ក្រុងហាណូយៈ វិនិយោគិនគួរតែឃ្លាំងមើលដោយប្រុងប្រយ័ត្នលើទីផ្សារហ៊ុនវៀតណាម ខណៈចលនាតម្លៃមានលក្ខណៈរសើប និងបានបង្ហាញនិន្នាការមិនច្បាស់លាស់។ នេះបើយោងតាមក្រុមអ្នកវិភាគកាលពីថ្ងៃចន្ទ។
សន្ទស្សន៍ហ៊ុនគោល VN-Index របស់ផ្សារហ៊ុនក្រុងហូជីមិញ បានធ្លាក់ចុះ ០,៧១ ភាគរយកាលពីថ្ងៃសុក្រជាពេលបិទផ្សារហ៊ុនប្រចាំសប្តាហ៍មកនៅត្រឹម ៩៨៨,៧១ ពិន្ទុ។ ការធ្លាក់ចុះប្រចាំសប្តាហ៍មុនមាន ១,៥៤ ភាគរយ។
សន្ទស្សន៍ HNX-Index របស់ផ្សារហ៊ុនក្រុងហាណូយ ដែលជាផ្សារហ៊ុនតូចជាងទីផ្សារក្រុងហូជីមិញ បានកើនឡើង ០,២៦ ភាគរយនៅពេលបិទទីផ្សារក្នុងពេលដូចគ្នានោះដល់ ១០៨,០៩ ពិន្ទុ ដែលជួយកាត់បន្ថយការធ្លាក់ចុះប្រចាំសប្តាហ៍មកនៅកម្រិត ២,១៣ ភាគរយ។
ភាគហ៊ុនជាមធ្យមចំនួន ២៨៧ លានហ៊ុនត្រូវបានជួញដូរក្នុងវគ្គជួញដូរនីមួយៗកាលពីសប្តាហ៍មុន ដែលមានតម្លៃ ៦,៤ ពាន់ពាន់លានដុង (២៧៤ លានដុល្លារអាមេរិក)។
សន្ទនីយភាពបានកត់ត្រាការធ្លាក់ចុះ ៥ វគ្គជាប់គ្នានៅសប្តាហ៍មុន ខណៈដែលការធ្លាក់ចុះលំហូរសាច់ប្រាក់បានឆ្លុះបញ្ចាំងពីការប្រុងប្រយ័ត្នរបស់វិនិយោគិន ។ នេះបើយោងតាម Nguyen Hoang Viet ប្រធាននាយកដ្ឋានស្រាវជ្រាវទីផ្សារនៃក្រុមហ៊ុនមូលបត្រ VietinBank Securities ដែលប្រាប់គេហទំព័រ tinnhanhchungkhoan.vn។
លោក Viet បានថ្លែងថា វិនិយោគិនគួរតែចាកចេញពីទីផ្សារបណ្តោះអាសន្នដើម្បីតាមដានចលនារបស់សន្ទស្សន៍ហ៊ុនទាំង ២ នេះ និងកាត់បន្ថយការទិញភាគហ៊ុនមកនៅត្រឹមកម្រិតដែលមានសុវត្ថិភាពមួយ និងកាត់បន្ថយការចំណាយលើការប្រាក់នៃកម្ចីទិញភាគហ៊ុនពីក្រុមហ៊ុនឈ្មួញជើងសា (margin rate)។
យោងតាមក្រុមហ៊ុនមូលបត្រ Bao Viet Securities Company ផ្សារហ៊ុនវៀតណាមកំពុងឡើងចុះ ហើយនិន្នាការមានភាពមិនច្បាស់លាស់។
ដូច្នេះ ការប្រឈមទៅនឹងទិញភាគហ៊ុន គួរកម្រិតនៅត្រឹម ៣០ ទៅ ៤០ ភាគរយនៃផលបត្រវិនិយោគ។ វិនិយោគិនដែលមានសមាមាត្រភាគហ៊ុនខ្ពស់នៃផលបត្រវិនិយោគ អាចពិចារណាកាត់បន្ថយសមាមាត្រនេះក្នុងវគ្គជួញដូរដែលតម្លៃកើនឡើង។
ម្យ៉ាងវិញទៀត វិនិយោគិនដែលមានសមាមាត្រសាច់ប្រាក់ខ្ពស់ អាចពិចារណាទិញភាគហ៊ុនវិញ ដោយកំណត់អាទិភាពស្ថានភាពដែលមានស្រាប់នៃផលបត្រវិនិយោគរបស់ពួកគេនៅក្នុងកម្រិតតម្លៃទាប (support zone)។
ទីផ្សារហ៊ុនវៀតណាមបានជួបប្រទះការធ្លាក់ចុះខ្លាំងនៅថ្ងៃទី ២១ ខែ មីនា ដោយសន្ទស្សន៍ហ៊ុន VN-Index ធ្លាក់ចុះ ២,០៥ ភាគរយក្នុងអំឡុងពេលជួញដូរនៅថ្ងៃនោះ។
លោក Viet បានថ្លែងថា៖ «ទីផ្សារហ៊ុនវៀតណាមតែងតែមានប្រតិកម្មតបយ៉ាងឆាប់រហ័សទៅនឹងកត្តាខាងក្រៅ ជាពិសេសចំពោះព័ត៌មានអវិជ្ជមាន។ ការណ៍នេះ ត្រូវបានឆ្លុះបញ្ចាំងក្នុងវគ្គជួញដូរនៅថ្ងៃទី ២១ ខែ មីនា»។
នៅថ្ងៃទី ២១ ខែ មីនា កិច្ចប្រជុំស្តីពីគោលនយោបាយប្រចាំខែ មីនា របស់ធនាគារកណ្តាលអាមេរិក បានបង្ហាញលទ្ធផលរបស់ខ្លួន ដែលបានជះឥទ្ធិពលយ៉ាងខ្លាំងដល់ផ្សារហ៊ុនពិភពលោក និងក្នុងស្រុក។
ធនាគារកណ្តាលអាមេរិកបានទម្លាក់ការព្យាករពីកំណើនសេដ្ឋកិច្ចរបស់អាមេរិកពី ២,៣ ភាគរយមកនៅត្រឹម ២,១ ភាគរយ និងអត្រាអតិផរណាប្រចាំឆ្នាំពី ១,៩ ភាគរយមកនៅត្រឹម ១,៨ ភាគរយ ដែលឆ្លុះបញ្ចាំងពីការធ្លាក់ចុះកំណើនសេដ្ឋកិច្ចសកល និងសេដ្ឋកិច្ចអាមេរិក។
យោងតាមលោក Viet ចំណាត់ការនេះបានបង្កឲ្យមានការប្រុងប្រយ័ត្នក្នុងចំណោមវិនិយោគិន និងមានការធ្លាក់ចុះលំហូរសាច់ប្រាក់។
ទោះយ៉ាងណា ធនាគារកណ្តាលនេះបានរក្សាអត្រាការប្រាក់គោលនៅកម្រិតពី ២,២៥ ទៅ ២,៥ ភាគរយដដែល ហើយបានបង្ហាញសញ្ញាថានឹងមិនដំឡើងទៀតទេនៅឆ្នាំនេះ។
យោងតាម Ngo The Hien អនុប្រធានផ្នែកវិភាគប្រចាំក្រុមហ៊ុនមូលបត្រ Sai Gon-Hanoi Securities Company (SHS) ដំណឹងនេះបានគាំទ្រទីផ្សារកំពុងអភិវឌ្ឍន៍ខ្លាំងជាទូទៅ និងទីផ្សារហ៊ុនវៀតណាមជាពិសេស៕ ANN/KC