.jpg)
បារាំង អាឡឺម៉ង់ និងអង់គ្លេស និយាយថា ប្រទេសអឺរ៉ុបថ្មីចំនួន ៦ បានចូលរួមក្នុងប្រព័ន្ធ INSTEX។ AFP
ក្រុងប៉ារីសៈ ទីក្រុងប៉ារីសទីក្រុងឡុងដ៍ និងទីក្រុងប៊ែរឡាំងកាលពីថ្ងៃសៅរ៍ បានស្វាគមន៍ប្រទេសថ្មីនៅអឺរ៉ុបចំនួន ៦ ដែលបានចូលរួមយន្តការដោះដូរទំនិញ INSTEX ដែលត្រូវបានបង្កើតឡើងដើម្បីបញ្ចៀសពីការដាក់ទណ្ឌកម្មរបស់អាមេរិកប្រឆាំងនឹងពាណិជ្ជកម្មជាមួយប្រទេស អ៊ីរ៉ង់ ដោយការចៀសវាងការប្រើប្រាស់ប្រាក់ដុល្លារ។
ទីក្រុងទាំង ៣ នេះបានឲ្យដឹងនៅក្នុងសេចក្ដីប្រកាសព័ត៌មានរួមគ្នាមួយថា៖ «ក្នុងនាមជាភាគហ៊ុនិកស្ថាបនិករបស់ឧបករណ៍គាំទ្រការដោះដូរពាណិជ្ជកម្ម (INSTEX) ប្រទេសបារាំង អាល្លឺម៉ង់ និងចក្រភពអង់គ្លេស ស្វាគមន៍យ៉ាងកក់ក្ដៅដល់ការសម្រេចចិត្តដែលបានធ្វើឡើងដោយរដ្ឋាភិបាលរបស់ប្រទេស បែលហ្សិក ដាណឺម៉ាក ហ្វាំងឡង់ ហូឡង់ ន័រវែស និងស៊ុយអែត ក្នុងការចូលរួមក្នុង INSTEX ក្នុងនាមជាភាគហ៊ុនិក»។
INSTEX ដែលមានមូលដ្ឋាននៅទីក្រុងប៉ារីសមានមុខងារជាទីតាំងផាត់ទាត់មួយដែលអាចឲ្យប្រទេសអ៊ីរ៉ង់បន្តលក់ផលិតផលប្រេង និងផលិតផលនាំចូល ឬសេវាផ្សេងទៀតក្នុងរូបភាពជាការដោះដូរ។
ប្រព័ន្ធនេះមិនទាន់ត្រូវបានបើកប្រតិបត្តិការណាមួយនៅឡើយទេ។
ទីក្រុងវ៉ាស៊ីនតោនកាលពីឆ្នាំ ២០១៨ បានខ្លួនជាឯតោភាគីចេញពីកិច្ចព្រមព្រៀងអន្តរជាតិដែលគ្រប់គ្រងកម្មវិធីនុយក្លេអ៊ែររបស់ប្រទេសអ៊ីរ៉ង់ និងបានដាក់ទណ្ឌកម្មជាថ្មីយ៉ាងធ្ងន់ធ្ងរប្រឆាំងនឹងទីក្រុងតេអេរ៉ង់។
ប្រទេស បារាំង អាល្លឺម៉ង់ និងចក្រភពអង់គ្លេស បានឲ្យដឹងថា ការចូលជាសមាជិកថ្មីទាំង ៦ នេះ «ពង្រឹង INSTEX បន្ថែម និងបង្ហាញកិច្ចខិតខំប្រឹងប្រែងអឺរ៉ុបក្នុងការជួយសម្រួលដល់ពាណិជ្ជកម្មស្របច្បាប់រវាងអឺរ៉ុប និងអ៊ីរ៉ង់»៕ LA
