.jpg)
គេហទំព័រ Tokopedia បង្ហាញពីការលក់សំបុត្រអនឡាញ។ រូប AFP
ក្រុងហ្សាការតាៈ ក្រុមហ៊ុន Tokopedia ដែលជាប្រតិបត្តិករគេហទំព័រក្រុមហ៊ុនពាណិជ្ជកម្មអនឡាញដ៏ធំរបស់ឥណ្ឌូនេស៊ី បានឱ្យដឹងកាលពីថ្ងៃពុធថា ខ្លួនប្រមូលមូលនិធិបានចំនួន ១,១ ពាន់លានដុល្លារពីវិនិយោគិនមួយចំនួន រួមទាំងក្រុមហ៊ុនបច្ចេកវិទ្យាជប៉ុន SoftBank និងក្រុមហ៊ុន Alibaba របស់ចិនផងដែរ។
ការផ្តល់ហិរញ្ញប្បទានចុងក្រោយបំផុតសម្រាប់ក្រុមហ៊ុន Tokopedia ដែលអនុញ្ញាតឱ្យអ្នកប្រើប្រាស់បង្កើតហាងលក់ទំនិញតាមប្រព័ន្ធអនឡាញនោះនិងទូទាត់ប្រតិបត្តិការនានា បង្ហាញឲ្យឃើញពីការជំរុញមួយពីសំណាក់ក្រុមហ៊ុនបរទេសក្នុងការទាញយកអត្ថប្រយោជន៍ពីទីផ្សារអនឡាញដែលកំពុងស្ទុះងើបរបស់ឥណ្ឌូនេស៊ី។
វិនិយោគិនធំៗ ដែលក៏រួមមានទាំងក្រុមហ៊ុន Expedia និងក្រុមហ៊ុន Tencent របស់ប្រទេស ចិន ផងដែរនោះបានចាក់បញ្ចូលប្រាក់រាប់ពាន់លានដុល្លារទៅក្នុងក្រុមហ៊ុនទើបបង្កើតថ្មីផ្នែកបច្ចេកវិទ្យារបស់ឥណ្ឌូនេស៊ីមួយនេះ ដើម្បីទាញយកអត្ថប្រយោជន៍ពីសេដ្ឋកិច្ចឌីជីថលដែលកំពុងកើនឡើង។
ក្រុមហ៊ុន Tokopedia ដែលបង្កើតឡើងកាលពីជិត ១ ទសវត្សរ៍មុនឲ្យដឹងថា ខ្លួននឹងបន្តផ្តោតលើទីផ្សារឥណ្ឌូនេស៊ី ដែលមានប្រជាជនរហូតដល់ ២៦០ លាននាក់ ជាទីដែលប្រជាជនមានជីវភាពមធ្យមកំពុងកើនឡើង។
ក្រុមហ៊ុននេះបានបញ្ជាក់ក្នុងសេចក្តីថ្លែងការណ៍មួយថា៖ «ក្រុមហ៊ុនរំពឹងថានឹងប្រើប្រាស់មូលនិធិនេះដើម្បីកសាងបច្ចេកវិទ្យានិងហេដ្ឋារចនាសម្ព័ន្ធដែលផ្តល់អត្ថប្រយោជន៍ដល់អាជីវកម្មក្នុងស្រុកធ្វើឲ្យក្រុមហ៊ុនរីកចម្រើន»។
ចំនួនអ្នកប្រើប្រាស់អុីនធឺណិតអាចមានប្រមាណ ៤៨០ លាននាក់ក្នុងឆ្នាំ ២០២០ នៅអាស៊ាន៕ AFP/NS
