.jpg)
មានក្រុមហ៊ុន ១៤ ភាគរយ បានត្អូញត្អែរអំពីភាពស្មុគស្មាញផ្សេងទៀតដោយសារតែការបង្កើនការត្រួតពិនិត្យការិយាធិបតេយ្យ និងការត្រួតពិនិត្យបទប្បញ្ញត្តិ។ AFP
ប៉េកាំងៈ ការអង្កេតមួយបានបង្ហាញកាលថ្ងៃពុធថា ក្រុមហ៊ុនអាមេរិកភាគច្រើននៅក្នុងប្រទេស ចិន កំពុងរងផលប៉ះពាល់ដោយសារសង្គ្រាមពាណិជ្ជកម្មរវាងប្រទេសទាំង ២ ដែលបង្ខំឲ្យក្រុមហ៊ុនមួយចំនួនត្រូវរកទីតាំងថ្មីនៅបរទេស ឬផ្ដោតជាថ្មីលើអាជីវកម្មរបស់ពួកគេ។
ការស្ទង់មតិថ្មីៗដោយសភាពាណិជ្ជកម្មអាមេរិកប្រចាំនៅប្រទេស ចិន និងអង្គការសម្ព័ន្ធមិត្តរបស់ខ្លួននៅទីក្រុងស៊ាងហៃ ពណ៌នាស្ថានការណ៍មិនច្បាស់លាស់មួយនៃបរិយាកាសអាជីវកម្មសម្រាប់ក្រុមហ៊ុនអាមេរិកជាច្រើន។
៣ ភាគ ៤ ក្នុងចំណោមក្រុមហ៊ុនឆ្លើយសំណួរចំនួន ២៥០ បានឲ្យដឹងថា ការបង្កើនពន្ធនាំចូលរបស់អាមេរិក និងចិនកំពុងមាន «ផលប៉ះពាល់អវិជ្ជមាន» មួយ លើអាជីវកម្មរបស់ពួកគេ ខណៈការបញ្ជាទិញកំពុងបញ្ចប់ ដោយសារតែការបង្កើនការចំណាយការផលិត និងតម្លៃ។
ជិតពាក់កណ្ដាលបានឲ្យដឹងថា ពួកគេបានជួបប្រទះវិធានការសងសឹកដែលមិនមែនពន្ធនាំចូលក្នុងប្រទេស ចិន ចាប់តាំងពីឆ្នាំមុន ហើយក្នុងនោះមួយក្នុងចំណោម ៥ រាយការណ៍ពីការបង្កើនការត្រួតពិនិត្យ និងប្រឈមនឹងការប្រើប្រាស់ពេលវេលាការជម្រះពន្ធគយកាន់តែយឺត។
មានក្រុមហ៊ុន ១៤ ភាគរយ បានត្អូញត្អែរអំពីភាពស្មុគស្មាញផ្សេងទៀតដោយសារតែការបង្កើនការត្រួតពិនិត្យការិយាធិបតេយ្យ និងការត្រួតពិនិត្យបទប្បញ្ញត្តិ។
រហូតមកដល់ពេលនេះអាមេរិក និងចិន បានយកពន្ធនាំចូលទៅវិញទៅមកលើពាណិជ្ជកម្មទ្វេភាគីមានតម្លៃជាង ៣៦០ ពាន់លានដុល្លារ។
ការស្ទង់មតិនេះត្រូវបានធ្វើឡើងចាប់ពីថ្ងៃទី ១៦ ខែ ឧសភា ដល់ថ្ងៃទី ២០ ខែ ឧសភា ជាច្រើនថ្ងៃបន្ទាប់ពីអាមេរិកបង្កើនពន្ធនាំចូលជាង ២ ដង លើទំនិញរបស់ប្រទេស ចិន ដែលមានតម្លៃ ២០០ ពាន់លានដុល្លារ ហើយទីក្រុងប៉េកាំងបានសងសឹកដោយពន្ធនាំចូលកាន់តែខ្ពស់លើផលិតផលរបស់អាមេរិកដែលមានតម្លៃ ៦០ ពាន់លានដុល្លារ។
