.jpg)
ទង់ជាតិ របស់ប្រទេស ចិន និងសហរដ្ឋអាមេរិ ដែលបានដាក់នៅសាលាមួយកន្លែង នៅឯទីក្រុងប៉េកាំង។ AFP
ក្រុងប៉េកាំងៈ ប្រទេស ចិន កាលពីថ្ងៃព្រហស្បតិ៍បានចោទប្រកាន់អាមេរិកថាបានបង្ក «ភេរវកម្មសេដ្ឋកិច្ចយ៉ាងច្បាស់ក្រឡែត» ខណៈដែលទីក្រុងប៉េកាំងបង្កើនវោហារស័ព្ទនៅក្នុងសង្គ្រាមពាណិជ្ជកម្មរវាងប្រទេសទាំង ២។
ប្រទេសមានសេដ្ឋកិច្ចឈានមុខគេទាំង ២ របស់ពិភពលោក កំពុងខ្វែងគំនិតគ្នាខ្លាំង ខណៈការចរចាពាណិជ្ជកម្មបានជាប់គាំង ដោយសារតែការបង្កើនពន្ធនាំចូលរបស់លោកប្រធានាធិបតីអាមេរិក ដូណាល់ ត្រាំ លើទំនិញរបស់ចិនកាលពីដើមខែនេះ និងការដាក់បញ្ចូល Huawei ក្នុងបញ្ជីខ្មៅ។
លោក Zhang Hanhui អនុរដ្ឋមន្ដ្រីក្រសួងការបរទេសចិនបានឲ្យដឹងក្នុងសន្និសីទខ្លីមួយ ដើម្បីបង្ហាញពីដំណើរទស្សនកិច្ចរបស់លោកប្រធានាធិបតី ស៊ី ជីនភីង ទៅប្រទេស រុស្ស៊ី នៅសប្ដាហ៍ក្រោយថា៖ «យើងប្រឆាំងនឹងសង្គ្រាមពាណិជ្ជកម្ម ប៉ុន្តែយើងមិនខ្លាចសង្គ្រាមពាណិជ្ជកម្មឡើយ»។
លោក Zhang បានថ្លែងថា៖ «ការញុះញង់ដោយចេតនានៃជម្លោះពាណិជ្ជកម្មនេះ គឺជាភេរវកម្មសេដ្ឋកិច្ចយ៉ាងច្បាស់ក្រឡែត ជាជាតិនិយមជ្រុលផ្នែកសេដ្ឋកិច្ច និងការរករឿងផ្នែកសេដ្ឋកិច្ច»។ លោកបានសង្កត់ធ្ងន់ថា ចិនជំទាស់ការប្រើប្រាស់ជាប្រព័ន្ធនូវការដាក់ទណ្ឌកម្ម ពន្ធនាំចូល និងការគាំពារនិយម។
លោកព្រមានថា៖ «មិនមានអ្នកឈ្នះនៅក្នុងសង្គ្រាមពាណិជ្ជកម្មនោះទេ»។
ចិនបានវាយប្រហារតបវិញតាមរយៈការបង្កើនពន្ធនាំចូលផ្ទាល់របស់ខ្លួនដែលនឹងចាប់ផ្ដើមនៅថ្ងៃទី ១ ខែ មិថុនា ខណៈប្រព័ន្ធព័ត៌មានរដ្ឋបានបង្ហាញថា ទីក្រុងប៉េកាំងអាចបញ្ឈប់ការនាំចេញរ៉ែកម្រទៅអាមេរិក ដែលជាប្រភពធនធានដ៏សំខាន់មួយរបស់ទីក្រុងវ៉ាស៊ីនតោន ដើម្បីផលិតផលិតផលបច្ចេកវិទ្យាខ្ពស់។
ចិនផលិតរ៉ែកម្រជាង ៩៥ ភាគរយ ក្នុងពិភពលោក ហើយអាមេរិកពឹងផ្អែកខ្លាំងលើការនាំចូលពីចិន៕ AFP/LA
