.jpg)
ប្រធានាធិបតីបង់ក្លាដែស លោកស្រី Sheikh Hasina។ AFP
ក្រុងដាក្កាៈ ប្រទេស ជប៉ុន នឹងចុះហត្ថលេខាលើកិច្ចព្រមព្រៀងមួយជាមួយប្រទេស បង់ក្លាដែស ស្តីពីការផ្តល់ជំនួយអភិវឌ្ឍន៍ផ្លូវការ (ODA) ចំនួន ២,៥ ពាន់លានដុល្លារ ក្នុងអំឡុងដំណើរទស្សនកិច្ចរបស់លោកស្រីប្រធានាធិបតីបង់ក្លាដែស Sheikh Hasina ទៅកាន់ទីក្រុងតូក្យូនៅចុងខែនេះ។
ទីភ្នាក់ងារព័ត៌មាន UNB របស់បង់ក្លាដែសបានរាយការណ៍ថា លោក Hiroyasu Izumi ឯកអគ្គរាជទូតជប៉ុនប្រចាំប្រទេស បង់ក្លាដែស បានថ្លែងនៅពេលជួបជាមួយលោកស្រី Hasina កាលពីថ្ងៃចន្ទថា បរិមាណទឹកប្រាក់ក្នុងកិច្ចព្រមព្រៀង ODA លើកទី៤០ នេះ នឹងខ្ពស់ជាងបរិមាណកាលពីឆ្នាំមុន ៣៥ ភាគរយ។
លោក Izumi ក៏បានធានាផងដែរពីការគាំទ្រជាបន្តរបស់លោកនាយករដ្ឋមន្ត្រីជប៉ុនចំពោះបង់ក្លាដែស ក្នុងកិច្ចប្រឹងប្រែងរបស់ខ្លួនសម្រាប់វិបុលភាពសេដ្ឋកិច្ច។ នេះបើយោងតាមលោក Ihsanul Karim លេខាធិការផ្នែកព័ត៌មានរបស់នាយករដ្ឋមន្ត្រីបង់ក្លាដែស ដែលបានថ្លែងក្នុងអំឡុងសន្និសីទខ្លីមួយបន្ទាប់ពីជំនួបនេះ។
លោកឯកអគ្គរាជទូតជប៉ុនបានប្រាប់លោកស្រី Hasina ថា លោកនាយករដ្ឋមន្ត្រីជប៉ុន ស៊ិនហ្សូ អាបេ កំពុងរង់ចាំទទួលស្វាគមន៍លោកស្រីក្នុងប្រទេស ជប៉ុន ក្នុងអំឡុងទស្សនកិច្ចដែលធ្វើឡើងក្នុងពេលឆាប់ៗខាងមុខនេះ។
មន្ត្រីមួយរូបមកពីក្រសួងការបរទេសរបស់ប្រទេស បង់ក្លាដែស បានថ្លែងថា លោកស្រីនាយករដ្ឋមន្ត្រីនឹងចាកចេញពីបង់ក្លាដែសទៅកាន់ប្រទេស ជប៉ុន នៅថ្ងៃទី ២៨ ខែ ឧសភា។
ដោយសម្តែងការអបអរដល់លោកស្រី Hasina សម្រាប់ការឈ្នះក្នុងការបោះឆ្នោតសភាជាតិជាថ្មី លោក Izumi បានបន្ថែមថា រយៈពេល ៥ ឆ្នាំបន្ទាប់នឹងក្លាយជាដំណាក់កាលសំខាន់បំផុតសម្រាប់ប្រទេស បង់ក្លាដែស ខណៈដែលសេដ្ឋកិច្ចរបស់ប្រទេសនេះនឹងស្ទុះងើបឡើងឆ្ពោះទៅរកកំណើនបន្ថែមទៀត៕ AFP/KC
