សានស៊ីៈ រដ្ឋាភិបាលខេត្ត Shaanxi របស់ប្រទេស ចិន សង្ឃឹមថា នឹងមើលឃើញកិច្ចសហប្រតិបត្តិការកាន់តែច្រើនជាមួយប្រទេស កម្ពុជា ទាក់ទងនឹងពាណិជ្ជកម្ម និងការវិនិយោគ។ នេះបើយោងតាមលោក Zhang Xiaodong អនុប្រធានអង្គភាពព័ត៌មាននៃការិយាល័យកិច្ចការបរទេសរបស់ខេត្ត Shaanxi កាលពីថ្ងៃសុក្រសប្តាហ៍មុន។
ការរំពឹងទុកនេះកើតឡើង ខណៈប្រទេស កម្ពុជា បានបង្កើតការិយាល័យតំណាងអាជីវកម្មនៅក្នុងខេត្តនេះ។
មន្ដ្រីកម្ពុជាជាង ១០០ នាក់ បានចូលរួមនៅក្នុងពិព័រណ៍ផ្លូវសូត្រនៅក្នុងខេត្ត Shaanxi ដែលមានចំនួនប្រជាជន ៣៨ លាននាក់។
លោក Shi Zhijung អនុប្រធានអង្គភាពពាណិជ្ជកម្មខេត្ត Shaanxi បានឲ្យដឹងថា រដ្ឋាភិបាលខេត្ត Shaanxi ចាំបាច់ត្រូវរៀបចំព្រឹត្តិការណ៍សេដ្ឋកិច្ច និងពាណិជ្ជកម្មកាន់តែច្រើន ដើម្បីជួយក្រុមហ៊ុនចិន យល់ដឹងអំពីច្បាប់វិនិយោគរបស់ប្រទេស កម្ពុជា។
លោកថ្លែងថា៖ «យើងចាំបាច់ត្រូវធ្វើទស្សនកិច្ចជាញឹកញាប់រវាងមន្រ្ដីជាន់ខ្ពស់របស់ខេត្ត Shaanxi និងប្រទេស កម្ពុជា ដើម្បីលើកកម្ពស់ការផ្លាស់ប្តូរ [បទពិសោធ] និងកិច្ចសហប្រតិបត្តិការ»។
លោក Shi Zhijung ឲ្យដឹងថា ការផ្ដោតលើអាស៊ីកណ្ដាល អាស៊ីអាគ្នេយ៍ អឺរ៉ុបកណ្ដាល និងអឺរ៉ុបខាងកើត ខេត្ត Shaanxi នឹងបង្កើតយន្តការផ្លាស់ប្តូរ ដើម្បីគាំទ្រសហគ្រាសក្នុងការធ្វើកិច្ចសហប្រតិបត្តិការពាណិជ្ជកម្មពហុភាគី និងទ្វេភាគី ស្វែងរកព័ត៌មានការវិនិយោគ និងពង្រីកគម្រោងទីផ្សារកិច្ចសន្យា។
លោកស្រី Ying Fan សាស្រ្តាចារ្យផ្នែកសេដ្ឋកិច្ចអន្តរជាតិ នៅសាកលវិទ្យាល័យកិច្ចការបរទេសរបស់ប្រទេស ចិន បានឲ្យដឹងថា ប្រទេស កម្ពុជា គឺជាដៃគូដ៏សំខាន់មួយសម្រាប់គំនិតផ្តួចផ្ដើមខ្សែក្រវាត់ និងផ្លូវរបស់ប្រទេស ចិន។ លោកស្រីថ្លែងថា៖«ប្រទេស ចិន ចង់ធ្វើទំនាក់ទំនងល្អជាមួយប្រទេសផ្សេងៗលើពិភពលោក នេះជាជាតិសាសន៍ និងបុគ្គលិកលក្ខណៈនៃប្រជាជនរបស់ប្រទេស ចិន»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៅរាជបណ្ឌិត្យសភាកម្ពុជា បានឲ្យដឹង កាលពីសប្ដាហ៍មុនថា ខណៈប្រទេស ចិន មានឥទ្ធិពលភូមិសាស្ដ្រនយោបាយដ៏រឹងមាំនៅក្នុងតំបន់ និងពិភពលោក ប្រទេសនេះក៏ប្រឈមនឹងការរិះគន់យ៉ាងខ្លាំងដោយ «អន្ទាក់បំណុល» ផងដែរ។
លោកលើកឡើងថា៖ «ប្រសិនបើកិច្ចសហប្រតិបត្តិការរបស់ប្រទេស ចិន ជាមួយកម្ពុជា មិនធ្វើឲ្យប្រទេស កម្ពុជា រីកចម្រើន វានឹងមិនក្លាយជាឧទាហរណ៍សម្រាប់បណ្ដាប្រទេសផ្សេងទៀតនោះទេ»។
លោកបន្ថែមថា បណ្ដាប្រទេសជាច្រើនដូចជា ស្រីលង្កា និងប្រទេសមួយចំនួននៅអាហ្វ្រិកត្រូវចាត់ទុកជាប្រទេសដែលបានធ្លាក់ចូលក្នុងអន្ទាក់បំណុលរបស់ប្រទេស ចិន។
ក្នុងអំឡុងទស្សនកិច្ចនៅក្នុងប្រទេស ចិន កាលពីថ្ងៃទី ៣០ ខែ ឧសភា លោក ប្រាក់ សុខុន រដ្ឋមន្ដ្រីក្រសួងការបរទេសកម្ពុជា និងលោក Wang Yi ទីប្រឹក្សារដ្ឋរបស់ប្រទេស ចិន បានសន្យាថា ប្រទេសទាំង ២ នឹងធ្វើកិច្ចខិតខំប្រឹងប្រែងដើម្បីធ្វើឲ្យគំនិតផ្ដួចផ្ដើមខ្សែក្រវាត់ និងផ្លូវក្លាយជាគំរូប្រកបដោយជោគជ័យ។
លោក ប្រាក់ សុខុន ឲ្យដឹងថា ប្រទេស ចិន នឹងព្យាយាមជំរុញឲ្យក្រុមហ៊ុនចិនមកវិនិយោគកាន់តែច្រើននៅកម្ពុជា ហើយក៏ពង្រីកចំណែកទីផ្សារចិនសម្រាប់ផលិតផលកម្ពុជាផងដែរ៕LA