ក្រុងវ៉ាស៊ីនតោនៈ ប្រតិបត្តិការនាំចេញប្រេង និងហិរញ្ញវត្ថុរបស់ប្រទេស អុីរ៉ង់ នឹងត្រូវផ្តោតទិសដៅស្ថិតក្រោមទណ្ឌកម្មរបស់អាមេរិកដែលនឹងចាប់ផ្ដើមអនុវត្តនៅថ្ងៃចន្ទនេះ បន្ទាប់ពីលោកប្រធានាធិបតី ដូណាល់ ត្រាំ បានចាកចេញពីកិច្ចព្រមព្រៀងនុយក្លេអ៊ែរកាលពី ៦ ខែមុន។
ទីក្រុងវ៉ាស៊ីនតោនបានបង្ហាញព័ត៌មានលម្អិត អំពីវិធានការជាក់លាក់របស់ខ្លួន ដែលកំណត់ទិសដៅលើវិស័យធនាគារ ដឹកជញ្ជូន និងថាមពលរបស់អុីរ៉ង់ ដោយគំរាមផាកពិន័យក្រុមហ៊ុននានាដែលធ្វើពាណិជ្ជកម្មក្នុងក្រុមហ៊ុនក្នុងវិស័យទាំងនោះ ទោះជាក្រុមហ៊ុនទាំងនោះជាក្រុមហ៊ុនរបស់ប្រទេសសម្ព័ន្ធមិត្តរបស់ អាមេរិក នៅអឺរ៉ុប និងនៅកន្លែងផ្សេងទៀតក្តី។
ទណ្ឌកម្មនេះបាននាំយកមកវិញនូវវិធានការពិន័យ ដែលត្រូវបានដាក់ហើយបន្ទាប់មកបានលុបចោលវិញដោយអតីតប្រធានាធិបតីលោក បារ៉ាក់ អូបាម៉ា ដែលសម្រេចបានកិច្ចព្រមព្រៀងអន្តរជាតិមួយ ដែលស្ថិតក្រោមកិច្ចព្រមព្រៀងនេះ ប្រទេស អុីរ៉ង់ បានដើរឆ្ពោះទៅរកការបញ្ចប់កម្មវិធីនុយក្លេអ៊ែររបស់ខ្លួន។
ទណ្ឌកម្មដែលត្រូវបានដាក់ឡើងវិញរួចហើយ
កាលពីថ្ងៃទី ៧ ខែ សីហា ទណ្ឌកម្មដែលបានលុបចោលស្ថិតក្រោមកិច្ចព្រមព្រៀងនុយក្លេអ៊ែរឆ្នាំ ២០១៥ បានចាប់ផ្ដើមអនុវត្តឡើងវិញ ដែលហាមឃាត់៖
- ការទិញប្រាក់ដុល្លាររបស់រដ្ឋាភិបាលអុីរ៉ង់ ឬការទិញ និងការលក់ជាលក្ខណៈអន្តរជាតិនូវរូបិយប័ណ្ណរៀលស៍របស់អុីរ៉ង់ក្នុងបរិមាណច្រើន។
- ការទិញមូលបត្របំណុលរតនាគារប្រទេស អុីរ៉ង់។
- ការជួញដូរមាស ឬលោហៈមានតម្លៃផ្សេងទៀត អាលុយមីញ៉ូម ដែកថែប កាបូន ឬធ្យូងថ្មក្រាហ្វីត។
- ការជួញដូររថយន្ត និងយន្តហោះពាណិជ្ជកម្ម។
- ការនាំចូលរបស់អាមេរិកនូវកម្រាលព្រំ ឬអាហាររបស់ប្រទេស អុីរ៉ង់។
ការដាក់ទណ្ឌកម្ម ដែលនឹងចាប់ផ្ដើមអនុវត្តនៅថ្ងៃចន្ទនេះ
ទណ្ឌកម្មដ៏តឹងរ៉ឹងបំផុតដែលលុបចោលនៅសម័យលោក អូបាម៉ា នឹងវិលមកវិញ ដែលរួមមានការហាមឃាត់លើ៖
- ការនាំចូលប្រេង និងឧស្ម័នពីប្រទេស អុីរ៉ង់ ដែលជាវិស័យរកប្រាក់ចំណូលច្រើនបំផុតនៃការប្តូររូបិយប័ណ្ណបរទេសរបស់ប្រទេសនេះ។ ប៉ុន្តែអាមេរិក កំពុងផ្ដល់ការលើកលែងដល់ប្រទេស ៨ ទំនងជារួមមានទាំងប្រទេស ឥណ្ឌា ជប៉ុន និងតួកគី ដែលនឹងបន្តទិញប្រេងអុីរ៉ង់ ប៉ុន្តែក្នុងកម្រិតទាបជាងពេលកន្លងមក។
- ប្រតិបត្តិការហិរញ្ញវត្ថុ។ ដោយចាប់ផ្ដើមនៅថ្ងៃចន្ទនេះ គ្រឹះស្ថានបរទេសណាមួយ ដែលធ្វើពាណិជ្ជកម្មជាមួយធនាគារកណ្ដាលអុីរ៉ង់ ឬធនាគារផ្សេងទៀតក្នុងប្រទេសនេះ នឹងបាត់បង់លទ្ធភាពចូលក្នុងប្រព័ន្ធហិរញ្ញវត្ថុអាមេរិក។
ហានិភ័យសម្រាប់ធនាគារបរទេសមានកម្រិតខ្ពស់ក្នុងសេដ្ឋកិច្ចសកលភាវូបនីយកម្មមួយ ដែលប្រាក់ដុល្លារនៅតែជារូបិយប័ណ្ណមានឥទ្ធិពល។
លោក Mnuchin ថ្លែងថា ប្រព័ន្ធអន្តរជាតិសម្រាប់ការផ្ទេរប្រាក់អន្តរធនាគារ SWIFT នឹងត្រូវតែបញ្ឈប់ទំនាក់ទំនងជាមួយគ្រឹះស្ថានហិរញ្ញវត្ថុអុីរ៉ង់ដែលស្ថិតក្នុងបញ្ជីខ្មៅរបស់អាមេរិក បើមិនអ៊ីចឹងទេនឹងប្រឈមការដាក់ទណ្ឌកម្មលើខ្លួនឯង៕ AFP/LA