ក្រុងតូក្យូៈ ជប៉ុននៅថ្ងៃចន្ទនេះនឹងប្រកាសការបង្កើនពន្ធលើការលក់រាយសម្រាប់ឆ្នាំ ២០១៩ បន្ទាប់ពីពន្យារពេលម្ដងហើយម្ដងទៀត ក្នុងកិច្ចខិតខំប្រឹងប្រែងមួយដើម្បីដោះស្រាយបំណុលសាធារណៈដ៏ច្រើនរបស់ប្រទេសនេះ។ នេះបើតាមសេចក្ដីរាយការណ៍កាលពីថ្ងៃអាទិត្យ។
ប្រទេសដែលមានសេដ្ឋកិច្ចឈានមុខគេទី ៣ របស់ពិភពលោកមួយនេះ ជាប្រទេសមួយក្នុងចំណោមប្រទេសអ្នកមានជាច្រើនផ្សេងទៀតដែលមានអនុបាតបំណុលធៀបនឹងផលិតផលក្នុងស្រុកសរុប (GDP) ខ្ពស់បំផុត។ ភាគច្រើននៃបំណុលនេះត្រូវបានកាន់កាប់ដោយវិនិយោគិនក្នុងស្រុកក្នុងអត្រាការប្រាក់ទាប ដែលអាចឲ្យប្រទេស ជប៉ុន គេចផុតពីការរងផលប៉ះពាល់ដូចអ្វីដែលប្រទេស ក្រិក បានទទួលរង។
ក្រុមអ្នករិះគន់បានឲ្យដឹងថា ការបង្កើនពន្ធលក់រាយពី ៨ ដល់ ១០ ភាគរយមានសារៈសំខាន់ចំពោះហិរញ្ញប្បទានដល់ការចំណាយលើសន្ដិសុខសង្គមដែលកើនឡើងខ្លាំង ជាពិសេសតម្លៃវេជ្ជសាស្ដ្រនៅក្នុងសង្គមដែលមនុស្សចាស់កើនឡើងយ៉ាងឆាប់រហ័ស។
កាសែត Yomiuri Shimbun និងទីភ្នាក់ងារព័ត៌មាន Jiji Press ដែលលក់ដាច់ខ្លាំងរបស់ជប៉ុនបានរាយការណ៍ថា លោកនាយករដ្ឋមន្ដ្រី ស៊ីនហ្សូ អាបេ នឹងប្រកាសការបង្កើនពន្ធលើការលក់នៅក្នុងកិច្ចប្រជុំគណៈរដ្ឋមន្ដ្រីនៅថ្ងៃចន្ទ។
ការដំឡើងពន្ធនេះ ដែលពីមុនគ្រោងធ្វើឡើងនៅខែតុលាឆ្នាំ ២០១៥ ត្រូវបានផ្អាក ២ ដង ដោយសារការបារម្ភថា វាអាចរារាំងដល់សេដ្ឋកិច្ចដែលផុយស្រួយនេះ។
ការដំឡើងពន្ធចុងក្រោយកាលពីខែមេសា ឆ្នាំ ២០១៤ ត្រូវបានស្ដីបន្ទោសថាបានជំរុញឲ្យជប៉ុនធ្លាក់ចូលក្នុងការដើរថយក្រោយនៃសេដ្ឋកិច្ចរយៈពេលខ្លី។
សេចក្ដីរាយការណ៍បានឲ្យដឹងថា នៅពេលនេះលោក អាបេ មានទំនុកចិត្តថា ដោយមានការឧបត្ថម្ភធនរដ្ឋាភិបាលថ្មី ដែលចាប់ផ្ដើមដំណើរការស្របគ្នា លោកអាចគេចផុតពីការធ្លាក់ចុះខ្លាំងនៃការចំណាយរបស់អតិថិជន ដែលបានធ្វើឲ្យប៉ះពាល់ដល់សេដ្ឋកិច្ច បន្ទាប់ពីការដំឡើងពន្ធកាលពីឆ្នាំ ២០១៤។
ថ្មីៗនេះលោក អាបេ បានឲ្យដឹងថា ការបង្កើតប្រព័ន្ធសន្ដិសុខសង្គមរបស់ប្រទេសដូចជា សោធននិវត្តន៍ និងការធានារ៉ាប់រងសុខភាពជាតិ និងវិធានការផ្សេងៗទៀតគឺជា «បញ្ហាប្រឈមធំបំផុត» នៅចំពោះមុខ និងបានសន្យាថា នឹងដោះស្រាយបញ្ហានេះ៕ AFP/LA