.jpg)
លោក Wang Shouwen អនុរដ្ឋមន្ត្រីក្រសួងពាណិជ្ជកម្មចិន (ស្ដាំ)។ AFP
ក្រុងប៉េកាំងៈ ប្រទេស ចិន គាំទ្រដល់កំណែទម្រង់ដែលចាំបាច់នានានៅអង្គការពាណិជ្ជកម្មពិភពលោក (WTO) ខណៈដែលប្រព័ន្ធពាណិជ្ជកម្មអន្តរជាតិនេះទទួលរងផលប៉ះពាល់ធ្ងន់ធ្ងរ។
លោក Wang Shouwen អនុរដ្ឋមន្ត្រីក្រសួងពាណិជ្ជកម្មចិនបានថ្លែងថា ប្រព័ន្ធពាណិជ្ជកម្មរបស់អង្គការ WTO បច្ចុប្បន្នត្រូវបានប្រឈមដោយគោលនយោបាយឯកតោភាគីនិយម និងកិច្ចគាំពារនិយមផ្នែកពាណិជ្ជកម្ម។
លោកបានថ្លែងថា អង្គការ WTO ទទួលរងការគំរាមកំហែងដោយកត្តា ៣ យ៉ាង ដែលរួមមាន របបដោះស្រាយជម្លោះស្ថិតក្នុងហានិភ័យនៃការជាប់គាំងដោយសារការរារាំងពីសំណាក់សមាជិកមួយចំនួនមិនឲ្យមានការបំពេញកៅអីទំនេររបស់សមាជិកស្ថាប័នឧទ្ធរណ៍របស់អង្គការនេះ សមាជិកមួយចំនួនដែលដំឡើងពន្ធតាមរយៈការរំលោភ ខចែងស្តីពីការលើកលែងដោយសារហេតុផលសន្តិសុខ និងសមាជិកមួយចំនួនដែលជ្រើសយកវិធីសាស្រ្តឯកតោភាគីដែលរំលោភច្បាប់ពហុភាគីរបស់ WTO។
លោកលើកឡើងថា ប្រទេស ចិន គាំទ្រដល់កំណែទម្រង់ដែលចាំបាច់របស់អង្គការ WTO ដើម្បីពង្រឹងអំណាច និងប្រសិទ្ធភាពរបស់អង្គការនេះ។
លោក Wang បានកត់សម្គាល់ថា កំណែទម្រង់របស់អង្គការ WTO គួរដើរតាមគោលការណ៍មូលដ្ឋានចំនួន ៣ ៖ ទី១ កំណែទម្រង់គួរលើកតម្កើងតម្លៃស្នូលរបស់អង្គការស្តីពីការមិនរើសអើង និងបើកចំហ ទី២ ការពារអត្ថប្រយោជន៍អភិវឌ្ឍន៍របស់សមាជិកដែលជាប្រទេសកំពុងអភិវឌ្ឍន៍ និងដោះស្រាយផលវិបាក របស់ប្រទេសទាំងនោះក្នុងការធ្វើសមាហរណកម្មទៅក្នុងសកលភាវូបនីយកម្មសេដ្ឋកិច្ច និងទី៣ ដើរតាមយន្តការធ្វើសេចក្តីសម្រេចដោយការឯកភាពគ្នា៕ The People''s Daily/KC
