.jpg)
លោក Gao Feng ថ្លែងក្នុងសន្និសីទនាពេលកន្លងមក។ រូបថត AFP
ក្រុងប៉េកាំងៈ លោក Gao Feng អ្នកនាំពាក្យក្រសួងពាណិជ្ជកម្មចិន (MOFCOM) បានឲ្យដឹងកាលពីចុងសប្តាហ៍មុនថា ប្រទេស ចិន បានស្វាគមន៍សុច្ឆន្ទៈពីភាគីអាមេរិក ហើយក្រុមហ៊ុនរបស់ប្រទេស ចិន ជាច្រើនបានចាប់ផ្ដើមសាកសួរតម្លៃផលិតផលកសិកម្ម រួមទាំងសណ្ដែកសៀង និងសាច់ជ្រូកពីអាមេរិកវិញហើយ។
ការអត្ថាធិប្បាយរបស់លោក Gao បានធ្វើឡើង បន្ទាប់ពីលោកប្រធានាធិបតីអាមេរិក ដូណាល់ ត្រាំ បានឲ្យដឹងនៅលើ Twitter កាលពីថ្ងៃព្រហស្បតិ៍ថា អាមេរិកបានយល់ព្រមលុបចោលការបង្កើនពន្ធនាំចូលលើទំនិញតម្លៃ ២៥០ ពាន់លានដុល្លារ (២៥ ភាគរយដល់ ៣០ ភាគរយ) ចាប់ពីថ្ងៃទី ១ ដល់ថ្ងៃទី ១៥ ខែ តុលា ដែលលោកថា ការពន្យារពេលនេះជាកាយវិការសុច្ឆន្ទៈមួយ។
លោក Gao ឲ្យដឹងថា ក្រុមការងារចរចាពាណិជ្ជកម្មមកពីប្រទេសទាំង ២ បន្តទាក់ទងគ្នា ហើយពួកគេកំពុងរៀបចំការចរចានៅពេលខាងមុខ។
ក្រសួងពាណិជ្ជកម្មរបស់ប្រទេសចិនបានឲ្យដឹងកាលពីសប្ដាហ៍មុនថា ទីក្រុងប៉េកាំង និងទីក្រុងវ៉ាស៊ីនតោននឹងខិតខំដើម្បីសម្រេចបាន «ការរីកចម្រើនដ៏សំខាន់» នៅក្នុងការពិគ្រោះយោបល់ពាណិជ្ជកម្មជុំទី ១៣ ដែលនឹងធ្វើឡើងនៅដើមខែតុលា នៅទីក្រុងវ៉ាស៊ីនតោន។
លោក Gao បានឲ្យដឹងក្នុងសន្និសីទព័ត៌មានមួយថា៖ «យើងសង្ឃឹមថា ភាគីទាំង ២ នឹងឆ្ពោះទៅរកទិសដៅដូចគ្នា ចាត់វិធានការជាក់ស្ដែង និងផ្ដល់បរិយាកាសល្អប្រសើរសម្រាប់ការចរចាពាណិជ្ជកម្ម ហើយវានឹងល្អសម្រាប់ប្រទេសទាំង ២ និងពិភពលោក»។
ទីក្រុងប៉េកាំងកាលពីថ្ងៃពុធបានប្រកាសផែនការមួយសម្រាប់ការនាំចូលផលិតរបស់អាមេរិកមួយចំនួន ហើយក្រុមហ៊ុនរបស់អាមេរិកមួយចំនួនបានដាក់ពាក្យស្នើសុំការលើកលែងពីការដកហូតពន្ធនាំចូលរបស់ប្រទេសចិន។
ផលិតផលរបស់អាមេរិកជាច្រើនដែលទទួលបានការលើកលែងពីការដកហូតពន្ធនាំចូលរបស់ប្រទេសចិនរួមមានទំនិញ ១៦ ប្រភេទដែលជាប់ទាក់ទងនឹងការរស់នៅប្រចាំថ្ងៃរបស់ពលរដ្ឋ ដូចជាប្រេងរំអិល ឧបករណ៍ព្យាបាលជំងឺមហារីក និងឱសថប្រឆាំងទៅនឹងជំងឺមហារីកជាដើម។
លោក Gao បានថ្លែងថា៖ «គណៈកម្មការពន្ធនាំចូលនៃក្រុមប្រឹក្សារដ្ឋនឹងបន្តធ្វើការងារលើបញ្ជីលើកលែង និងចេញផ្សាយបញ្ជីនេះនៅក្នុងពេលវេលាត្រឹមត្រូវមួយ»។
ក្រុមអ្នកជំនាញបានឲ្យដឹងថា ការសម្រេចចិត្តរបស់អាមេរិកក្នុងការពន្យារពេលពន្ធនាំចូលបន្ថែមគឺល្អសម្រាប់ការចរចាពាណិជ្ជកម្មរវាងប្រទេសចិន និងអាមេរិកនៅពេលខាងមុខ ប៉ុន្តែអ្វីដែលលោក ត្រាំ បានធ្វើគឺមិនទាន់គ្រប់គ្រាន់ទេ ហើយចិនមិនគួរចាត់ទុកវាថាជាការសម្រេចបានដ៏សំខាន់មួយនៅក្នុងការចរចាពាណិជ្ជកម្មដែលនៅតែពិបាកខ្លាំងនោះទេ។
លោក Bai Ming អ្នកស្រាវជ្រាវនៅបណ្ឌិត្យសភាកិច្ចសហប្រតិបត្តិការពាណិជ្ជកម្ម និងសេដ្ឋកិច្ចអន្តរជាតិរបស់ប្រទេសចិនបានប្រាប់កាសែត Global Times ថា៖ «ការពន្យារពេលពន្ធនាំចូលបន្ថែមនេះមិនទាន់គ្រប់គ្រាន់នៅឡើយនោះទេ ហើយយើងមិនអាចសរសើរគាត់បានទេ។ មានតែតាមរយៈការលុបចោលពន្ធនាំចូលបន្ថែមនោះទេ ទើបលោកអាចបង្ហាញភាពស្មោះត្រង់របស់លោកនៅក្នុងការចរចាពាណិជ្ជកម្ម»។
លោក Bai មានប្រសាសន៍ថា៖ «កាន់តែសំខាន់ជាងនេះទៅទៀតនោះ យើងគួរតែមើលអ្វីដែលលោកបានធ្វើរួចហើយ និងអ្វីដែលលោកនឹងធ្វើ»៕ People''s Daily/LA
