.jpg)
អ្នកគាំទ្រ និងមេធាវី លើករូបកម្មករទាំង៤នាក់ក្នុងពេលធ្វើដំណើរទៅជប៉ុន។ Korea Herald
ក្រុងតូក្យូៈ ក្រុមអ្នកគាំទ្ររបស់ជនជាតិកូរ៉េខាងត្បូងចំនួន ៤ នាក់ ដែលបានបម្រើការងារជាកម្មករដោយបង្ខំក្នុងអំឡុងសង្គ្រាមសម្រាប់ក្រុមហ៊ុនរបស់ប្រទេស ជប៉ុន កាលពីថ្ងៃចន្ទបានធ្វើដំណើរទៅកាន់ការិយាល័យកណ្ដាលរបស់ក្រុមហ៊ុននេះនៅទីក្រុង តូក្យូ ដើម្បីទាមទារប្រាក់សំណងតាមការបញ្ជាដោយតុលាការ។
តុលាការកំពូលកូរ៉េខាងត្បូង បានសម្រេចកាលពីខែមុនថា ក្រុមហ៊ុន Nippon Steel & Sumitomo Metal ត្រូវបង់ប្រាក់ឲ្យបុរសទាំងនោះ ចំនួន ១០០ លានវ៉ុន (៨៨ ០០០ ដុល្លារ) ក្នុងម្នាក់ៗ ពីបទបង្ខំឲ្យធ្វើការងារនៅក្នុងរោងចក្រដែកថែបរបស់ខ្លួន នៅចន្លោះឆ្នាំ ១៩៤១ ដល់ឆ្នាំ ១៩៤៣។ ក្នុងចំណោមជនរងគ្រោះទាំងនោះ មានបុរសតែម្នាក់ប៉ុណ្ណោះនៅរស់រានមានជីវិត។
មេធាវីរបស់បុរសទាំងនោះ ដែលបានអមដំណើរដោយក្រុមអ្នកគាំទ្រ បានធ្វើដំណើរទៅការិយាល័យកណ្ដាលរបស់ក្រុមហ៊ុននេះនៅទីក្រុងតូក្យូ ដើម្បីទាមទារប្រាក់សំណង ប៉ុន្តែតំណាងរបស់ក្រុមហ៊ុននេះមិនព្រមជួបពួកគេ។
ប្រព័ន្ធព័ត៌មានក្នុងប្រទេស កូរ៉េខាងត្បូងបានរាយការណ៍ថា លោក Kim Se Un ដែលជាមេធាវីម្នាក់ក្នុងចំណោមមេធាវីការពារក្តីរបស់ជនរងគ្រោះបានឲ្យដឹងថា នៅពេលនេះពួកគេនឹង «ចាប់ផ្ដើមនីតិវិធីក្នុងការរឹបអូស» ទ្រព្យសកម្មរបស់ក្រុមហ៊ុនបុត្រសម្ព័ន្ធនៅប្រទេសកូរ៉េខាងត្បូងរបស់ក្រុមហ៊ុន Nippon Steel & Sumitomo Metal។
សេចក្ដីសម្រេចរបស់តុលាការ បានជំរុញឲ្យមានជម្លោះថ្មីមួយរវាងប្រទេស ជប៉ុន និងកូរ៉េខាងត្បូង ដែលសម្ព័ន្ធមិត្តអាមេរិកទាំង ២ នេះ បានប្រឈមនឹងចិនដែលជាប្រទេសជិតខាងដ៏មានឥទ្ធិពល និងការគំរាមកំហែងរយៈពេលវែងរបស់ទីក្រុងព្យុងយ៉ាងដែលមានអាវុធនុយក្លេអ៊ែរ។
លោកនាយករដ្ឋមន្ដ្រីជប៉ុន ស៊ីនហ្សូ អាបេ បានរិះគន់យ៉ាងខ្លាំងដល់សេចក្ដីសម្រេចនេះ ដោយលើកឡើងថាវា «មិនអាចធ្វើបាននោះទេ» ស្ថិតក្រោមច្បាប់អន្តរជាតិ ហើយបញ្ហានោះត្រូវបាន «ដោះស្រាយបញ្ចប់ទាំងស្រុងហើយ» ដោយសន្ធិសញ្ញាឆ្នាំ ១៩៦៥ ដែលបានស្ដារទំនាក់ទំនងការទូតរវាងប្រទេសទាំង ២ ឡើងវិញនោះ។
កាលពីថ្ងៃចន្ទ លោក Yoshihide Suga លេខាធិការទីស្ដីការគណៈរដ្ឋមន្ដ្រីជប៉ុនបានជំរុញឲ្យទីក្រុងសេអ៊ូល ចាត់វិធានការដើម្បីធ្វើឲ្យស្ថានការណ៍នេះស្ងប់ស្ងាត់វិញ។
ជនជាតិកូរ៉េប្រហែល ៧៨០ ០០០ នាក់ត្រូវបានកេណ្ឌឲ្យធ្វើកម្មករដោយបង្ខំដោយជប៉ុន ក្នុងអំឡុងកាន់កាប់ឧបទ្វីបនេះរយៈពេល ៣៥ ឆ្នាំរបស់ខ្លួន៕ AFP/LA
