ក្រុងនុសាឌួៈ ប្រធានធនាគារកណ្ដាលរបស់ប្រទេស ចិន កាលពីថ្ងៃអាទិត្យ បានព្យាយាមបន្ថយកម្ដៅសង្គ្រាមពាណិជ្ជកម្ម និងរូបិយប័ណ្ណដែលកំពុងកើនឡើងកាន់តែខ្លាំងជាមួយអាមេរិក ដោយអំពាវនាវឲ្យមាន «ដំណោះស្រាយប្រកបដោយស្ថាបនា» ខណៈជម្លោះនេះគំរាមកំហែងធ្វើឲ្យប៉ះពាល់ដល់សេដ្ឋកិច្ចពិភពលោក។
ថ្លែងនៅថ្ងៃចុងក្រោយនៃកិច្ចប្រជុំប្រចាំឆ្នាំរបស់មូលនិធិរូបិយវត្ថុអន្តរជាតិ (IMF) និងធនាគារពិភពលោក (WB) នៅទីក្រុង បាលី ប្រទេស ឥណ្ឌូនេស៊ី លោក Yi Gang បានព្រមានថា ហានិភ័យនេះស្ទើរតែមិនអាចរីករាលដាលខ្លាំងជាងនេះ និងបានព្រមានថា ការប៉ះទង្គិចគ្នារវាងប្រទេសមានសេដ្ឋកិច្ចធំជាងគេទាំង ២ នេះគឺជាស្ថានការណ៍ «ចាញ់-ចាញ់»។
លោកថ្លែងទៅកាន់សិក្ខាសាលាមួយដែលមានការចូលរួមពីប្រធានធនាគារកណ្ដាលរបស់ប្រទេសផ្សេងទៀតថា៖ «ភាពតានតឹងផ្នែកពាណិជ្ជកម្ម បណ្ដាលឲ្យមានការរំពឹងទុកអវិជ្ជមាន ភាពមិនច្បាស់លាស់អវិជ្ជមាន»។
លោកបានថ្លែងថា៖ «មានភាពមិនច្បាស់លាស់ដ៏ធំនៅចំពោះមុខពួកយើង។ ពិភពលោកទាំងមូល គួរតែធ្វើការងាររួមគ្នា ដើម្បីស្វែងរកដំណោះស្រាយប្រកបដោយស្ថាបនា»។
លោក Yi បានឲ្យដឹងថា លោកបាននិយាយទៅកាន់ក្រុមប្រធានធនាគារកណ្ដាល និងមន្ដ្រីជាន់ខ្ពស់ផ្សេងទៀតមកពីប្រទេសមួយចំនួន ក្នុងគ្រាដែលមានសង្គ្រាមពន្ធនាំចូលតបតគ្នារវាងអាមេរិក និងចិន និងការចោទប្រកាន់របស់ទីក្រុងវ៉ាស៊ីនតោនថា ប្រទេស ចិន កំពុងជំរុញឲ្យមានការទម្លាក់តម្លៃមិនស្មើភាពគ្នានៃរូបិយប័ណ្ណប្រាក់យន់របស់ខ្លួន ដើម្បីបង្កើនការនាំចេញ។
ការអត្ថាធិប្បាយរបស់លោក ធ្វើឡើងមួយថ្ងៃ បន្ទាប់ពីមូលនិធិ IMF បានព្រមានថា «ឱកាស» ក្នុងការរក្សាកំណើនសេដ្ឋកិច្ចពិភពលោកនៅលើផ្លូវឆ្ពោះទៅមុខកំពុងរួមតូច ដោយសារតែជម្លោះអាមេរិក និងចិន គំរាមកំហែងឲ្យឡើងកម្តៅ ហើយប្រទេសកំពុងអភិវឌ្ឍន៍ខ្លាំងជួបប្រទះការពិបាកដោយសារអត្រាការប្រាក់អាមេរិកកាន់តែខ្ពស់។
ភាពតានតឹងបានកើនឡើងថ្មីៗនេះ ដោយសារតែរដ្ឋបាលរបស់លោកប្រធានាធិបតី ដូណាល់ ត្រាំ ដាក់ចេញវិធានការហូតពន្ធនាំចូលតម្លៃរាប់ពាន់លានដុល្លារ ប្រឆាំងប្រទេស ចិន ក្នុងបំណងដោះស្រាយឱនភាពពាណិជ្ជកម្មរបស់ខ្លួន និងគ្រប់គ្រងលើអ្វីដែលទីក្រុងវ៉ាស៊ីនតោនចាត់ទុកថា ការអនុវត្តពាណិជ្ជកម្មរបស់ប្រទេស ចិន មិនអាចទទួលយកបាន។
លោក Steven Mnuchin រដ្ឋមន្ដ្រីក្រសួងហិរញ្ញវត្ថុ ដំបូងឡើយបាននិយាយសម្រាលការបារម្ភរបស់ពិភពលោក ដោយបានលើកឡើងនៅក្នុងកិច្ចប្រជុំនេះថា ពិភពលោកនឹងទទួលបានអត្ថប្រយោជន៍ បើទីក្រុងប៉េកាំង ត្រូវបានបង្ខំឲ្យផ្លាស់ប្តូរគោលនយោបាយពាណិជ្ជកម្មរបស់ខ្លួន។
ប៉ុន្តែលោកបានឲ្យដឹងថា លោកបានប្រាប់លោក Yi នៅសប្ដាហ៍នេះអំពីការបារម្ភរបស់លោកលើការធ្លាក់ថ្លៃរូបិយប័ណ្ណរបស់ចិន។
លោក Mnuchin បានបដិសេធអត្ថាធិប្បាយអំពីថា តើទីក្រុងវ៉ាស៊ីនតោននឹងប្រកាសថា ទីក្រុងប៉េកាំងជា «អ្នកបំប៉ោងរូបិយប័ណ្ណ» ក្នុងរបាយការណ៍របស់ក្រសួងហិរញ្ញវត្ថុមួយដែលនឹងចេញផ្សាយនៅសប្ដាហ៍ក្រោយ៕ AFP/LA