ក្រុងញូវយ៉កៈ ក្រុមហ៊ុន LMVH ដែលគ្រប់គ្រងទំនិញម៉ាកយីហោល្បីៗដូចជា Louis Vuitton, Dior និងស្រាសំប៉ាញ Veuve Clicquot និង Moet បានដាក់សំណើទិញយកក្រុមហ៊ុនគ្រឿងអលង្ការអាមេរិក Tiffany ដែលមានឈ្មោះល្បីខាងផលិតចិញ្ចៀនភ្ជាប់ពាក្យ និងត្បូងមានតម្លៃ។
ក្រុមហ៊ុនលក់ផលិតផលទំនិញតម្លៃថ្លៃរបស់ប្រទេស បារាំង មួយនេះបានដាក់សំណើទិញក្រុមហ៊ុនអាមេរិកនៅដើមខែនេះ។ នេះបើយោងតាមប្រភពមួយដែលបានប្រាប់ទីភ្នាក់ងារព័ត៌មាន AFP កាលពីថ្ងៃសៅរ៍។
ក្រុមហ៊ុន Tiffany ដែលហាងលក់គ្រឿងអលង្ការល្បីរបស់ខ្លួននៅជាប់នឹងអគារ Trump Tower ស្ថិតនៅលើផ្លូវលេខ ៥ មិនទាន់បានឆ្លើយតបទៅនឹងការសំណើទិញនេះទេ ដែលសំណើនេះធ្វើឡើង ខណៈឧស្សាហកម្មទំនិញតម្លៃថ្លៃស្ថិតក្នុងភាពមិនសូវល្អដោយសារឥទ្ធិពលដែលអាចកើតមានចេញពីសង្គ្រាមពាណិជ្ជកម្មរវាងអាមេរិក និងប្រទេសចិន។
យុទ្ធនាការប្រឆាំងអំពើពុករលួយយ៉ាងទូលំទូលាយដែលធ្វើឡើងដោយលោកប្រធានាធិបតីចិន ស៊ី ជីនភីង ក៏បានបន្ទច់បង្អាក់ដល់ការទិញអំណោយតម្លៃថ្លៃៗដោយធុរជន និងមន្ត្រីរដ្ឋាភិបាលផងដែរ។
បាតុកម្មគាំទ្រប្រជាធិបតេយ្យជាច្រើនខែក្នុងទីក្រុងហុងកុងបានបង្កហានិភ័យបន្ថែមទៀតដល់វិស័យទំនិញថ្លៃៗ។
ប្រភពដែលប្រាប់ AFP ដែលស្នើសុំមិនបញ្ចេញឈ្មោះមិនបាននិយាយថាតើក្រុមហ៊ុន LVMH ផ្តល់តម្លៃប៉ុន្មានដើម្បីទិញយកក្រុមហ៊ុន Tiffany នោះទេ ប៉ុន្តែប្រភពដដែលនេះក៏មិនប្រាកដផងដែថា តើការពិភាក្សានេះអាចនឹងឈានទៅដល់ការសម្រេចបានកិច្ចព្រមព្រៀងមួយឬយ៉ាងណានោះដែរ។
មូលធននីយកម្មទីផ្សារភាគហ៊ុនរបស់ក្រុមហ៊ុន Tiffany មានតម្លៃប្រហែល ១១,៩ ពាន់លានដុល្លារ នៅពេលបិទការជួញដូរភាគហ៊ុននៅល្ងាចថ្ងៃសុក្រសប្តាហ៍មុន។
ប្រាក់ចំណូលពីការលក់របស់ក្រុមហ៊ុនលក់គ្រឿងអលង្ការនេះបានកើនឡើង ៦,៥ ភាគរយ ដល់ ៤,៤ ពាន់លានដុល្លារ នៅឆ្នាំសារពើពន្ធមុន ហើយក្រុមហ៊ុនមានបុគ្គលិកចំនួន ១៤ ០០០ នាក់ គិតត្រឹមថ្ងៃទី ៣១ ខែមករា។
ប្រភពដដែលបានបន្ថែមថា Tiffany បានស្នើសុំការប្រឹក្សាយោបល់អំពីសំណើទិញរបស់ LMVH ពីធនាគារធំៗ។
ក្រុមហ៊ុន LVMH មិនបានឆ្លើយតបភ្លាមៗនោះទេទៅនឹងសំណើសុំការអត្ថាធិប្បាយរបស់ AFP ខណៈដែលអ្នកនាំពាក្យរបស់ក្រុមហ៊ុន Tiffany បដិសេធធ្វើអត្ថាធិប្បាយចំពោះ «ពាក្យចចាមអារ៉ាម និងការលើកឡើង» ទាំងនេះ៕ KC