.jpg)
លោក Philippe Bonnecarrere (ស្តាំ) និងសមភាគីរបស់លោកនៅប្រទេសអុីរ៉ង់។ AFP
ក្រុងតេអេរ៉ង់ៈ សមាជិកព្រឹទ្ធសភាបារាំង ១ រូប បានឲ្យដឹងនៅទីក្រុងតេអេរ៉ង់កាលពីថ្ងៃសៅរ៍ថា ប្រទេសនៅអឺរ៉ុបកំពុងស្វែងរកការធានាថា យ៉ាងហោចណាស់មានធនាគាររបស់ប្រទេស អុីរ៉ង់ មួយអាចភ្ជាប់ទំនាក់ទំនងជាមួយពិភពលោកបាន បន្ទាប់ពីអាមេរិកដាក់ទណ្ឌកម្មសេដ្ឋកិច្ចថ្មីប្រឆាំងប្រទេសនេះ។
សហរដ្ឋអាមេរិក បានដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ ដ៏សំខាន់ជាមួយប្រទេស អុីរ៉ង់ កាលពីខែឧសភា និងកំពុងដាក់ទណ្ឌកម្មពិន័យជាថ្មីលើប្រទេសសាធារណរដ្ឋអ៊ីស្លាមមួយនេះ ដែលកំណត់ទិសដៅជាពិសេសលើប្រព័ន្ធហិរញ្ញវត្ថុរបស់ប្រទេសនេះ។
លោក Philippe Bonnecarrere សមាជិកព្រឹទ្ធសភាបារាំងបានថ្លែងថា៖ «កិច្ចខិតខំប្រឹងប្រែងរបស់អឺរ៉ុបដើម្បីជួយប្រទេស អុីរ៉ង់ ឲ្យទទួលបានអត្ថប្រយោជន៍ពីកិច្ចព្រមព្រៀងនុយក្លេអ៊ែរនេះ ទោះបីជាការដាក់ទណ្ឌសេដ្ឋកិច្ចរបស់អាមេរិក «ពិបាកធ្វើឡើងក៏ដោយ ប៉ុន្តែវាអាចធ្វើបាន»។
លោកបន្ថែមថា មធ្យោបាយមួយគឺ «ត្រូវមានយ៉ាងហោចណាស់ធនាគាររបស់ប្រទេស អុីរ៉ង់ មួយ នៅតែមានទំនាក់ទំនងជាមួយប្រព័ន្ធធនាគារអន្តរជាតិ តាមរយៈ SWIFT ដើម្បីរក្សាទំនាក់ទំនងពាណិជ្ជកម្មទំនិញ និងសេវា ដែលមិនស្ថិតក្រោមការដាក់ទណ្ឌកម្ម»។
លោក Bonnecarrere ដែលដឹកនាំក្រុមមិត្តភាពបារាំង និងអុីរ៉ង់ នៅសភាជាន់ខ្ពស់ បានថ្លែងយ៉ាងដូច្នេះនៅក្នុង អំឡុងសន្និសីទសារព័ត៌មានមួយជាមួយសមភាគី បារាំង និងអុីរ៉ង់។
កិច្ចព្រមព្រៀងនុយក្លេអ៊ែរឆ្នាំ ២០១៥ ត្រូវបានព្រមព្រៀងរវាងអុីរ៉ង់ និងអ្វីដែល ហៅថា ក្រុម ៥+១ ជាសមាជិកអចិន្ត្រៃយ៍ក្រុមប្រឹក្សាសន្ដិសុខអង្គការសហប្រជាជាតិដូចជាចក្រភពអង់គ្លេស ចិន បារាំង រុស្ស៊ី និងអាមេរិក បូកអាល្លឺម៉ង់។
លោក Bonnecarrere កំពុងស្ថិតនៅក្នុងប្រទេស អុីរ៉ង់ ជាមួយសមាជិកសភាបារាំង ៦ រូបផ្សេងទៀត។
លោកស្រី Delphine O ជាតំណាងរាស្ដ្រ ១ រូប ក្នុងចំណោមតំណាងរាស្ដ្រទាំងនោះបានថ្លែងថា ដំណើរទស្សនកិច្ចនេះគឺជាសញ្ញាមួយនៃ «ការប្ដេជ្ញាចិត្ត និងឆន្ទៈទាំងអស់របស់ប្រទេស បារាំង ក្នុងការធ្វើឲ្យកិច្ចព្រមព្រៀងនុយក្លេអ៊ែរនៅ មានជីវិត»៕ AFP/LA
