ក្រុងញូវយ៉កៈ ក្រុមហ៊ុន Verizon បានប្រកាសកាលពីថ្ងៃអង្គារថា ខ្លួននឹងកាត់បន្ថយតម្លៃទ្រព្យសកម្មចំនួន ៤,៦ ពាន់លានដុល្លារពីទ្រព្យសកម្មដែលបានទិញពីក្រុមហ៊ុន Yahoo ដោយសារតែប្រតិបត្តិការមិនល្អ។
ក្រុមហ៊ុន Verizon ធ្លាប់បានលើកឡើងថា ការរួមបញ្ចូលគ្នានូវក្រុមហ៊ុន Yahoo Finance និងក្រុមហ៊ុន Yahoo Mail ជាមួយក្រុមហ៊ុន HuffPost និងទ្រព្យសកម្មផ្សេងទៀតរបស់ក្រុមហ៊ុន AOL នឹងទាក់ទាញក្រុមហ៊ុនផ្សព្វផ្សាយពាណិជ្ជកម្ម និងបង្កើនតម្លៃក្រុមហ៊ុន។
ប៉ុន្តែជំនួសមកវិញ ទ្រព្យសកម្មដែលត្រូវបានរួមបញ្ចូលទៅក្នុងក្រុមហ៊ុនមួយឈ្មោះថា «Oath» «បានជួបប្រទះការប្រកួតប្រជែង និងសម្ពាធទីផ្សារកាន់តែខ្លាំងពេញមួយឆ្នាំ ២០១៨ ដែលបានបណ្ដាលឲ្យមានប្រាក់ចំណូល និងប្រាក់ចំណេញទាបជាងការរំពឹងទុក»។ នេះបើយោងតាមការឲ្យដឹងពីក្រុមហ៊ុនទូរគមនាគមន៍អាមេរិកមួយនេះតាមរយៈឯកសារមួយដែលផ្ញើទៅកាន់ផ្សារហ៊ុន។
សម្ពាធប្រកួតប្រជែង ដែលក្រុមហ៊ុន Oath បានប្រឈម «ត្រូវបានរំពឹងថានឹងបន្ត និងបានបណ្ដាលឲ្យមានការបាត់បង់ចំណែកទីផ្សារទៅឲ្យក្រុមហ៊ុនដៃគូប្រកួតប្រជែងរបស់យើង នៅក្នុងការផ្សព្វផ្សាយពាណិជ្ជកម្មឌីជីថល»។
ជាលទ្ធផល ក្រុមហ៊ុន Verizon បានឲ្យដឹងថា «តម្លៃទីផ្សារ» របស់ទ្រព្យសកម្មដែលបានទិញកាលពីឆ្នាំ ២០១៧ ចាំបាច់ត្រូវបានកាត់បន្ថយចំនួន ៤,៦ ពាន់លានដុល្លារ។
ការបង្ហាញនេះ ធ្វើឡើងបន្ទាប់ពីក្រុមហ៊ុនមួយនេះបានប្រកាសថា បុគ្គលិកចំនួន ១០,៤០០ នាក់ នឹងចាកចេញពីក្រុមហ៊ុននៅដើមឆ្នាំក្រោយ ក្នុងកម្មវិធីជម្រុះបុគ្គលិកដោយស្ម័គ្រចិត្តមួយ ខណៈដែលក្រុមហ៊ុន Verizon រៀបចំឡើងវិញនូវតួនាទីរបស់ខ្លួន សម្រាប់ការចេញលក់ទូរស័ព្ទមានសេវា 5G ថ្មី។
ក្រុមហ៊ុនទូរគមនាគមន៍មួយបានឲ្យដឹងថា ខ្លួននឹងចំណាយប្រហែលពី ១,៨ ពាន់លានដុល្លារទៅ ២,១ ពាន់លានដុល្លារ ដើម្បីរ៉ាប់រងលើការចំណាយសម្រាប់ប្រាក់បំណាច់ ដែលរួមមានទាំងប្រាក់ខែរហូតដល់ ៦០ ខែ។
ក្រុមហ៊ុន Verizon គ្រោងនឹងចំណាយបន្ថែមទៀតចំនួន ២,១ ពាន់លានដុល្លារ សម្រាប់ការរៀបចំឡើងវិញនៃស្ថាប័នច្បាប់របស់ខ្លួន ដែលជាប់ទាក់ទងនឹងអាជីវកម្មបណ្តាញអ៊ីនធឺណិតឥតខ្សែ។
តម្លៃភាគហ៊ុនរបស់ក្រុមហ៊ុន Verizon បានកើនឡើង ០,៩ ភាគរយដល់ ៥៨,៨២ ដុល្លារនៅក្នុងការជួញដូរពេលថ្ងៃត្រង់នៅផ្សារហ៊ុនអាមេរិក៕ AFP/LA