ក្រុងប៉េកាំងៈ ការអង្កេតពាណិជ្ជកម្មមួយបានបង្ហាញកាលពីថ្ងៃចន្ទថា ក្រុមហ៊ុនអឺរ៉ុប «ត្រូវបានជាប់ពាក់ព័ន្ធ» ក្នុងសង្គ្រាមពាណិជ្ជកម្មរវាងអាមេរិក និងចិន ហើយមានក្រុមហ៊ុនតិចតួចប៉ុណ្ណោះដែលមានសុទិដ្ឋិនិយមអំពីអនាគតរបស់ពួកគេក្នុងសេដ្ឋកិច្ចឈានមុខគេទី២ របស់ពិភពលោកមួយនេះ។
ការប៉ះទង្គិចគ្នារវាងទីក្រុងប៉េកាំង និងទីក្រុងវ៉ាស៊ីនតោន មិនបានផ្ដល់នូវផលប្រយោជន៍ដល់ក្រុមហ៊ុនអឺរ៉ុបនោះទេ ផ្ទុយពីអ្វីដែលមនុស្សមួយចំនួនធ្លាប់សង្ឃឹមនៅពេលចាប់ផ្ដើមដំបូងនៃជម្លោះនេះកាលពីឆ្នាំមុន។ នេះបើតាមសភាពាណិជ្ជកម្មអឺរ៉ុបប្រចាំប្រទេស ចិន។
លោកស្រី Charlotte Roule អនុប្រធានសភាពាណិជ្ជកម្មបានថ្លែងថា៖ «នៅពេលនេះភាពតានតឹងផ្នែកពាណិជ្ជកម្មត្រូវបានមើលឃើញថា ជាភាពមិនច្បាស់លាស់ផ្សេងទៀតលើបរិយាកាសពាណិជ្ជកម្ម ហើយជាអ្វីដែលនឹងមិនត្រូវបានដោះស្រាយភ្លាមៗទេ ទោះបីមានកិច្ចព្រមព្រៀងឬអត់ក៏ដោយ»។ លោកស្រីថ្លែងថា៖ «សមាជិករបស់យើងឲ្យដឹងថា ភាពតានតឹងផ្នែកពាណិជ្ជកម្ម មិនល្អសម្រាប់ក្រុមហ៊ុននោះទេ»។
ការអង្កេតនេះ ក៏បង្ហាញថា សង្គ្រាមពាណិជ្ជកម្ម គឺជាការបារម្ភមួយដ៏ធំសម្រាប់ក្រុមហ៊ុនអឺរ៉ុប នៅប្រទេស ចិន ដែលមាន ២៣ ភាគរយ បន្ទាប់ពីការធ្លាក់ចុះសេដ្ឋកិច្ចរបស់ចិន មានការបារម្ភ ៤៥ ភាគរយ បញ្ហាសេដ្ឋកិច្ចពិភពលោកមាន ២៧ ភាគរយ និងការចំណាយលើកម្លាំងពលកម្មដែលកើនឡើងក្នុងប្រទេស ចិន មាន ២៣ ភាគរយ។
ការសិក្សាដែលទទួលបានការឆ្លើយតបពីក្រុមហ៊ុនចំនួន ៥៨៥ ត្រូវបានធ្វើឡើងកាលពីខែមករា ខណៈភាពតានតឹងផ្នែកពាណិជ្ជកម្មអន្តរប៉ាស៊ីហ្វិកបានធូរស្រាល។
ភាពតានតឹងបានកើនឡើងជាថ្មីម្ដងទៀតកាលពីដើមខែឧសភា រវាងអាមេរិក និងចិន ដែលបង្កើនការហូតពន្ធនាំចូលកាន់តែច្រើនទៅវិញទៅមក។
ប៉ុន្តែកាលពីដើមឆ្នាំ ២០១៩ នេះ ១ ភាគ ៤ នៃក្រុមហ៊ុនអឺរ៉ុប នៅប្រទេស ចិន បានឲ្យដឹងថា ពួកគេកំពុងទទួលរងផលប៉ះពាល់រួចហើយ ដោយសារការបង្កើនពន្ធនាំចូលរបស់អាមេរិកលើផលិតផលពីប្រទេស ចិន។
ក្រុមហ៊ុនរបស់អឺរ៉ុបជាច្រើន ផលិតផលិតផលក្នុងប្រទេស ចិន និងនាំចេញផលិតផលទាំងនោះទៅជុំវិញពិភពលោក។
ចំនួនបន្តិចបន្តួច (៦ ភាគរយ) បានរកទីតាំងថ្មីរួចហើយ ដើម្បីចៀសផុតពីការពិន័យរបស់អាមេរិក ឬក៏ពួកគេកំពុងគ្រោងនឹងធ្វើដូច្នេះនៅកន្លែងណាមួយនៅអាស៊ីឬអឺរ៉ុប។
ប៉ុន្តែក្រុមហ៊ុនអឺរ៉ុប ឲ្យដឹងថា ពួកគេបានចែករំលែកការបារម្ភ ដែលបានលើកឡើងដោយរដ្ឋបាលលោក ដូណាល់ ត្រាំ ក្នុងយុទ្ធនាការរបស់ខ្លួនប្រឆាំងនឹងទីក្រុងប៉េកាំង។
លោកស្រី Roule ថ្លែងថា៖ «បញ្ហាដ៏សំខាន់ ដែលជំរុញឲ្យមានសង្គ្រាមពាណិជ្ជកម្ម ចាំបាច់ត្រូវដោះស្រាយតាមរយៈការដោះស្រាយរបាំងចូលទីផ្សារ និងបញ្ហាប្រឈមបទប្បញ្ញត្តិនានា ដែលដោះស្រាយកំណែទម្រង់សហគ្រាសរដ្ឋ និងការផ្ទេរបច្ចេកវិទ្យាដោយបង្ខំ»។
ប្រហែល ២០ ភាគរយ ក្នុងចំណោមក្រុមហ៊ុនដែលបានអង្កេតបានត្អូញត្អែរអំពីការបង្ខំពីការផ្ទេរបច្ចេកវិទ្យាសម្រាប់អត្ថប្រយោជន៍នៃដៃគូរបស់ចិន ដែលបង្កើនតួលេខ ២ ដងកាលពីឆ្នាំទៅ៕ AFP/LA