.jpg)
អ្នកបើកបររ៉ឺម៉កកង់នៅឥណ្ឌាកាន់ទូរស័ព្ទដែលមាន App របស់ Uber។ AFP
ក្រុងញូវយ៉កៈ ក្រុមហ៊ុនហៅតាក់ស៊ីជិះ Uber បានលក់អាជីវកម្មដឹកជញ្ជូនអាហាររបស់ខ្លួនក្នុងប្រទេស ឥណ្ឌា ឲ្យក្រុមហ៊ុន Zomato ដែលជាគូប្រជែកក្នុងប្រទេសនេះ ខណៈក្រុមហ៊ុននេះបង្កើនកិច្ចខិតខំប្រឹងប្រែងដើម្បីសម្រេចបានប្រាក់ចំណេញ។
ឥណ្ឌាជាទីផ្សារមួយក្នុងចំណោមទីផ្សារធំជាងគេជាច្រើនរបស់ក្រុមហ៊ុន Uber សម្រាប់សេវាតាក់ស៊ី ប៉ុន្តែ UberEats ដែលជាសេវាដឹកជញ្ជូនអាហាររបស់ក្រុមហ៊ុននេះបានជម្នះក្នុងការប្រកួតប្រជែងជាមួយក្រុមហ៊ុន Zomato និងក្រុមហ៊ុន Swiggy ជាក្រុមហ៊ុនដឹកជញ្ជូនអាហារអនឡាញឈានមុខគេចំនួន ២ ក្នុងប្រទេសមួយនេះ។
ជាថ្នូរនឹងការលក់បណ្ដាញភោជនីយដ្ឋាន អ្នកបើកបរដឹកជញ្ជូនអាហារ និងអតិថិជនដែល UberEats បានបង្កើតឡើងនៅឥណ្ឌាចាប់ពីឆ្នាំ ២០១៧ នោះ ក្រុមហ៊ុន Uber នឹងទទួលបានភាគហ៊ុន ៩,៩៩ ភាគរយ នៃមូលធនរបស់ក្រុមហ៊ុន Zomato។ នេះបើយោងតាមសេចក្ដីប្រកាសព័ត៌មានដែលបានចេញផ្សាយកាលពីល្ងាចថ្ងៃចន្ទ។
សេចក្ដីប្រកាសព័ត៌មាននេះ មិនបានបញ្ជាក់តម្លៃរបស់ក្រុមហ៊ុនបង្កើតថ្មីរបស់ប្រទេសឥណ្ឌាមួយនេះទេ។
អ្នកប្រើប្រាស់ UberEats នឹងត្រូវបានប្តូរទិសដៅទៅក្រុមហ៊ុន Zomato ដែលចាប់ផ្ដើមនៅថ្ងៃអង្គារម្សិលមិញ។
លោក Dara Khosrowshahi អគ្គនាយកក្រុមហ៊ុន Uber ឲ្យដឹងក្នុងសេចក្ដីប្រកាសព័ត៌មាននេះថា៖ «ឥណ្ឌានៅតែជាទីផ្សារដ៏សំខាន់ជាពិសេសចំពោះក្រុមហ៊ុន Uber ហើយយើងនឹងបន្តវិនិយោគលើការបង្កើនអាជីវកម្មហៅតាក់ស៊ីជិះក្នុងស្រុករបស់យើង ដែលក្រុមហ៊ុនកំពុងនាំមុខគេរួចហើយ»៕ LA
