ក្រុងប៉េកាំងៈ ប្រទេស ចិន បានឲ្យដឹងកាលពីថ្ងៃពុធថា ខ្លួននឹងជំរុញឆ្ពោះទៅមុខនូវការចរចាពាណិជ្ជកម្មជាមួយអាមេរិកក្នុងរយៈពេល ៩០ ថ្ងៃក្រោយ និងបានប្ដេជ្ញាថា នឹងអនុវត្តយ៉ាងរហ័សនូវបញ្ហាជាក់លាក់ ដែលត្រូវបានព្រមព្រៀងរួចហើយ។
ក្រសួងពាណិជ្ជកម្មចិនបានឲ្យដឹងថា ការចរចារវាងលោកប្រធានាធិបតី ស៊ី ជីនភីង និងលោក ដូណាល់ ត្រាំ កាលពីចុងសប្ដាហ៍មុន «ទទួលបានជោគជ័យ» ហើយក្រសួងមាន «ទំនុកចិត្ត» ចំពោះការអនុវត្តកិច្ចព្រមព្រៀងរបស់មេដឹកនាំទាំង ២ នេះ។
ក្រសួងពាណិជ្ជកម្មបានឲ្យដឹងនៅក្នុងសេចក្ដីប្រកាសព័ត៌មានមួយថា៖ «ក្រុមការងារផ្នែកសេដ្ឋកិច្ច និងពាណិជ្ជកម្មរបស់ភាគីទាំង ២ នឹងជំរុញឆ្ពោះទៅមុខយ៉ាងសកម្មនូវការចរចាក្នុងរយៈពេល ៩០ ថ្ងៃ ស្របជាមួយនឹងកាលបរិច្ឆេទ និងផែនការច្បាស់លាស់មួយ»។
ក្រសួងពាណិជ្ជកម្មបានឲ្យដឹងដោយមិនផ្ដល់ព័ត៌មានលម្អិតបន្ថែមថា៖ «ប្រទេស ចិន នឹងចាប់ផ្ដើមជាមួយនឹងការអនុវត្តនៃបញ្ហាជាក់លាក់ ដែលមានការព្រមព្រៀងគ្នារួចហើយ។ កាន់តែឆាប់ កាន់តែប្រសើរ»។
លោក ត្រាំ និងលោក ស៊ី បានយល់ព្រមគ្នាលើការបញ្ឈប់សង្គ្រាមពាណិជ្ជកម្មនៅក្រៅជំនួបកិច្ចប្រជុំកំពូល G20 នៅប្រទេសអាហ្សង់ទីន កាលពីថ្ងៃសៅរ៍សប្តាហ៍មុន ដែលជួយឲ្យមានការផ្អាកដកហូតពន្ធនាំចូលថ្មី និងផ្ដល់ដល់ក្រុមអ្នកចរចារយៈពេល ៩០ ថ្ងៃដើម្បីសម្រេចបានកិច្ចព្រមព្រៀងមួយ។
សេចក្ដីប្រកាសព័ត៌មានរបស់ក្រសួងពាណិជ្ជកម្មកាលពីថ្ងៃពុធ ជាការទទួលស្គាល់ជាសាធារណៈលើកដំបូងរបស់រដ្ឋាភិបាលចិនអំពីកាលបរិច្ឆេទរយៈពេល ៩០ ថ្ងៃនេះ។
សេតវិមានបានឲ្យដឹងថា ចិនបានព្រមព្រៀងទិញក្នុងបរិមាណដ៏ច្រើននូវផលិតផលកសិកម្ម ថាមពល ឧស្សាហកម្ម និងផលិតផលផ្សេងៗពីអាមេរិក ដើម្បីកាត់បន្ថយឱនភាពពាណិជ្ជកម្ម។ ចិនក៏បានព្រមព្រៀងផងដែរក្នុងការចាប់ផ្តើមទិញផលិតផលពីកសិករអាមេរិក «ភ្លាម»៕ AFP/LA