.jpg)
រដ្ឋមន្ត្រីការបរទេសកាណាដាដែលចូលរួមចរចាចុងសប្តាហ៍មុន។ AFP
ក្រុងវ៉ាស៊ីនតោនៈ ប្រធានាធិបតីអាមេរិកលោក Donald Trump កាលពីថ្ងៃសៅរ៍បានគំរាមដកប្រទេសកាណាដាចេញពីកិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) ដែលទើបនឹងសម្រេចបានថ្មីមួយ បន្ទាប់ពីការចរចាដើម្បីកែប្រែកិច្ចព្រមព្រៀងនេះបានបញ្ចប់ដោយគ្មានការព្រមព្រៀង។
លោក ត្រាំ បានសរសេរនៅលើបណ្តាញសង្គម Twitter ថា៖ «មិនមានភាពចាំបាច់ផ្នែកនយោបាយដើម្បីរក្សាប្រទេសកាណាដានៅក្នុងកិច្ចព្រមព្រៀង NAFTA ថ្មីទេ។ ប្រសិនបើយើងមិនបង្កើតកិច្ចព្រមព្រៀងដោយស្មើភាពមួយសម្រាប់អាមេរិក បន្ទាប់ពីទទួលរងការរំលោភបំពានអស់រយៈពេលជាច្រើនទសវត្សរ៍នោះ កាណាដានឹងចាកចេញ»។
លោកឲ្យដឹងថា៖ «សភាមិនគួរជ្រៀតជ្រែកក្នុងការចរចាទាំងនេះទេ បើមិនដូច្នេះទេ ខ្ញុំនឹងបញ្ចប់កិច្ចព្រមព្រៀង NAFTA ទាំងស្រុង ហើយយើងនឹងស្ថិតក្នុងស្ថានភាពមួយកាន់តែល្អខ្លាំង»។
ការពិភាក្សាស្តីពីពាណិជ្ជកម្មរវាងសហរដ្ឋអាមេរិក និងកាណាដាគ្រោងនឹងបន្តធ្វើឡើងនៅថ្ងៃពុធ ហើយទីក្រុងអូតាវ៉ា និងទីក្រុងវ៉ាស៊ីនតោននឹងមានពេលវេលាដើម្បីឈានដល់ការព្រមព្រៀងមួយដែលនឹងរក្សាប្រទេសកាណាដាឲ្យស្ថិតនៅក្នុងកិច្ចព្រមព្រៀងដែលមានអាយុកាល ២៥ ឆ្នាំមួយនេះជាមួយម៉ិកស៊ិក។
ប៉ុន្តែការសរសេររបស់លោក ត្រាំ ហាក់ដូចជាបង្កើនសម្ពាធលើក្រុមអ្នកចរចារបស់កាណាដា។
កាលពីដើមសប្តាហ៍មុនក្រុមមន្ត្រីទំនងជាខិតជិតទៅរកការសម្រេចបានកិច្ចព្រមព្រៀងមួយដែលនឹងកែប្រែកិច្ចព្រមព្រៀង NAFTA ប៉ុន្តែការអត្ថាធិប្បាយបែបដុតរោលពីលោក ត្រាំ ដែលលេចធ្លាយដែលត្រូវបានមើលឃើញដោយកាណាដាថា ជាការបង្ហាញថា គាត់កំពុងតថ្លៃបែបមិនស្មោះត្រង់នោះបានគំរាមឲ្យមានការរំខានដល់ការចរចានេះ។
លោក ត្រាំ បានថ្កោលទោសដដែលៗថាកិច្ចព្រមព្រៀង NAFTA គឺជា «កិច្ចព្រមព្រៀងមួយក្នុងចំណោមកិច្ចព្រមព្រៀងអាក្រក់បំផុតមិនធ្លាប់មាន» ជាភាសាមួយដែលលោកបានលើកឡើងជាថ្មីកាលពីថ្ងៃសៅរ៍៕ KC
