.jpg)
ទូរស័ព្ទ Samsung Galaxy S10 5G ដាក់បង្ហាញនៅក្រុងសេអ៊ូល។ រូបថត AFP
ក្រុងតូក្យូៈ ប្រទេស ជប៉ុន បានឲ្យដឹងកាលពីថ្ងៃចន្ទថា ខ្លួននឹងរឹតបន្តឹងបទប្បញ្ញត្តិលើការនាំចេញទៅកូរ៉េខាងត្បូងនូវសារធាតុគីមីមួយចំនួនដែលប្រើប្រាស់ក្នុងបន្ទះឈីប និងការផលិតទូរស័ព្ទស្មាតហ្វូនក្នុងគ្រាដែលមានជម្លោះជាមួយទីក្រុងសេអ៊ូលជុំវិញពលកម្មដោយបង្ខំនៅសម័យសង្រ្គាម។
វិធានការដែលនឹងចូលជាធរមាននៅថ្ងៃទី ៤ ខែកក្កដាខាងមុខនេះ ធ្វើឡើងបន្ទាប់ពីតុលាការប្រទេស កូរ៉េខាងត្បូង បានចេញបញ្ជាឲ្យក្រុមហ៊ុនជប៉ុនជាច្រើនត្រូវសងប្រាក់ជំងឺចិត្តដល់ប្រជាជនកូរ៉េដែលត្រូវបានបង្ខំឲ្យធ្វើពលកម្មនៅសម័យសង្គ្រាម ជាបញ្ហាមួយដែលទីក្រុងតូក្យូបានឲ្យដឹងថា ត្រូវបានដោះស្រាយរួចរាល់ហើយនៅពេលប្រទេសទាំង ២ បានចាប់ផ្ដើមឡើងវិញនូវទំនាក់ទំនងការទូតជាច្រើនទសវត្សរ៍មុន។
ក្រសួងសេដ្ឋកិច្ច ពាណិជ្ជកម្ម និងឧស្សាហកម្ម (METI) ជប៉ុនបានឲ្យដឹងក្នុងការប្រកាសមួយអំពីវិធានការនេះថា៖ «ប្រព័ន្ធគ្រប់គ្រងការនាំចេញត្រូវបានបង្កើតឡើងដោយផ្អែកលើទំនាក់ទំនងនៃការទុកចិត្តអន្តរជាតិ»។
ក្រសួង METI បានឲ្យដឹងថា៖ «បន្ទាប់ពីមានការត្រួតពិនិត្យមើលឡើងវិញដោយបណ្ដាក្រសួងពាក់ព័ន្ធ វាត្រូវតែនិយាយថា ទំនាក់ទំនងនៃទំនុកចិត្តរវាងប្រទេស ជប៉ុន និងកូរ៉េខាងត្បូង ត្រូវបានខូចខាតយ៉ាងខ្លាំង»។
ការរឹតបន្តឹងថ្មីៗនេះចំពោះការនាំចេញត្រូវបានអនុវត្តចំពោះសារធាតុគីមី ៣ ព្រមទាំងការផ្ទេរបច្ចេកវិទ្យាផលិត ដោយដកចេញសារធាតុគីមី និងការផ្ទេរបច្ចេកវិទ្យានេះចេញពីបញ្ជីដែលបានអនុញ្ញាតឲ្យមានការនាំចេញដោយរហ័សប្រកបដោយប្រសិទ្ធភាព។
ប្រព័ន្ធព័ត៌មានក្នុងស្រុកបានរាយការណ៍ថា វាមានន័យថាក្រុមហ៊ុននាំចេញនៅពេលនេះនឹងត្រូវតែដាក់ពាក្យសុំការអនុញ្ញាតសម្រាប់ក្រុមផលិតផលនាំចេញនីមួយៗដែលពួកគេចង់នាំចេញទៅកូរ៉េខាងត្បូង ពោលគឺជានីតិវិធីមួយដែលត្រូវការពេលវេលាប្រហែល ៩០ ថ្ងៃ ក្នុងការដាក់ពាក្យម្តង។
ក្រសួង METI បានឲ្យដឹងថា ខ្លួននឹងចាប់ផ្ដើមការដំណើរការស្នើសុំការផ្ដល់យោបល់ជាសាធារណៈលើការដកកូរ៉េខាងត្បូងចេញពីបញ្ជីប្រទេស «ពណ៌ស» ដែលប្រឈមនឹងការរឹតបន្តឹងតិចបំផុតលើការផ្ទេរបច្ចេកវិទ្យាដែលជាប់ទាក់ទងនឹងសន្ដិសុខជាតិ។
សារធាតុគីមីដែលរងផលប៉ះពាល់ដោយវិធានការនេះ គឺហ្វុយអូរីដប៉ូលីមែ ដែលប្រើក្នុងការផលិតអេក្រង់ សារធាតុទប់ទល់នឹងប្រតិកម្មពន្លឺ ដែលត្រូវបានប្រើប្រាស់ក្នុងការផលិតបន្ទះឈីប និងអ៊ីដ្រូសែនហ្វុយអូរីដ ដែលប្រើប្រាស់ដើម្បីសម្អាតបន្ទះឈីប៕ AFP/LA
