.jpg)
កសិកម្ម ម្រេចមេមត់ដារ។ ផា លីណា
ភ្នំពេញៈ ម្រេចមិនមែន GI របស់កម្ពុជា នៅតែជម្នះទៅនឹងតម្លៃទាបក្នុងរយៈពេលពេញ ១ ឆ្នាំនេះ ខណៈ ផ្ទៃដីដាំដុះត្រូវបានព្យាករថានឹងធ្លាក់ចុះនៅឆ្នាំក្រោយ។ នេះបើយោងតាមលោក យិន សុភា នាយកប្រតិបត្តិទទួលបន្ទុកសហករណ៍អភិវឌ្ឍន៍កសិកម្មម្រេចមេមត់ដារ។
លោកថ្លែងថា តម្លៃទីផ្សារម្រេចមិនមែន GI ពេញ ១ ឆ្នាំ ២០១៨ នៅតែស្ថិតក្រោមតម្លៃដើមផលិតនៅឡើយ ខណៈវិស័យនេះត្រូវបានរំពឹងថានឹងមិនកើនឡើងទេនៅឆ្នាំក្រោយ។
លោក សុភា បានឲ្យដឹងថា ចាប់តាំងពីការចាប់ផ្ដើមរដូវប្រមូលផល រហូតមកដល់ពេលនេះ តម្លៃបច្ចុប្បន្នអាចលក់ក្នុងតម្លៃ ២,៦ ដុល្លារក្នុង ១ គីឡូក្រាម។ លោកបន្តថា៖ «តម្លៃនេះមិនអាចផ្ដល់អត្ថប្រយោជន៍សម្រាប់កសិករនោះទេ ហើយកំណើនការដាំដុះនឹងមិនកើនឡើងទៀតទេ»។
គិតត្រឹមឆ្នាំ ២០១៦ កម្ពុជាមានផ្ទៃដីដាំដុះម្រេច ៥,០០០ ហិកតា។ នេះបើយោងតាមរបាយការណ៍បានពីក្រសួងកសិកម្ម ក្នុងនោះការនាំចេញម្រេចរបស់កម្ពុជាកើនឡើងពី ១ ០៥០ តោនកាលពីឆ្នាំ ២០១៦ ដល់ ២ ៦៩៨ តោនកាលពីឆ្នាំ ២០១៧។
រដ្ឋាភិបាលបានបង្កើតសហព័ន្ធថ្មីមួយ សម្រាប់ឧស្សាហកម្មម្រេចកម្ពុជា ដើម្បីលើកកម្ពស់ទីផ្សារ និងដោះស្រាយបញ្ហាប្រឈមនៅក្នុងវិស័យនេះ។ សហព័ន្ធម្រេចកម្ពុជា ត្រូវបានបង្កើតឡើងរួមគ្នាកាលពីខែមុន ដោយក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ។
សហព័ន្ធនេះនឹងធ្វើការដើម្បីលើកកម្ពស់តម្លៃម្រេច និងស្វែងរកទីផ្សារថ្មី ពិសេសម្រេចមិនមែន GI និងកសិករ។
លោក សុង សារ៉ន អគ្គនាយកក្រុមហ៊ុន Amru Rice Cambodia ដែលត្រូវបានជ្រើសរើសជាប្រធានសហព័ន្ធនេះ បានឲ្យដឹងថា សហព័ន្ធនេះកំពុងស្វែងរកជំនួយឧបត្ថម្ភបច្ចេកទេសដើម្បីដោះស្រាយបញ្ហាដ៏សំខាន់។
លោកថ្លែងថា៖ «យើងមិនមានព័ត៌មានបច្ចុប្បន្នភាពអំពីតម្លៃម្រេចនៅឡើយទេ ពេលនេះយើងកំពុងស្វែងរកជំនួយបច្ចេកទេស ដើម្បីគាំទ្រសហព័ន្ធ»។
លោកបន្តថា៖«យើងនឹងដោះស្រាយរាល់បញ្ហាសំខាន់ៗ ដែលកើតឡើងពេលនេះ និងវិធានការបន្ថែមទៀត»។
លោក វ៉ន សាវឿន កសិករម្រេចនៅស្រុកមេមត់ ដែលមានផ្ទៃដីដាំដុះម្រេច ៥ ហិកតា បានឲ្យដឹងថា លោកហាក់មិនសង្ឃឹមថា តម្លៃម្រេចកើនឡើងនោះទេ ដោយសារម្រេចនៅតែពឹងផ្អែកលើឈ្មួញកណ្តាល។
លោកថ្លែងថា៖ «កសិករភាគច្រើននៅទីនេះស្ទើរតែបោះបង់ចម្ការម្រេចរបស់ពួកគេ ដោយសារតែពួកគេមិនអាចសងបំណុលបាន»៕LA
