.jpg)
លោក Gao Feng អ្នកនាំពាក្យក្រសួងពាណិជ្ជកម្មចិន៕ រូបថត AFP
ក្រុងប៉េកាំងៈ ប្រទេសចិនបានលុបចោលការចរចាពាណិជ្ជកម្មដែលគ្រោងទុក ជាមួយអាមេរិក និងមិនទំនងជាចរចាជាមួយទីក្រុងវ៉ាស៊ីនតោនទេ រហូតដល់បន្ទាប់ពីការបោះឆ្នោតពាក់កណ្ដាលអាណត្តិរបស់អាមេរិកនៅខែវិច្ឆិកា។ នេះបើយោងតាមទីភ្នាក់ងារព័ត៌មាន Bloomberg ដែលបានដកស្រង់ប្រភពដែលដឹងពីស្ថានការនេះ។
Bloomberg បានរាយការណ៍កាលពីម្សិលមិញថា ការសម្រេចចិត្តលុបចោលក្រុមគណៈប្រតិភូចរចារដែលគ្រោងធ្វើឡើងនៅសប្ដាហ៍នេះ បានកើតមានឡើង ខណៈលោកប្រធានាធិបតី ដូណាល់ ត្រាំ បានផ្ដល់សញ្ញាថា លោកបានត្រៀមខ្លួនរួចជាស្រេចសម្រាប់ផលប៉ះពាល់រយៈពេលខ្លីចំពោះសេដ្ឋកិច្ចអាមេរិក ដោយបង្កើនសង្គ្រាមពាណិជ្ជកម្មដើម្បីស្វែងរកអ្វីដែលលោកមើលឃើញថាជាផលប្រយោជន៍សម្រាប់រយៈពេលវែងពីការចាត់វិធានការលើប្រទេសចិន។
សេតវិមានមិនឆ្លើយតបភ្លាមៗទៅនឹងសេចក្តីសម្រេចចិត្តចុងក្រោយបំផុតរបស់ប្រទេសចិននេះទេ។
ប៉ុន្តែជាច្រើនម៉ោងមុនពេលកាសែត Wall Street Journal បានរាយការណ៍លើកដំបូងថា ទីក្រុងប៉េកាំងបានលុបចោលផែនការបញ្ជូនលោកឧបនាយករដ្ឋមន្ដ្រី Liu He និងក្រុមគណៈប្រតិភូថ្នាក់កណ្ដាលទៅកាន់ទីក្រុងវ៉ាស៊ីនតោននោះ មន្ដ្រីជាន់ខ្ពស់អាមេរិកមួយរូបបានប្រាប់ក្រុមអ្នកយកព័ត៌មានថា លោកប្រធានាធិបតីជឿជាក់ថា ការមិនធ្វើអ្វីលើប្រទេសចិន ទីបំផុតនឹងបណ្ដាលឲ្យសេដ្ឋកិច្ច និងអ្នកប្រើប្រាស់អាមេរិកកាន់តែធ្លាក់ចូលក្នុងស្ថានភាពអាក្រក់ខ្លាំងឡើងៗ។
ប្រភពដដែលនេះឲ្យដឹងថា បន្ថែមលើការដកហូតពន្ធនាំចូលថ្មីលើទំនិញរបស់ប្រទេសចិន ក្នុងតម្លៃ ២០០ ពាន់លានដុល្លារ ដែលនឹងចាប់ផ្ដើមអនុវត្តនៅថ្ងៃចន្ទនេះ ក្រសួងការបរទេសអាមេរិក កាលពីថ្ងៃព្រហស្បតិ៍បានដាក់ទណ្ឌកម្មប្រឆាំងនឹងទីភ្នាក់ងារការពាររបស់ប្រទេសចិន និងនាយករបស់ទីភ្នាក់ងារនេះ ដែលបានរួមចំណែកដល់ការសម្រេចចិត្តចុងក្រោយក្នុងការលុបចោលការចរចានេះ។
លោក Shi Yinhong សាស្ដ្រាចារ្យទទួលបន្ទុកទំនាក់ទំនងអន្តរជាតិនៅសាកលវិទ្យាល័យ Renmin របស់ប្រទេសចិនបានថ្លែងកាលពីថ្ងៃសៅរ៍ថា៖ «វានឹងជាការប្រមាថមួយ បើចិនបន្តការចរចាពាណិជ្ជកម្ម បន្ទាប់ពីអាមេរិកប្រកាសចាត់វិធានការពន្ធនាំចូល និងការដាក់ទណ្ឌកម្មថ្មី»។ លោកបន្តថា៖ «ក្នុងរយៈពេលវែង នឹងមានការចរចាដោយសារតែសង្គ្រាមពាណិជ្ជកម្មនេះ នឹងមិនប្រើពេលវេលារាប់ពាន់ឆ្នាំនោះទេ»។
ក្នុងការជំរុញរបស់លោកសម្រាប់អ្វីដែលលោកហៅថា ការប្រកួតប្រជែងស្នើភាព ក្នុងការទាក់ទងជាមួយប្រទេសចិននោះ លោក ត្រាំ បានហូតពន្ធនាំចូលថ្មីលើការនាំចូលពីប្រទេសចិន និងបានគំរាមកំហែងហូតពន្ធនាំចូលកាន់តែច្រើន ប្រសិនបើទីក្រុងប៉េកាំងសងសឹក។ កាលពីថ្ងៃទី ១៨ ខែសីហា ប្រទេសចិនបានឲ្យដឹងថា ខ្លួននឹងហូតពន្ធលើទំនិញអាមេរិកក្នុងតម្លៃ ៦០ ពាន់លានដុល្លារ ដែលចាប់ផ្ដើមអនុវត្តចាប់ពីថ្ងៃទី ២៤ ខែកញ្ញានេះ។
លោក Gao Feng អ្នកនាំពាក្យក្រសួងពាណិជ្ជកម្មចិន បានឲ្យដឹងកាលពីដើមសប្ដាហ៍នេះថា ពន្ធនាំចូលថ្មីនេះបានបណ្ដាលឲ្យមាន «ភាពមិនច្បាស់លាស់ថ្មី» ចំពោះការចរចារវាងចិន និងអាមរិក។
ឧស្សាហកម្មអាមេរិកបានជំរុញយ៉ាងខ្លាំងឲ្យមានការប្រឆាំងនឹងការប្រើប្រាស់វិធានការពន្ធនាំចូលរបស់រដ្ឋបាលលោក ត្រាំ ដើម្បីបង្ខំការផ្លាស់ប្តូរដល់សេដ្ឋកិច្ចចំពោះសេដ្ឋកិច្ចរបស់ប្រទេសចិន ហើយក្រុមហ៊ុនជាច្រើនចាប់ពីក្រុមហ៊ុន Walmart រហូតដល់ក្រុមហ៊ុន Gap និងក្រុមហ៊ុន Samsonite បានឲ្យដឹងថា ពួកគេបានត្រៀមខ្លួនក្នុងការបង្កើនតម្លៃ ប្រសិនបើពន្ធនាំចូលថ្មីប៉ះពាល់ដល់ពាណិជ្ជកម្មរបស់ពួកគេ៕ LA
