.jpg)
ក្រុមហ៊ុនផលិតនាវាមួយនេះ ត្រូវបានជាប់គាំងរួចហើយ ដោយរឿងអាស្រូវពុករលួយ។ AFP
ហាណូយៈ ប្រធានប្រតិបត្តិ ២ រូបមកពីក្រុមហ៊ុនផលិតនាវាគ្រប់គ្រងដោយរដ្ឋជិតក្ស័យធនមួយ ត្រូវបានចាប់ខ្លួននៅក្នុងប្រទេស វៀតណាម ដោយសារការចោទប្រកាន់ពីបទលួចបន្លំប្រាក់ ៤,៥ លានដុល្លារ ជាការផ្សំគំនិតជាមួយធនាគារ ដែលញាំញីដោយរឿងអាស្រូវមួយ ខណៈប្រទេសឯកបក្សមួយនេះ ពង្រីកការបង្រ្កាបអំពើពុករលួយដែលមិនធ្លាប់មានរបស់ខ្លួន។
មនុស្សធ្លាប់មានប្រាក់ច្រើនទាំងនេះ គឺជាអតីតមន្ដ្រីចុងក្រោយបំផុត ដែលជាប់ពាក់ព័ន្ធនៅក្នុងសំណាញ់ដ៏ច្របូកច្របល់មួយ នៃរឿងក្ដីពុករលួយដែលភ្ជាប់ទំនាក់ទំនងក្រុមហ៊ុនគ្រប់គ្រងដោយរដ្ឋមួយចំនួនជាមួយធនាគារ ដែលត្រូវបានចោទប្រកាន់ពីបទគ្រប់គ្រងមិនត្រឹមត្រូវ និងអំពើពុករលួយ។
ប្រធានធនាគារ ពាណិជ្ជករ និងអតីតមន្ដ្រីជាច្រើនត្រូវបានចាប់ដាក់គុក ជាផ្នែកមួយនៃយុទ្ធនាការប្រឆាំងអំពើពុករលួយ ដែលបានរៀបចំដោយមេដឹកនាំអភិរក្ស ចាប់តាំងពីឆ្នាំ ២០១៦។
ក្រសួងសន្ដិសុខសាធារណៈ បានឲ្យដឹងនៅក្នុងសេចក្ដីប្រកាសព័ត៌មានមួយថា លោក Truong Van Tuyen អតីតនាយក Vinashin ដែលធ្លាប់ជានាយកក្រុមហ៊ុនដ៏ធំមួយបានសង្គ្រោះដោយរដ្ឋ ពីការក្ស័យធនស្ថិតក្រោមបំណុលចំនួនច្រើនកាលពីឆ្នាំ ២០១០ ហើយបច្ចុប្បន្នលោក Pham Thanh Son ជានាយករងត្រូវបានចាប់ខ្លួនកាលពីថ្ងៃចន្ទ។
ក្រសួងនេះឲ្យដឹងថា ពួកគេកំពុងត្រូវបានស៊ើបអង្កេតពីបទ «រំលោភតួនាទី និងអំណាច ចំពោះទ្រព្យសម្បត្តិ»។
មនុស្សទាំង ២ នាក់នេះ ត្រូវបានចោទប្រកាន់ពីបទការយល់ព្រមដោយខុសច្បាប់នៃការដាក់ប្រាក់បញ្ញើទៅក្នុងធនាគារ Ocean Bank ជាធនាគារឯកជនមួយ ដែលបានជាប់ពាក់ព័ន្ធនៅក្នុងរឿងអាស្រូវពុករលួយផ្ទាល់របស់ខ្លួន ដែលត្រូវបានមើលឃើញមនុស្សជាច្រើននាក់ត្រូវបានកាត់ទោស។
លោក Tuyen និងលោក Son ត្រូវចោទប្រកាន់ជាមួយនឹងប្រាក់ ៤,៥ លានដុល្លារ រួមជាមួយលោក Vinashin អតីតប្រធានគណនេយ្យ ដែលបានជាប់គុករួចហើយនោះ។
ក្រុមហ៊ុនផលិតនាវាមានកេរ្ដិ៍ឈ្មោះមិនល្អមួយនេះ ធ្លាប់ជាក្រុមហ៊ុនដ៏សំខាន់មួយ ក្នុងចំណោមសហគ្រាសគ្រប់គ្រងដោយរដ្ឋប្រហែល ៥០០ របស់ប្រទេសកុម្មុយនីស្ដមួយនេះ។
ប៉ុន្តែកំហុសមួយចំនួន ដែលជាប់ទាក់ទងនឹងការវិនិយោគនៅក្នុងវិស័យអចលនទ្រព្យ និងវិស័យថាមពល ទីបំផុតបានធ្វើឲ្យក្រុមហ៊ុនដ៏ធំមួយនេះហ៊ុមព័ទ្ធដោយបន្ទុកបំណុលដ៏ធ្ងន់ធ្ងរ ស្ទើរតែធ្វើឲ្យក្រុមហ៊ុននេះក្ស័យធនកាលពីឆ្នាំ ២០១០។
រដ្ឋបានចូលទៅសង្គ្រោះក្រុមហ៊ុននេះ ហើយបច្ចុប្បន្នក្រុមហ៊ុនដែលកាន់តែរួមតូចមួយនេះ នៅតែផលិតនាវាជាច្រើន ប៉ុន្តែបានទម្លាក់ចោលការវិនិយោគរួមមួយចំនួន។ ក្រុមហ៊ុនមួយនេះត្រូវបានជាប់គាំងរួចហើយ ដោយរឿងអាស្រូវពុករលួយ។
អតីតប្រធានប្រតិបត្តិ ២ រូបរបស់ Vinashinlines ជាក្រុមហ៊ុន បុត្រសម្ព័ន្ធរបស់ក្រុមហ៊ុន Vinashin ត្រូវបានកាត់ទោសប្រហារជីវិត ពីបទលួចបន្លំ កាលពីឆ្នាំមុន បន្ទាប់ពីពួកគេត្រូវបានរកឃើញកំហុសលួចប្រាក់ ១១,៣ លានដុល្លារ ក្នុងកិច្ចព្រមព្រៀងដឹកជញ្ជូន ដែលធ្វើឡើងនៅចន្លោះឆ្នាំ ២០០៦ និងឆ្នាំ ២០០៨៕ AFP/LA
