ក្រុងប៉េកាំងៈ ប្រទេស ចិន បាន ប្រតិកម្មតបតដោយខឹងសម្បាកាលពីថ្ងៃព្រហស្បតិ៍ បន្ទាប់ពីមន្ត្រីប្រតិបត្តិជាន់ខ្ពស់ ១ រូប និងជាកូនស្រីរបស់ស្ថាបនិកក្រុមហ៊ុន ទូរគមនាគមន៍ចិន Huawei ត្រូវបានចាប់ខ្លួននៅប្រទេស កាណាដា បន្ទាប់ពីអាមេរិកស្នើឲ្យធ្វើបត្យាប័ន ដែលគំរាមដល់សន្តិភាពនៃសង្គ្រាមពាណិជ្ជកម្មជាមួយអាមេរិក។
ការឃុំខ្លួនលោកស្រី Meng Wanzhou ប្រធានផ្នែកហិរញ្ញវត្ថុរបស់ក្រុមហ៊ុន Huawei ធ្វើឡើងបន្ទាប់ពីមានសេចក្តីរាយការណ៍ថា អាជ្ញាធរអាមេរិកបានដំណើរការស៊ើបអង្កេតមួយលើការរំលោភការដាក់ទណ្ឌកម្មទៅលើអីុរ៉ង់ដែលរងការសង្ស័យដោយក្រុមហ៊ុន Huawei ដែលកំពុងស្ថិតក្រោមការត្រួតពិនិត្យរួចទៅហើយដោយមន្ដ្រីចារកម្មរបស់អាមេរិក ដែលបានចាត់ទុកក្រុមហ៊ុននេះជាការគំរាមកំហែងដល់សន្ដិសុខជាតិ។
ការចាប់ខ្លួននេះបានបណ្ដាលឲ្យមានភាពតានតឹង ខណៈដែលអាមេរិក និងចិន បានយល់ព្រមបញ្ឈប់ជម្លោះពាណិជ្ជកម្មរបស់ពួកគេ ស្របពេលក្រុមចរចាស្វែងរកកិច្ចព្រមព្រៀងមួយក្នុងរយៈពេល ៣ ខែខាងមុខ។
លោក Geng Shuang អ្នកនាំពាក្យក្រសួងការបរទេសចិនបានថ្លែងក្នុងសន្និសីទប្រចាំមួយរបស់ក្រសួងនៅទីក្រុងប៉េកាំងថា៖ «យើងបានតវ៉ាទៅកាន់ប្រទេស កាណាដា និងអាមេរិក ដោយទាមទាឲ្យប្រទេសទាំង ២ បញ្ជាក់ភ្លាមៗនូវហេតុផលនៃការឃុំខ្លួននេះ និងដោះលែងអ្នកជាប់ឃុំភ្លាមៗ ដើម្បីការពារសិទ្ធិស្របច្បាប់របស់បុគ្គល»។
ក្រសួងយុត្តិធម៌របស់ប្រទេស កាណាដា បានឲ្យដឹងក្នុងសេចក្ដីប្រកាសព័ត៌មានមួយថា លោកស្រី Meng ត្រូវបានចាប់ខ្លួននៅភាគខាងលិចទីក្រុងវ៉ានខូវើកាលពីថ្ងៃទី ១ ខែធ្នូ ដែលជំរុញឲ្យស្ថានទូតចិនប្រចាំប្រទេស កាណាដា មានប្រតិកម្មភ្លាមៗ។
ក្រសួងយុត្តិធម៌កាណាដាបានឲ្យដឹងថា អាមេរិកកំពុងស្វែងរកការធ្វើបត្យាប័នរបស់លោកស្រី ហើយលោកស្រីប្រឈមនឹងសវនាការសុំនៅក្រៅឃុំនៅថ្ងៃសុក្រ។ ក្រសួងបានបន្ថែមថា ខ្លួនមិនអាចផ្ដល់ព័ត៌មានលម្អិតបន្ថែមទៅតាមការទាមទាររបស់លោកស្រី Meng ទេ ដោយសារតែការហាមឃាត់ការថ្លែងទៅកាន់សាធារណៈ។
ឪពុករបស់លោកស្រី គឺលោក Ren Zhengfei ដែលជាស្ថាបនិកក្រុមហ៊ុន Huawei គឺជាអតីតវិស្វកររបស់កងទ័ពរំដោះប្រជាជនចិន។
លោក Ben Sasse ព្រឹទ្ធសមាជិកអាមេរិក បានឲ្យដឹងនៅក្នុងសេចក្ដីប្រកាសព័ត៌មានមួយដែលភ្ជាប់នឹងការចាប់ខ្លួននេះទៅកាន់ទណ្ឌកម្មរបស់អាមេរិកប្រឆាំងនឹងប្រទេស អុីរ៉ង់ ថា៖ «ប្រទេស ចិន កំពុងធ្វើការងារប្រកបដោយភាពច្នៃប្រឌិត ដើម្បីបំផ្លាញផលប្រយោជន៍សន្ដិសុខជាតិរបស់យើង»។
លោកថ្លែងថា៖ «ជួនកាលការបំពានរបស់ប្រទេស ចិន ច្បាស់ណាស់ត្រូវបានគាំទ្រដោយរដ្ឋ ហើយជួនកាលត្រូវបានធ្វើឡើងតាមរយៈសហគ្រាសវិស័យ «ឯកជន» ជាច្រើនរបស់ទីក្រុងប៉េកាំង ដែលមានទំនាក់ទំនងយ៉ាងជិតស្និទ្ធជាមួយនឹងបក្សកុម្មុយនីស្ដរបស់លោកប្រធានាធិបតី ស៊ី ជីនភីង»។
ការចាប់ខ្លួននេះបានធ្វើឡើងនៅថ្ងៃតែមួយ ដែលលោកប្រធានាធិបតីអាមេរិក ដូណាល់ ត្រាំ និងលោក ស៊ី បានព្រមព្រៀងបញ្ឈប់សង្គ្រាមពាណិជ្ជកម្មនៅក្នុងកិច្ចប្រជុំកំពូលនៅក្នុងប្រទេស អាហ្សង់ទីន។
ស្ថានទូតប្រទេស ចិន ប្រចាំនៅទីក្រុងអូតាវ៉ា បានទាមទារឲ្យដោះលែងលោកស្រី Meng។
ស្ថានទូតបានឲ្យដឹងនៅក្នុងសេចក្ដីប្រកាសព័ត៌មានមួយថា៖«ភាគីប្រទេស ចិន ជំទាស់យ៉ាងដាច់អហង្ការ និងតវ៉ាយ៉ាងខ្លាំងទៅនឹងវិធានការដូចនោះ ដែលបានធ្វើឲ្យប៉ះពាល់យ៉ាង ធ្ងន់ធ្ងរដល់សិទ្ធិមនុស្សរបស់ជនរងគ្រោះ»៕ AFP/LA