលនោះ។
ទីភ្នាក់ងារវាយតម្លៃ Standard & Poor បានឲ្យដឹងថា អាជីវកម្មឧបករណ៍បញ្ជូន និងចែកចាយថាមពលអគ្គិសនី កំពុងរីកច្រើនលើពិភពលោក ដោយមានដំណោះស្រាយសេវានៅទីកន្លែងដែលជោគជ័យជាពិសេស។
ទីភ្នាក់ងារនេះបន្តថា ប៉ុន្តែ «ប្រាក់ចំណេញរបស់អាជីវកម្មនេះអាចមានការប្រែប្រួល ដោយពឹងផ្អែកលើថា តើក្រុមហ៊ុនមួយនេះគ្រប់គ្រងគម្រោងជាប់ទាក់ទងនឹងការដឹកជញ្ជូនសម្ភារបានល្អយ៉ាងណា?»៕ AFP/LA