ការស្ទង់មតិនេះបានបង្ហាញថា ៣៥ ភាគរយ នៃក្រុមហ៊ុនទាំងនេះនឹងទទួលយកយុទ្ធសាស្ដ្រ «នៅក្នុងប្រទេស ចិន សម្រាប់ប្រទេស ចិន» ដែលមានប្រភពនៅក្នុងប្រទេស ចិន និងការកំណត់ទិសដៅទីផ្សារក្នុងស្រុក។
ប៉ុន្តែជាង ៤០ ភាគរយ បានឲ្យដឹងថា ពួកគេ «កំពុងពិចារណា ឬបានរកទីតាំងថ្មី» រោងចក្រផលិតនៅក្រៅប្រទេស ចិន ជាមួយនឹងប្រទេស ម៉ិកស៊ិក និងអាស៊ីខាងត្បូងជាជម្រើសពេញចិត្តជាងគេសម្រាប់ការផលិត។
ក្រុមហ៊ុនតិចជាង ៦ ភាគរយ បានឲ្យដឹងថា ពួកគេបានផ្លាស់ប្តូរ ឬកំពុងពិចារណាការផ្លាស់ប្តូររោងចក្ររបស់ពួកគេទៅអាមេរិក។
លោក ត្រាំ បានចាប់ផ្ដើមសង្គ្រាមពាណិជ្ជកម្មកាលពីឆ្នាំមុន ដើម្បីទាញយកការកែទម្រង់សេដ្ឋកិច្ចកាន់តែស៊ីជម្រៅពីទីក្រុងប៉េកាំងដែលចោទប្រកាន់ប្រទេស ចិន ពីបទព្យាយាមត្រួតត្រាឧស្សាហកម្មពិភពលោក តាមរយៈអន្តរាគមន៍របស់រដ្ឋដ៏ធំនៅក្នុងទីផ្សារ និងចោរកម្មបច្ចេកវិទ្យាអាមេរិក។
ទោះបីជាការរងផលប៉ះពាល់នេះក៏ដោយ ក៏ជាងពាក់កណ្ដាលនៃអ្នកឆ្លើយសំណួរបានឲ្យដឹងថា ពួកគេគាំទ្រការចរចាពាណិជ្ជកម្មដើម្បីដោះស្រាយ «បញ្ហារចនាសម្ព័ន្ធ ដែលអាចឲ្យពួកគេប្រតិបត្តិការលើកម្រិតស្មើភាពគ្នាកាន់តែខ្លាំងឡើង»។
បន្ទាប់ពីការចរចាបានបញ្ចប់នៅទីក្រុងវ៉ាស៊ីនតោននៅខែនេះ លោក Liu He អ្នកចរចាពាណិជ្ជកម្មជាន់ខ្ពស់របស់ប្រទេស ចិន បានឲ្យដឹងថា ជុំផ្សេងទៀតនឹងធ្វើឡើងនៅទីក្រុងប៉េកាំង ប៉ុន្តែភាគីទាំង ២ មិនបានប្រកាសកាលបរិច្ឆេទនោះទេ។
លោក ត្រាំ បានទុកទ្វារចំហសម្រាប់ការសម្រុះសម្រួល ដោយលើកឡើងថា លោករំពឹងថា នឹងមានកិច្ចប្រជុំ «ប្រកបដោយផ្លែផ្កា» មួយនៅខែក្រោយ ជាមួយលោក ស៊ី ជីនភីងសមភាគីចិនរបស់លោកនៅក្នុងកិច្ចប្រជុំកំពូលក្រុមប្រទេស G20 នៅក្នុងប្រទេស ជប៉ុន៕ AFP/LA
