ក្រុងស៊ាងហៃៈ លោកប្រធានាធិបតីចិន ស៊ី ជីនភីង បានប្តេជ្ញាកាលពីថ្ងៃចន្ទថា នឹងបង្កើនការនាំចូលសរុបរបស់ចិនឲ្យដល់ជាង ៤០ ពាន់ពាន់លានដុល្លារសហរដ្ឋអាមេរិកក្នុងរយៈពេល ១៥ ឆ្នាំក្រោយ ខណៈព្រមានថា ការគាំពារនិយមរបស់អាមេរិក បាន «ធ្វើឲ្យប៉ះពាល់» ដល់ប្រព័ន្ធពាណិជ្ជកម្មសេរីពិភពលោក ចំពេលដែលកើតមានសង្គ្រាមពាណិជ្ជកម្មកាន់តែខ្លាំងឡើងជាមួយទីក្រុងវ៉ាស៊ីនតោន។ នេះយោងតាមទីភ្នាក់ងារព័ត៌មាន KYODO។
ទីភ្នាក់ងារព័ត៌មាន KYODO បានរាយការណ៍ដោយដកស្រង់សម្ដីរបស់លោក ស៊ី ខណៈលោកបានថ្លែងថា៖ «ហានិភ័យ និងបញ្ហាប្រឈម កំពុងកើនឡើង» ដោយសារតែ «កិច្ចគាំពារនិយមពាណិជ្ជកម្មឯកតោភាគីកំពុងកើនឡើង»។
លោកបន្ថែមថា ប្រទេសរបស់លោកចង់យ៉ាងខ្លាំងក្នុងការ «បើកចំហទីផ្សាររបស់ខ្លួនដោយស្ម័គ្រចិត្តដល់ពិភពលោក»។
នៅក្នុងសុន្ទរកថាដ៏សំខាន់មួយក្នុងពិធីបើកដំណើរការពិព័រណ៍នាំចូលអន្តរជាតិចិនលើកដំបូងនេះ លោកលើកឡើងថា កិច្ចគាំពារនិយមនឹង «បណ្ដាលឲ្យមានភាពនៅទ្រឹងផ្នែកពាណិជ្ជកម្ម» និង «ធ្វើឲ្យប៉ះពាល់ដល់សេដ្ឋកិច្ចពិភពលោក» ដោយសារចិន និងអាមេរិក ស្ថិតក្រោមការដឹកនាំរបស់លោកប្រធានាធិបតី ដូណាល់ ត្រាំ បានចាត់វិធានការដកហូតពន្ធគយលើគ្នាទៅវិញទៅមកក្នុងតម្លៃរាប់រយពាន់លានដុល្លារ។
ខណៈឆ្នាំនេះជាខួបទី ៤០ នៃគោលនយោបាយកែទម្រង់ និងការបើកចំហរបស់ប្រទេស ដែលជាមហាអំណាចអាស៊ីមួយនេះ តាមរយៈការរៀបចំពិព័រណ៍ទំនិញនាំចូលនេះ ចិន នឹងព្យាយាមច្រានចោលការរិះគន់ថា ទីផ្សារចិនត្រូវបានបិទ ដោយសារតែថា ទីផ្សារត្រូវបានគ្រប់គ្រងភាគច្រើនដោយរដ្ឋាភិបាល។
ប្រទេស ចិន មើលឃើញពិព័រណ៍នេះថាជាព្រឹត្តិការណ៍ការទូតដ៏សំខាន់បំផុតប្រចាំឆ្នាំនេះ ស្របជាមួយនឹងវេទិកា Boao Forum for Asia និងកិច្ចប្រជុំរបស់អង្គការសហប្រតិបត្តិការស៊ាងហៃ ដែលជាប្លុកសន្ដិសុខដឹកនាំដោយប្រទេស ចិន។
រដ្ឋាភិបាលចិនបានឲ្យដឹងថា ក្រុមហ៊ុនប្រហែល ៣ ៦០០ មកពីប្រទេស និងតំបន់ជាង ១៧០ និងក្រុមហ៊ុនអន្តរជាតិជាច្រើន កំពុងចូលរួមនៅក្នុងពិព័រណ៍នាំចូលកម្រិតជាតិលើកដំបូងរបស់ប្រទេសនេះ។
ក្នុងចំណោមក្រុមហ៊ុនទាំងនេះ ប្រហែលជា ១៨០ ជាក្រុមហ៊ុនអាមេរិកដូចជា ក្រុមហ៊ុន Google LLC និង Microsoft។
ដើម្បីជំរុញការនាំចូល លោក ស៊ី បានសន្យាកាត់បន្ថយពន្ធ និងបន្ធូរបន្ថយបទប្បញ្ញត្តិបន្ថែមទៀតសម្រាប់ក្រុមហ៊ុនបរទេសនៅក្នុងវិស័យមួយចំនួន៕ LA