.jpg)
អតិថិជនឈរតម្រង់ជួររង់ចាំទិញទូរស័ព្ទ iPhone សេ៊រីថ្មីនៅហាង Apple ក្នុងទីក្រុងស៊ាងហៃ។ រូបថត AFP
ក្រុងញូវយ៉កៈ តម្លៃភាគហ៊ុនរបស់ក្រុមហ៊ុន Apple បានធ្លាក់ចុះកាលពីថ្ងៃសុក្រ បន្ទាប់ពីក្រុមហ៊ុននេះ បានចេញផ្សាយទិន្នន័យប្រាក់ចំណេញប្រចាំត្រីមាសខ្ពស់ ប៉ុន្តែការលក់ទូរស័ព្ទ iPhone មានទាបជាងការរំពឹងទុក និងមានចក្ខុវិស័យដ៏គួរឲ្យខកចិត្តសម្រាប់ថ្ងៃឈប់សម្រាកកាយនាពេលខាងមុខនេះ។
ភាគហ៊ុនរបស់ក្រុមហ៊ុនបច្ចេកវិទ្យាមួយនេះ បានធ្លាក់ថ្លៃ ៦,៦ ភាគរយដោយបិទការជួញដូរក្នុងតម្លៃ ២០៧,៤៨ ដុល្លារក្នុងមួយហ៊ុន។ តម្លៃនេះ បានធ្វើឲ្យក្រុមហ៊ុន Apple មានមូលធនីយកម្មទីផ្សារចំនួន ១ ពាន់ពាន់លានដុល្លារ បន្ទាប់ពីធ្លាក់ចុះក្រោមតម្លៃនេះមួយរយៈក្រោយពីបានកើនឡើងដល់កម្រិតនេះកាលពីខែសីហា។
ក្រុមហ៊ុន Apple បានឲ្យដឹងថា ប្រាក់ចំណេញសុទ្ធ បានកើនឡើង ៣២ ភាគរយដល់ ១៤,១៣ ពាន់លានដុល្លារលើប្រាក់ចំណូលដែលបានកើនឡើង ២០ ភាគរយដល់ ៦២,៩ ពាន់លានដុល្លារ ដោយទទួលបានពីកំណើនលក់មាតិកា និងសេវាឌីជីថលទៅកាន់អ្នកប្រើប្រាស់ និងឧបករណ៍អេឡិចត្រូនិករបស់ Apple ផ្សេងទៀត។
ទោះជាយ៉ាងណា ទីផ្សារមានការខកចិត្តដែលក្រុមហ៊ុន Apple ទទួលបានលទ្ធផលទាបជាងការរំពឹងទុក ដោយការលក់ទូរស័ព្ទ iPhone មានចំនួនតែ ៤៦,៩ លានគ្រឿង និងការព្យាករពីរដូវវិស្សមកាលដ៏សំខាន់មួយដែលថា ក្រុមហ៊ុននេះនឹងមិនទទួលបានលទ្ធផលលក់ល្អដូចការរំពឹកទុកកន្លងមកនោះទេ៕ AFP/KC
