ក្រុងគែរៈ រដ្ឋមន្ដ្រីក្រសួងទូរគមនាគមន៍ និងព័ត៌មានវិទ្យារបស់ប្រទេស អេហ្ស៊ីប បានឲ្យដឹងកាលពីថ្ងៃអាទិត្យថា ក្រុមហ៊ុន Huawei នឹងផ្ដល់បណ្ដាញទូរស័ព្ទ 5G ជាលើកដំបូងក្នុងអំឡុងការប្រកួតកីឡាពានរង្វាន់បាល់ទាត់ទ្វីបអា្រហ្វិកនៅរដូវក្ដៅនេះ។
ក្រុមហ៊ុនរបស់ប្រទេស ចិន មួយនេះនឹងដាក់ឲ្យប្រើប្រាស់បច្ចេកវិទ្យានេះក្នុងពហុកីឡដ្ឋានអន្តរជាតិក្រុងគែរ ដែលមានសមត្ថភាពផ្ទុកអ្នកទស្សនាចំនួន ៧៤ ០០០ នាក់ ដែលនឹងរៀបចំការប្រកួតចំនួន ១០ ប្រកួតដែលរួមទាំងការប្រកួតវគ្គផ្ដាច់ព្រ័ត្រក្នុងអំឡុងព្រឹត្តិការណ៍នេះផងដែរ។
លោក Amr Talaat បានថ្លែងថា៖ «ប្រទេស អេហ្ស៊ីប ចង់សហប្រតិបត្តិការជាមួយក្រុមហ៊ុន Huawei ក្នុងវិស័យបញ្ញាសិប្បនិម្មិត ការផ្ទេរបច្ចេកវិទ្យា និងក្នុងប្រព័ន្ធ 5G»។
ក្រុមហ៊ុន Huawei ជាក្រុមហ៊ុនផលិតឧបករណ៍នាំមុខគេសម្រាប់ការផ្ដល់រលកសញ្ញា ប្រព័ន្ធទូរស័ព្ទចល័តជំនាន់ក្រោយ 5G ដែលមានសមត្ថភាពផ្ទេរទិន្នន័យស្ទើរតែបានភ្លាមៗ ដែលនឹងក្លាយជាប្រព័ន្ធគួរឲ្យបារម្ភរបស់សេដ្ឋកិច្ចរបស់អឺរ៉ុបក្នុងវិស័យជាយុទ្ធសាស្ដ្រដូចជាថាមពល ការដឹកជញ្ជូន ធនាគារ និងការថែទាំសុខភាព។
ទោះយ៉ាងណា បណ្ដាប្រទេសលោកខាងលិចមួយចំនួនបានរារាំងប្រព័ន្ធនេះ ដោយសារតែការបារម្ភថា ទីក្រុងប៉េកាំងអាចទទួលបានលទ្ធភាពចូលទៅក្នុងប្រព័ន្ធទូរគមនាគមន៍ និងហេដ្ឋារចនាសម្ព័ន្ធសំខាន់ៗដែលងាយបង្កជាបញ្ហា ប៉ុន្តែក្រុមហ៊ុន Huawei បដិសេធការចោទប្រកាន់ទាំងអស់នេះ។
ការប្រកួតកីឡាបាល់ទាត់ពានរង្វាន់អាហ្រ្វិក (Cup of Nations) នឹងរៀបចំធ្វើឡើងចន្លោះថ្ងៃទី ២១ ខែ មិថុនា ដល់ថ្ងៃទី ១៩ ខែ កក្កដា ក្នុងប្រទេសស្ថិតនៅភាគខាងជើងទ្វីបអាហ្រ្វិកមួយនេះ៕AFP/LA