ក្រុងកាត់ថ្មាន់ឌូៈ ធនាគារវិនិយោគហេដ្ឋារចនាសម្ព័ន្ធអាស៊ី (AIIB) បានអនុម័តកម្ចីលើកដំបូងរបស់ខ្លួនសម្រាប់ប្រទេស នេប៉ាល់ ចាប់ពីធនាគារដែលគាំទ្រដោយប្រទេស ចិន នេះ ត្រូវបានបង្កើតឡើងក្នុងឆ្នាំ ២០១៤។
នេប៉ាល់នឹងទទួលបានប្រាក់កម្ចីចំនួន ៩០ លានដុល្លារ សម្រាប់ការសាងសង់រោងចក្រវារីអគ្គិសនី Upper Trishuli 1 ទំហំ ២១៦ មេហ្គាវ៉ាត់នៅស្រុក Rasuwa។
ធនាគារ AIIB ដែលបានស្វាគមន៍ការវិនិយោគដំបូងរបស់ខ្លួនក្នុងប្រទេស នេប៉ាល់ ថាជាឧទាហរណ៍មួយនៃរបៀបសម្របសម្រួលការវិនិយោគក្នុងវិស័យថាមពលនោះ ឲ្យដឹងថារោងចក្រវារីអគ្គិសនីតម្លៃ ៦៤៧,៤ លានដុល្លារនេះ នឹងបង្កើនការបង្កើតថាមពលរបស់នេប៉ាល់ជិត ២០ ភាគរយ។
លោក Dong-ik Lee អគ្គនាយកធនាគារ AIIB បានថ្លែងថា៖ «ការវិនិយោគរបស់ AIIB នឹងផ្តល់ហិរញ្ញប្បទានដែលត្រូវការខ្លាំង និងរយៈពេលវែងសម្រាប់គម្រោងហេដ្ឋារចនាសម្ព័ន្ធសំខាន់មួយ»។ លោកបន្ថែមថា៖ «យើងមានទំនុកចិត្តថា ការវិនិយោគរបស់យើងនឹងបង្ហាញពីភាពអាចរកបាននៃវិស័យថាមពលប្រកបដោយនិរន្តរភាពរបស់នេប៉ាល់ទៅកាន់វិនិយោគិនវិស័យឯកជនសក្តានុពលផ្សេងៗ»។
ធនាគារ AIIB មានផែនការចាប់ផ្តើមបញ្ចេញទឹកប្រាក់ទៅតាមការសន្យារបស់ខ្លួនចាប់ពីខែ តុលា ឆ្នាំ ២០១៩ ទៅ។ គម្រោងនេះ ដែលត្រូវបានអភិវឌ្ឍក្រោមរូបភាព BOT ដោយក្រុមហ៊ុន Nepal Water and Energy Development Company ត្រូវបានផ្តល់ហិរញ្ញប្បទានតាមរយៈទាំងបំណុល និងការបោះផ្សាយលក់ភាគហ៊ុន។
បំណុលសរុបមានចំនួន ៤៥៣,២ លានដុល្លារ ហើយត្រូវបានផ្តល់ហិរញ្ញប្បទានទាំងស្រុងដោយមូលធនបរទេសរួមទាំងពី IFC និងធនាគារ ADB ផងដែរ៕ ANN/KC