.jpg)
រ៉ូបូត កំពុងផលិតរថយន្តនៅរោងចក្រមួយរបស់ក្រុមហ៊ុន BMW នៅអង់គ្លេស។ AFP
ក្រុងវ៉ាស៊ីនតោនៈ លោកប្រធានាធិបតីអាមេរិក ដូណាល់ ត្រាំ កាលពីថ្ងៃចុងសប្តាហ៍មុនបានប្រកាសពីការពន្យារពេល ៦ ខែ ចំពោះការហូតពន្ធលើការនាំចូលរថយន្តក្នុងអត្រាខ្ពស់ ដោយព្យាយាមដាក់សម្ពាធលើសហភាពអឺរ៉ុប និងជប៉ុន ឲ្យចូលមកតុចរចាពាណិជ្ជកម្ម។
សេចក្ដីសម្រេចចិត្តនេះបានបង្ហាញពីការពន្យារពេលបណ្ដោះអាសន្នមួយពីអ្វីដែលនឹងជាការបង្កើនភាពតានតឹងខ្លាំងក្នុងសង្គ្រាមពាណិជ្ជកម្មជុំទិសរបស់លោក ត្រាំ។
ការគំរាមកំហែងរបស់លោក ត្រាំ ផ្តោតទិសដៅលើផ្នែកដ៏ធំមួយនៃសកម្មភាពសេដ្ឋកិច្ចពិភពលោក ដែលអាចបង្កឲ្យមានការអាក់ខានដ៏ខ្លាំងដល់ចង្វាក់ផលិតកម្ម។ ទឹកប្រាក់ជាច្រើនពាន់លានដុល្លារក្នុងវិស័យរថយន្ត ត្រូវបង្កើតឡើងចេញពីចង្វាក់ផលិតនាំចេញ និងលក់ជាលក្ខណៈអន្តរជាតិជារៀងរាល់ឆ្នាំ។
ក្នុងសេចក្ដីប្រកាសមួយ លោកប្រធានាធិបតីរូបនេះបានបញ្ជាឲ្យលោក Robert Lighthizer អ្នកតំណាងពាណិជ្ជកម្មអាមេរិក ធ្វើបច្ចុប្បន្នភាពលទ្ធផលចរចាជាមួយអឺរ៉ុប ជប៉ុន និងជាមួយ «បណ្ដាប្រទេសផ្សេងទៀត» ដែលលោក Lighthizer គិតថា សមសម្របដល់រូបលោកក្នុងរយៈពេល ១៨០ ថ្ងៃក្រោយ។
ដោយទុកការគំរាមកំហែងដំឡើងពន្ធលើរថយន្តមួយអន្លើសិន វិធានការរបស់លោក ត្រាំ បានបង្កើនកម្ដៅនៅក្នុងទីក្រុងនានារបស់អឺរ៉ុប ដែលរដ្ឋាភិបាលទាំងនោះបានខឹងសម្បា រួចស្រេចទៅហើយដោយសារការហូតពន្ធពិន័យរបស់អាមេរិកលើដែកថែប និងអាលុយមីញ៉ូមកាលពីឆ្នាំមុន។
សេចក្ដីសម្រេចចិត្តរបស់លោក ត្រាំ ក៏បានរក្សាបទឈប់បាញ់ក្នុងសង្គ្រាមពាណិជ្ជកម្មមួយ ដែលបានប្រកាសកាលពីឆ្នាំជាមួយលោក Jean-Claude Juncker ប្រធានគណៈកម្មការអឺរ៉ុបផងដែរ ដែលភាគីទាំង ២ បានយល់ព្រមបញ្ឈប់ការប្រទូសរ៉ាយផ្នែកពាណិជ្ជកម្ម ខណៈដែលកិច្ចខិតខំប្រឹងប្រែងបានបន្តធ្វើឡើង ដើម្បីដោះស្រាយជម្លោះពាណិជ្ជកម្មនេះ។
បើទោះបីជាមានការសម្រេចចិត្តបែបនេះក៏ដោយ ក៏លោក ត្រាំ បានបន្តវាយប្រហាររបស់លោកលើគោលនយោបាយពាណិជ្ជកម្មរបស់សហភាពអឺរ៉ុបដដែល។
