តូក្យូៈ ជនបរទេស ដែលទទួលបានសិទ្ធិរស់នៅថ្មីក្នុងប្រទេស ជប៉ុន ក្នុងនាមជាពលករមានជំនាញជាក់លាក់អាចនឹងត្រូវបានទទួលយកជាលើកដំបូងពីបណ្ដាប្រទេស ៨ ដែលរួមទាំងវៀតណាម ហ្វីលីពីន និងកម្ពុជា។ នេះបើយោងតាមប្រភព ដែលបានចុះផ្សាយដោយសារព័ត៌មាន The Japan News។
ប្រភពនេះឲ្យដឹងថា ដើម្បីទប់ស្កាត់ការកេងប្រវ័ញ្ចដោយឈ្នួញ កណ្ដាលមិនស្មោះត្រង់មួយចំនួន រដ្ឋាភិបាលនឹងស្វែងរកការប្រើប្រាស់កិច្ចព្រមព្រៀងទ្វេភាគី ដើម្បីពង្រឹងកិច្ចសហប្រតិបត្តិការជាមួយបណ្ដាប្រទេសដែលបញ្ជូនពលករមកធ្វើការងារ។
កម្មវិធីនេះសម្រាប់កម្មករមាន ជំនាញជាក់លាក់ដែលនឹងចាប់ ផ្ដើមដំណើរការនៅខែមេសា ត្រូវ បានរំពឹងថា នឹងដាក់បញ្ចូលកម្មករប្រហែលពី ១២០ ០០០ នាក់ ដល់ ១៥០ ០០០ នាក់ ដែលនឹងផ្ទេរពីកម្មវិធីហាត់ការបច្ចេកវិទ្យា ក្នុងរយៈពេល ៥ ឆ្នាំ ចាប់ពីឆ្នាំសារពើពន្ធ ២០១៩។
ប៉ុន្តែ ក្នុងអំឡុងការពិភាក្សានៅ Diet លើច្បាប់ការគ្រប់គ្រង ជនអន្តោប្រវេសន៍ និងការទទួល ស្គាល់ជនភៀសខ្លួន ដែលបានកែប្រែនៅពេលថ្មីៗ វាត្រូវបានចង្អុលបង្ហាញថា ឈ្មួញកណ្ដាល មិនស្មោះត្រង់ ដែលតម្រូវឲ្យអ្នកដាក់ពាក្យសុំបង់ប្រាក់កក់មិនសមស្រប ឬប្រាក់ផ្សេងទៀត មុនពេលត្រូវបានជួល ដែលបានបណ្ដាលឲ្យមានបញ្ហា ដោយសារតែសិក្ខាកាមចាកចេញពីការងាររបស់ពួកគេ។
អាស្រ័យហេតុនេះ មុនពេលការចាប់ផ្ដើមដំណើរការប្រព័ន្ធថ្មីនេះ រដ្ឋាភិបាលគ្រោងនឹងសម្រេចឲ្យបានកិច្ចព្រមព្រៀងទ្វេភាគីជាមួយបណ្ដាប្រទេសទាំង ៨ ដែលបញ្ជូនសិក្ខាកាមជាច្រើនមកប្រទេស ជប៉ុន ដើម្បីការពារសិទ្ធិរបស់កម្មករ។
ព័ត៌មានជាប់ទាក់ទងនឹងឈ្មួញពុករលួយ និងការស្នាក់ នៅខុសច្បាប់ នឹងត្រូវបានចែករំលែក រវាងអាជ្ញាធរស៊ើបអង្កេត ដើម្បីធ្វើឲ្យបញ្ហាទាំងនោះកាន់តែងាយស្រួលក្នុងការដោះស្រាយ។ ក្រៅពីនេះ ប្រទេស ៣ ដែលបានលើកឡើងខាងលើ ការចរចាកំពុងដំណើរការទៅមុខជាមួយបណ្ដាប្រទេសជាច្រើនទៀតរួមទាំង ចិន ឥណ្ឌូនេស៊ី ថៃ និង មីយ៉ាន់ម៉ា។
នៅក្នុងកញ្ចប់គោលនយោបាយដ៏ទូលំទូលាយមួយស្ដីពីការរួមរស់ជាមួយជនបរទេស ដែលនឹងត្រូវបានចងក្រងឡើងត្រឹមចុងឆ្នាំនេះ រដ្ឋាភិបាលគ្រោងនឹងដាក់បញ្ចូលកម្មវិធីជាច្រើន ដើម្បីធ្វើវាឲ្យកាន់តែងាយស្រួលសម្រាប់ជនបរទេស ក្នុងការបើកគណនីធនាគារ។
ការបើកគណនីធនាគារនេះដើម្បីការពារការទទួលបានប្រាក់ខែតិចជាងប្រាក់ឈ្នួលអប្បបរមា ខណៈកន្លងមក ប្រាក់ខែរបស់ពួកគេត្រូវបានបើកប្រាក់ខែជាសាច់ប្រាក់សុទ្ធ បន្ទាប់ពីមិនអាចបើកគណនីធនាគារបាន។
រដ្ឋាភិបាលក៏កំពុងពិចារណា បញ្ចូលផែនការនៅក្នុងកញ្ចប់គោលនយោបាយ សម្រាប់ការបង្កើតការិយាល័យកណ្ដាល នៅក្នុងសង្កាត់នីមួយៗ ដែលជនបរទេសអាចស្វែងរកជំនួយជាមួយបញ្ហាជាប់ទាក់ទងនឹងជីវិតរស់នៅប្រចាំថ្ងៃ៕ LA