.jpg)
ក្រុមហ៊ុន Sears ដែលបានប្រតិបត្តិការតាំងពីឆ្នាំ 1886 ដែលបានដាក់ពាក្យបណ្តឹងសម្រាប់ការក្ស័យធន។ AFP
ក្រុងវ៉ាស៊ីនតោនៈ ក្រុមហ៊ុន Sears ជាក្រុមហ៊ុនធ្លាប់គ្រប់គ្រងវិស័យលក់រាយឈានមុខគេរបស់អាមេរិក ប៉ុន្តែបានធ្លាក់ចុះចាប់តាំងពីការមកដល់នៃសម័យ Amazon បានដាក់ពាក្យសុំក្ស័យធនកាលពីថ្ងៃចន្ទនិងបានប្រកាសថា ខ្លួនបានបិទហាងលក់រាយជិត ១៥០ ហាង។
បង្កើតឡើងចាប់តាំងពីឆ្នាំ ១៨៨៦ ក្រុមហ៊ុននេះគឺជាអ្នកត្រួសត្រាយផ្លូវនៃហាងលក់រាយធំៗ ដែលបានបម្រើមនុស្សគ្រប់គ្នា ហើយពាក់កណ្ដាលសតវត្សរ៍ទី ២០ ក្រុមហ៊ុននេះបានកសាងចក្រភពលក់រាយដ៏ធំមួយ ដែលលាតសន្ធឹងទូទាំងអាមេរិកខាងជើង។
ប៉ុន្តែក្រុមហ៊ុននេះបានបិទហាងលក់រាប់រយក្នុងរយៈពេលជាច្រើនឆ្នាំថ្មីៗនេះ ដោយសារតែការធ្លាក់ចុះការលក់រាយ ដែលមួយផ្នែកដោយការកើតឡើងក្រុមហ៊ុន Amazon និងក្រុមហ៊ុនពាណិជ្ជកម្មអេឡិចត្រូនិកផ្សេងទៀត។
សេចក្ដីប្រកាសព័ត៌មានមួយដោយក្រុមហ៊ុន Sears Holdings Corporation បានឲ្យដឹងថា៖ «ក្រុមហ៊ុននេះ និងក្រុមហ៊ុនបុត្រសម្ព័ន្ធមួយចំនួនរបស់ខ្លួនបានដាក់ញត្តិដោយស្ម័គ្រចិត្ត សម្រាប់ជំនួយស្ថិតក្រោមជំពូក ១១ នៃច្បាប់ក្ស័យធននៅតុលាការក្ស័យធនអាមេរិកភាគខាងត្បូងនៃទីក្រុងញូវយ៉ក»។
ក្រុមហ៊ុន Sears កំពុងលង់ខ្លួនដោយសារបំណុល ហើយតាមការរាយការណ៍មិនអាចសងប្រាក់ ១៣៤ លានដុល្លារ ដែលបានកំណត់ពេលនៅថ្ងៃចន្ទ។
លោក Edward S. Lampert ប្រធាន Sears Holdings បានឲ្យដឹងថា ការដាក់ពាក្យសុំក្ស័យធន នឹងផ្ដល់ដល់ក្រុមហ៊ុននេះនូវ «ភាពអាចបត់បែនបាន ដើម្បីពង្រឹងតារាងតុល្យភាពរបស់ខ្លួន» និងអាចឲ្យក្រុមហ៊ុននេះពន្លឿនការផ្លាស់ប្តូរយុទ្ធសាស្ដ្រ។
ក្រុមហ៊ុននេះឲ្យដឹងថា ខ្លួនមានបំណងក្នុងការរៀបចំឡើងវិញនូវរចនាសម្ព័ន្ធហាងកាន់តែតូច ដែលជាយុទ្ធសាស្ដ្រមួយដែលក្រុមហ៊ុននេះបានឲ្យដឹងថា នឹងជួយសង្គ្រោះការងារបានរាប់សែន៕ AFP/LA