លោក ត្រាំ បានថ្លែងក្នុងព្រឹត្តិការណ៍មួយថា៖ «ខ្ញុំចង់និយាយថា សហភាពអឺរ៉ុបធ្វើមកលើយើងអាក្រក់ខ្លាំងជាងប្រទេស ចិន ធ្វើមកលើយើងទៅទៀត។ ពួកគេគ្រាន់តែជាប្រទេសតូចតាចប៉ុណ្ណោះ»។
លោក ត្រាំ ថ្លែងថា៖ «ពួកគេមិនត្រូវការកសិកររបស់យើងនោះទេ ពួកគេមិនត្រូវការរថយន្តរបស់យើងទេ ពួកគេបញ្ជូនរថយន្ត Mercedes-Benz មកទីនេះហាក់ដូចជារថយន្តទាំងនោះជានំឃុគីអ៊ីចឹង»។ លោកបន្ថែមថា៖ «ពួកគេទាញយកប្រយោជន៍ពីពួកយើងខាងផ្នែកពាណិជ្ជកម្ម»។
លោកបន្តថា៖ «យើងទាំងអស់គ្នាស្រឡាញ់អឺរ៉ុប ប៉ុន្តែវាមិនស្មើភាព»។
ជាការឆ្លើយតបនឹងពន្ធនាំចូលលោហៈរបស់អាមេរិក អឺរ៉ុបកាលពីឆ្នាំមុនបានដកហូតពន្ធដ៏ខ្ពស់លើការនាំចេញរបស់អាមេរិក ដូចជាម៉ូតូ ទឹកផ្លែក្រូច ស្រាវីស្គី និងខោខូវប៊យ ហើយបានគំរាមកំហែងថា នឹងតបតវិញបន្ថែមទៀត ប្រសិនបើពន្ធនាំចូលរថយន្តត្រូវបានហូត។
លោកស្រី Cecilia Malmstrom ស្នងការពាណិជ្ជកម្មអឺរ៉ុបបានបញ្ជាក់ពីសំណើដែលមានស្រាប់មួយថា៖ «សហភាពអឺរ៉ុប បានត្រៀមខ្លួនរួចជាស្រេចក្នុងការចរចាកិច្ចព្រមព្រៀងពាណិជ្ជកម្មដែលកម្រិតមួយ រួមបញ្ចូលទាំងរថយន្តផងដែរ»។
ការពន្យារពេលរយៈពេល ៦ ខែនេះ ត្រូវបានរំពឹងថានឹងកើតមានរួចទៅហើយនៅសប្ដាហ៍មុន ខណៈដែលប្រភពនានាក្នុងឧស្សាហកម្មរថយន្តបានបញ្ជាក់ប្រាប់សារព័ត៌មាននានាថា លោក ត្រាំ នឹងពន្យារពេល ដោយធ្វើឲ្យទីផ្សារមានភាពរីករាយ ដែលកន្លងមកបានបារម្ភថា នឹងកើតមានផលវិបាកផ្នែកសេដ្ឋកិច្ចដោយសារតែវិធានការបែបនោះ។
ក្នុងសេចក្ដីប្រកាសរបស់ខ្លួន លោក ត្រាំ បានហៅវិស័យរថយន្តអាមេរិកថា កំពុងប្រឈមការធ្លាក់ចុះ ដោយសារតែការប្រកួតប្រជែងពីបរទេសមិនស្មើភាព។
របាយការណ៍មួយដែលធ្វើឡើងដោយលោក Wilbur Ross រដ្ឋមន្ដ្រីក្រសួងពាណិជ្ជកម្មអាមេរិក បានសន្និដ្ឋានថា ចំណែកទីផ្សាររថយន្តដែលកំពុងធ្លាក់ចុះរបស់អាមេរិក បានធ្វើឲ្យអន្តរាយដល់ការស្រាវជ្រាវ ការអភិវឌ្ឍ និងការផលិតរបស់ខ្លួន ដែលទាំងនេះ «មានសារៈសំខាន់ចំពោះសន្ដិសុខជាតិ»។ នេះបើយោងតាមលោក ប្រធានាធិបតី ត្រាំ៕ AFP/LA
