ក្រុងប៉េកាំងៈ រូបិយប័ណ្ណរបស់ប្រទេស ចិន បានជួបប្រទះការប្រែប្រួលតម្លៃខ្លាំងទាំងនៅទីផ្សារក្នុងប្រទេស និងក្រៅប្រទេសនាពេលថ្មីៗនេះ។ ទោះជាយ៉ាងណា សេដ្ឋវិទូជឿថា ប្រាក់យន់នឹងនៅតែមានស្ថិរភាពក្នុងរយៈពេលវែងដោយសារមូលដ្ឋានសេដ្ឋកិច្ចរឹងមាំរបស់ប្រទេស ចិន។
កាលពីថ្ងៃទី ៧ ខែមិថុនា ប្រាក់យន់ដែលជួញដូរនៅទីផ្សារក្រៅប្រទេសបានធ្លាក់ចុះដល់ ៦,៩៦ យន់ ក្នុង ១ ដុល្លារ ហើយនៅថ្ងៃទី ១០ ខែមិថុនា អត្រាប្តូរប្រាក់យន់នៅទីផ្សារក្រៅប្រទេសបានធ្លាក់ចុះមកដល់ ៦,៩៣ យន់ ក្នុង ១ ដុល្លារអាមេរិក។
ជម្លោះពាណិជ្ជកម្មរវាងអាមេរិក និងចិន បានបង្កឲ្យមានក្តីបារម្ភថានឹងកើតមានភាពមិនច្បាស់លាស់ខ្លាំងចំពោះទីផ្សារ ដែលបាននាំមុខដោយការប្រែប្រួលតម្លៃប្រាក់យន់នាពេលថ្មីៗនេះ។ នេះបើយោងតាមលោក E Zhihuan ប្រធានសេដ្ឋវិទូប្រចាំធនាគារ Bank of China (Hong Kong)។
លោក Liu Guoqiang ទេសាភិបាលរងនៃធនាគារប្រជាមានិតចិន ដែលជាធនាគារកណ្តាលរបស់ប្រទេស ចិន បានថ្លែងថា ប្រទេស ចិន «មានសមត្ថភាព និងទំនុកចិត្ត» ចំពោះការរក្សាអត្រាប្តូរប្រាក់ឲ្យមានស្ថិរភាពជាទូទៅនៅក្នុងកម្រិតសមហេតុផល និងមានតុល្យភាព ដោយពិចារណាទៅលើមូលដ្ឋានសេដ្ឋកិច្ចដ៏រឹងមាំ ភាពរស់រវើករបស់សេដ្ឋកិច្ច និងសក្តានុពលធំរបស់សេដ្ឋកិច្ចចិន។
គិតចាប់ពីឆ្នាំនេះទៅមុខ មូលដ្ឋានសេដ្ឋកិច្ចដ៏រឹងមាំនៃសេដ្ឋកិច្ចចិន បានផ្តល់មូលដ្ឋានរឹងមាំមួយសម្រាប់ប្រាក់យន់ឲ្យរក្សាបានស្ថិរភាពក្នុងរយៈពេលវែង។
សូចនាករសេដ្ឋកិច្ចឈានមុខនានា រួមទាំងសន្ទស្សន៍អ្នកគ្រប់គ្រងបញ្ជាទិញ (PMI) ក្នុងវិស័យផលិតកម្ម និងការប្រើប្រាស់ និងពាណិជ្ជកម្មបរទេស បានបង្ហាញថា លទ្ធផលសេដ្ឋកិច្ចចិនបានបន្តកើតមានក្នុងកម្រិតសមហេតុផលមួយ ហើយរក្សាបានសម្ទុះប្រកបដោយស្ថិរភាព។
ពាណិជ្ជកម្មទំនិញបរទេសរបស់ចិនបានកើនឡើងដល់ ១២,១ ពាន់ពាន់លានយន់ (ប្រហែល ១,៧៦ ពាន់ពាន់លានដុល្លារ) ក្នុងរយៈពេល ៥ ខែដំបូងក្នុងឆ្នាំនេះ កើនឡើង ៤,១ ភាគរយ ធៀបនឹងរយៈពេលដូចគ្នានៅឆ្នាំមុន។ នេះបើយោងតាមទិន្នន័យពីរដ្ឋបាលគយទូទៅ (GAC) របស់ប្រទេស ចិន៕ People''s Daily/KC