ក្រុងឌូបៃៈ មូលនិធិរូបិយវត្ថុអន្តរជាតិ (IMF) ឲ្យដឹងនៅថ្ងៃចន្ទថា ការដាក់ទណ្ឌកម្មរបស់អាមេរិកលើប្រទេស អ៊ីរ៉ង់ ការកើនឡើងភាពចលាចលនៅមជ្ឈិមបូព៌ា និងអាហ្វ្រិកខាងជើង និងការប្រែប្រួលតម្លៃប្រេងឆៅ កំពុងដាក់បន្ទុកដល់កំណើនសេដ្ឋកិច្ចក្នុងតំបន់នេះ។
មូលនិធិ IMF បានព្រមានក្នុងរបាយការណ៍ស្តីពីចក្ខុវិស័យសេដ្ឋកិច្ច ដែលចេញផ្សាយ ២ ឆ្នាំម្តងរបស់ខ្លួនថា ចក្ខុវិស័យសម្រាប់តំបន់នេះត្រូវ «បានហ៊ុមព័ទ្ធទៅដោយភាពមិនច្បាស់លាស់កាន់តែខ្លាំង»។
ស្ថាប័នផ្តល់ប្រាក់កម្ចីពិភពលោកមួយនេះបានឲ្យដឹងថា៖ «ភាពមិនច្បាស់លាស់បែបនេះ អាចបង្កើនការដឹងឮពីហានិភ័យរបស់ក្រុមវិនិយោគិនសម្រាប់តំបន់នេះទាំងមូល ដែលបណ្ដាលឲ្យមានលំហូរចេញមូលធន និងសម្ពាធអត្រាប្តូរប្រាក់»។
មូលនិធិ IMF ព្យាករថា សេដ្ឋកិច្ចក្នុងប្រទេស អ៊ីរ៉ង់ ដែលជាប្រទេសឈានមុខគេទី២ ក្នុងតំបន់នេះបន្ទាប់ពីប្រទេស អារ៉ាប៊ីសាអ៊ូឌីត នឹងធ្លាក់ចុះ ៦ ភាគរយនៅឆ្នាំនេះ បន្ទាប់ពីការធ្លាក់ចុះ ៣,៩ ភាគរយកាលពីឆ្នាំ ២០១៨។
ព័ត៌មានអាក្រក់សម្រាប់ទីក្រុងតេអេរ៉ង់នេះបានកើតមានឡើងបន្ទាប់ពីអាមេរិក បានដាក់ទណ្ឌកម្មជាថ្មីកាលពីឆ្នាំមុន បន្ទាប់ពីប្រទេសមហាអំណាចមួយនេះបានដកខ្លួនចេញពីកិច្ចព្រមព្រៀងនុយក្លេអ៊ែរ ដែលសម្រេចបានកាលពីឆ្នាំ ២០១៥។
លោក Jihad Azour នាយកប្រចាំតំបន់មជ្ឈិមបូព៌ា និងអាស៊ីកណ្ដាលរបស់មូលនិធិ IMF បានឲ្យដឹងថា ការព្យាករដ៏អាក្រក់នេះ ត្រូវបានធ្វើឡើងមុនពេលដែលអាមេរិករឹតបន្តឹងវិធានការនានា ដោយកំណត់ទិសដៅលើឧស្សាហកម្មប្រេងរបស់ប្រទេស អ៊ីរ៉ង់ កាលពីសប្ដាហ៍មុន ដែលមានន័យថា ផលប៉ះពាល់នេះអាចកាន់តែធ្ងន់ធ្ងរជាងនេះ។
លោក Azour បានប្រាប់ទីភ្នាក់ងារព័ត៌មាន AFP ថា ការដាក់ទណ្ឌកម្មបានជំរុញឲ្យមានអតិផរណារួចហើយនៅក្នុងប្រទេស អ៊ីរ៉ង់ ដល់ប្រហែល ៥០ ភាគរយ។
បញ្ហារបស់ប្រទេស អ៊ីរ៉ង់ បានធ្វើឲ្យប៉ះពាល់ដោយប្រយោលលើតួលេខក្នុងតំបន់។
កំណើនសេដ្ឋកិច្ចក្នុងតំបន់ជារួម ត្រូវបានរំពឹងថានឹងនៅតែមានកម្រិតខ្សោយដែលមានអត្រា ១,៣ ភាគរយនៅឆ្នាំនេះ ធៀបនឹង ១,៤ ភាគរយកាលពីឆ្នាំ ២០១៨។
សម្រាប់ប្រទេសនាំចេញប្រេងនានា កំណើនសេដ្ឋកិច្ចបានធ្លាក់ចុះ ០,៤ ភាគរយសម្រាប់ឆ្នាំ ២០១៩ ខណៈដែលសេដ្ឋកិច្ចរបស់បណ្ដាប្រទេសនាំចូលត្រូវបានរំពឹងថា នឹងកើនឡើង ៣,៦ ភាគរយនៅឆ្នាំនេះ ធៀបនឹង ៤,២ ភាគរយកាលពីឆ្នាំ ២០១៨។
បណ្ដាប្រទេសដែលជាសមាជិករបស់ក្រុមប្រឹក្សាកិច្ចសហប្រតិបត្តិការឈូងសមុទ្រពែក្ស (GCC) ដូចជា ប្រទេស បារ៉ែន កូវ៉ែត អូម៉ង់ កាតា អារ៉ាប៊ីសាអ៊ូឌីត និងអេមីរ៉ាតអារ៉ាប់រួម ត្រូវបានព្យាករថា នឹងកើនឡើងបន្តិច ដោយកើនដល់ ២,១ ភាគរយធៀបនឹង ២ ភាគរយកាលពីឆ្នាំ ២០១៨។
មូលនិធិ IMF បានឲ្យដឹងថា កំណើនសេដ្ឋកិច្ចរបស់តំបន់មជ្ឈិមបូព៌ាទាំងមូល ត្រូវបានប៉ះពាល់អវិជ្ជមានដោយជម្លោះកាន់តែខ្លាំងឡើងៗ អំពើពុករលួយ កំណែទម្រង់យឺត កម្រិតបំណុលខ្ពស់ និងការប្រែប្រួលតម្លៃប្រេងជាបន្ត៕ AFP/LA