.jpg)
ទិដ្ឋភាពនៃបរិវេណខាងក្នុងនៃតំបន់សេដ្ឋកិច្ចពិសេសភ្នំពេញ PPSEZ ដែលស្ថិតនៅតាមបណ្តោយផ្លូវជាតិលេខ៤ ជាយក្រុងភ្នំពេញ។ ភ្នំពេញ ប៉ុស្តិ៍
ភ្នំពេញៈ ក្រុមវិនិយោគិនយុទ្ធសាស្ដ្រ ២ បានចំណាយជិត ១០ លានដុល្លារ ដើម្បីទិញភាគហ៊ុន ១៤ លានហ៊ុនរបស់ក្រុមហ៊ុនចុះបញ្ជីក្នុងផ្សារហ៊ុននៅកម្ពុជា Phnom Penh SEZ Plc (PPSEZ) ដែលជាការដាក់លក់មូលបត្រជាឯកជនលើកដំបូង ដោយក្រុមហ៊ុនចុះបញ្ជីក្នុងផ្សារហ៊ុនកម្ពុជា។
ការប្រកាសនេះធ្វើឡើងនៅក្នុងសន្និសីទព័ត៌មានមួយកាលពីថ្ងៃសុក្រ ដោយក្រុមវិនិយោគិនទាំង ២ នេះគឺ JWD Infologistics Plc ជាក្រុមហ៊ុនចុះបញ្ជីនៅក្នុងប្រទេស ថៃ ដែលជាក្រុមហ៊ុនផ្គត់ផ្គង់សេវាដឹកជញ្ជូន និងស្ដុកទំនិញឈានមុខគេក្នុងតំបន់ និង Bok Seng Group ជាក្រុមហ៊ុនផ្គត់ផ្គង់ក្នុងតំបន់ឈានមុខគេរបស់ប្រទេស សិង្ហបុរី នៃក្រុមហ៊ុន Integrated Project & Marine Logistics Management។
ក្នុងចំណោមភាគហ៊ុន ១៤ លាននេះ ភាគហ៊ុនជាង ៧,៥ លានត្រូវបានទិញដោយក្រុមហ៊ុន JWD ខណៈភាគហ៊ុននៅសល់ត្រូវបានលក់ឲ្យក្រុមហ៊ុន Bok Sheng Group ក្នុងតម្លៃ ៧០,៣៧ សេនដុល្លារក្នុង ១ ភាគហ៊ុន ដែលធ្វើឲ្យភាគហ៊ុនចុះបញ្ជីសរុបរបស់ក្រុមហ៊ុន PPSEZ កើនឡើងជិត ៧២ លានភាគហ៊ុន។ ការដាក់លក់មូលបត្រជាឯកជននេះ នឹងធ្វើឲ្យក្រុមហ៊ុន PPSEZ អាច រកប្រាក់បាន ៩,៨៥ លានដុល្លារ។
លោក Henry Ng Lian Soon ជាស្ថាបនិក និងប្រធានក្រុមហ៊ុន Bok Seng Group ដែលមានមជ្ឈមណ្ឌលពាណិជ្ជកម្ម និងប្រតិបត្តិការនៅ ម៉ាឡេស៊ី ឥណ្ឌូនេស៊ី ប៊្រុយណេ ថៃ មីយ៉ាន់ម៉ា វៀតណាម និងឡាវ បានឲ្យដឹងថា លោកចង់ទទួលយកអត្ថប្រយោជន៍ពីផ្លូវមួយ និងខ្សែក្រវាត់មួយរបស់ចិន ដែលភ្ជាប់ការវិនិយោគរបស់លោកនៅកម្ពុជា ជាមួយបណ្ដាប្រទេសផ្សេងទៀត ដែលក្រុមហ៊ុនរបស់លោកកំពុងប្រតិបត្តិការ។
លោក Henry Ng ថ្លែងថា៖ «ខ្ញុំគិតថា នៅពេលអនាគត សម្រាប់គម្រោងផ្លូវមួយ និងខ្សែក្រវាត់មួយ យើងអាចជួញដូរឆ្លងកាត់ព្រំដែន។ ដោយសារតែយើងកំពុងស្ថិតក្នុងវិស័យដឹកជញ្ជូន យើងត្រូវការបណ្ដាញ។ យើងត្រូវការក្រុមហ៊ុនក្នុងស្រុក ដើម្បីជួយដល់ក្រុមហ៊ុននៅតាមបណ្ដាប្រទេសផ្សេងទៀត»។
ក្រុមហ៊ុន JWD បានទិញភាគហ៊ុន ៥,២ ភាគរយរួចហើយនៅក្នុងក្រុមហ៊ុន PPSEZ កាលពីឆ្នាំ ២០១៦ ហើយជាក្រុមហ៊ុនមួយដែលមានមហិច្ឆតាក្នុងការ ក្លាយជាក្រុមហ៊ុនផ្គត់ផ្គង់សេវាដឹកជញ្ជូន ក្នុងតំបន់មួយដែលបណ្ដាញនៃប្រតិបត្តិ ការគ្របដណ្ដប់ទាំងនៅលើទីផ្សារកើនឡើងខ្លាំង និងទីផ្សារកំពុងអភិវឌ្ឍន៍។
លោក Nattapume Pavaratn អ្នកតំណាងក្រុមហ៊ុន JWD បានឲ្យដឹងថា ក្រុមហ៊ុន PPSEZ គឺជាក្រុមហ៊ុនមានសក្ដានុពល និងជោគជ័យខ្លាំងក្នុងការវិនិយោគ ហើយការវិនិយោគបន្ថែមនេះ នឹងនាំយកទាំងជំនួយផ្នែកយុទ្ធសាស្ដ្រ និងបទពិសោធដល់ក្រុមហ៊ុន PPSEZ។
លោកថ្លែងថា៖ «យើងអាចនាំយកយ៉ាងហោចណាស់ជំនាញដល់ក្រុមហ៊ុន PPSEZ នៅពេលអនាគត»។
PPSEZ គឺជាក្រុមហ៊ុនទី ៤ ដែលបានចុះបញ្ជីនៅ CSX កាលពីខែឧសភាឆ្នាំ ២០១៦ ហើយក្រុមហ៊ុននេះនឹងប្រើប្រាស់ទឹកប្រាក់នេះ ដើម្បីគាំទ្រដល់ការពង្រីកអាជីវកម្ម ឱកាសអភិវឌ្ឍអាជីវកម្មថ្មី និងសម្រាប់គោលបំណងសាជីវកម្មជាទូទៅ៕LA
