ក្រុងប៉េកាំងៈ ប្រទេស ចិន នឹងពន្យារការដកហូតពន្ធគយបន្ថែមលើរថយន្ត និងគ្រឿងបន្លាស់ដែលនាំចូលពីអាមេរិកសម្រាប់រយៈពេល ៣ ខែ ដែលជាវិធានការរឹងមាំមួយអនុវត្តទៅតាមការព្រមព្រៀងសម្រេចបានដោយមេដឹកនាំរបស់ប្រទេសទាំង ២ នៅទីក្រុងប៊ុយណូស៊ែរ ប្រទេស អាហ្សង់ទីន ក្នុងខែនេះ។ នេះបើយោងតាមការិយាល័យគណៈកម្មាធិការពន្ធគយរបស់ក្រុមប្រឹក្សារដ្ឋចិន។
វិធាននេះដែលនឹងមានប្រសិទ្ធភាពចាប់ពីថ្ងៃទី ១ ខែមករាដល់ថ្ងៃទី ៣១ ខែមីនា នឹងពន្យារការដកហូតពន្ធគយចំនួន ២៥ ភាគរយលើទំនិញដែលអាចហូតពន្ធបាន ១៤៤ មុខ និងពន្ធគយ ៥ ភាគរយលើទំនិញចំនួន ៦៧ មុខ។
ពន្ធទាំងនេះត្រូវបានដកហូតលើរថយន្ត និងគ្រឿងបន្លាស់រថយន្តដែលផលិតនៅអាមេរិកកាលពីរដូវក្តៅឆ្នាំនេះ។ នេះបើយោងតាមសេចក្តីថ្លែងការណ៍មួយដែលចេញផ្សាយនៅលើគេហទំព័ររបស់ក្រសួងហិរញ្ញវត្ថុចិន។
សេចក្តីថ្លែងការណ៍នេះបានឲ្យដឹងថា វិធានការនេះអាចពង្រីកដល់ការនាំចូលទំនិញមួយចំនួនទៀតដែលចាំបាច់សម្រាប់ទីផ្សារ ព្រមទាំងជួយបំពេញតម្រូវការរបស់គ្រួសារក្នុងប្រទេស ចិន ផងដែរ។
ក្រសួងហិរញ្ញវត្ថុចិនក៏បានឲ្យដឹងផងដែរថា ប្រទេស ចិន និងសហរដ្ឋអាមេរិកអាចពន្លឿនការចរចាដើម្បីជម្រុះចោលពន្ធគយបន្ថែមទាំងអស់ទៅលើទំនិញរបស់ភាគីនីមួយៗ។
នៅឯក្រៅកិច្ចប្រជុំកំពូលរបស់ក្រុមប្រទេស G20 ក្នុងទីក្រុងប៊ុយណូស៊ែរកាលពីថ្ងៃទី ១ ខែធ្នូ លោកប្រធានាធិបតីចិន ស៊ី ជីនភីង និងលោក ដូណាល់ ត្រាំ ដែលសមភាគីអាមេរិករបស់លោក បានព្រមព្រៀងបន្តការចរចាពាណិជ្ជកម្មទ្វេភាគី បញ្ឈប់ការដកហូតពន្ធគយថ្មី និងដោះដូរទស្សនកិច្ចនៅពេលវេលាសមរម្យ។
មេដឹកនាំទាំង ២ បានឯកភាពឲ្យមានការផ្អាកសង្គ្រាមពាណិជ្ជកម្មមួយដែលបានពន្យារពេលការដំឡើងពន្ធគយបន្ថែមរបស់អាមេរិកលើទំនិញចិនដែលមានតម្លៃ ២០០ ពាន់លានដុល្លារដោយចាប់ផ្តើមចាប់ពីថ្ងៃទី ១ ខែមករាទៅ។
លោក Mei Xinyu អ្នកស្រាវជ្រាវប្រចាំវិទ្យាស្ថានកិច្ចសហប្រតិបត្តិការពាណិជ្ជកម្ម និងសេដ្ឋកិច្ចអន្តរជាតិនៃក្រសួងពាណិជ្ជកម្មចិនបានថ្លែងថា វិធានការនេះគឺដើម្បីអនុវត្តតាមការព្រមព្រៀងដែលសម្រេចបានដោយមេដឹកនាំទាំង ២។
លោក Mei បានឲ្យដឹងទៀតថា ប្រទេស ចិន កំពុងអនុវត្តទៅតាមការព្រមព្រៀងនេះ ដើម្បីបង្ហាញទំនុកចិត្តក្នុងការសម្រេចបានលទ្ធផលល្អបន្ទាប់ពីមានការចរចាបន្ថែម។
ចិនបានកាត់បន្ថយពន្ធគយលើរថយន្ត និងគ្រឿងបន្លាស់រថយន្តដែលនាំចូលមួយចំនួនកាលពីថ្ងៃទី ១ ខែកក្កដា ដោយកាត់បន្ថយជាមធ្យម ៤៦ ភាគរយ ដែលជាវិធានការបើកចំហបន្ថែមទៀត និងលើកកម្ពស់ការប្រើប្រាស់ក្នុងស្រុក។
បន្ទាប់ពីការកាត់បន្ថយពន្ធនៅខែកក្កដានេះ ពន្ធគយជាមធ្យមលើរថយន្តមានអត្រា ១៣,៨ ភាគរយ និង ៦ ភាគរយលើគ្រឿងបន្លាស់រថយន្ត។ នេះបើយោងតាមក្រសួងហិរញ្ញវត្ថុចិន៕ People''s Daily/KC