ក្រុងហុងកុងៈ ទីផ្សារភាគហ៊ុនអាស៊ីបានថមថយបន្តិចវិញកាលពីថ្ងៃអង្គារ ខណៈការកើនឡើងកាលពីមុនដែលត្រូវបានជំរុញដោយការចាប់ផ្ដើមបន្តនៃការចរចារវាងប្រទេស ចិន និងអាមេរិក បានប៉ះប៉ូវក្តីបារម្ភអំពីចក្ខុវិស័យសេដ្ឋកិច្ចពិភពលោក បន្ទាប់ពីការចេញផ្សាយទិន្នន័យរោងចក្រដែលខកចិត្ត។
តម្លៃភាគហ៊ុនផ្សារហ៊ុនហុងកុង បានកើនឡើងជាង ២ ភាគរយ ដោយសារតែពាណិជ្ជករបានត្រឡប់មកពីការសម្រាកចុងសប្ដាហ៍រយៈពេលវែង ដើម្បីព្យាយាមសម្រេចបានកម្រិតស្មើគ្នាជាមួយនឹងផ្នែកផ្សេងទៀតនៃតំបន់នេះ ខណៈការតវ៉ាប្រឆាំងដោយហិង្សារយៈពេលខ្លីនៅក្នុងទីក្រុងនេះដែលហាក់ដូចជាមានផលប៉ះពាល់បន្តិចបន្តួចប៉ុណ្ណោះលើទំនុកចិត្ត។
ខណៈលោក ដូណាល់ ត្រាំ និងលោក ស៊ី ជីនភីង យល់ព្រមក្នុងការចាប់ផ្ដើមដំណើរការចរចាឡើងវិញដែលបានផ្ដល់ការបន្ធូរបន្ថយមួយចំនួន ប៉ុន្តែបញ្ហាសំខាន់ៗនៅតែមិនអាចដោះស្រាយបាន រួមមានពាណិជ្ជកម្មបច្ចេកវិទ្យា និងកម្មសិទ្ធិបញ្ញា។
លោក Stephen Innes នៅក្រុមហ៊ុន Vanguard Markets បានថ្លែងថា៖ «ពាណិជ្ជករបានយល់ថា ពួកគេបានលោតទៅមុន ខុសពីភាពពិតនៃសេដ្ឋកិច្ច បន្ទាប់ពីរបាយការណ៍ផលិតកម្មរោងចក្រដែលខកចិត្តជាច្រើនពីអាមេរិក ចិន និងអឺរ៉ុប បានផ្ដល់ការរំឭកថា ចក្ខុវិស័យសម្រាប់កំណើនសេដ្ឋកិច្ចពិភពលោកនៅតែមានផលប៉ះពាល់យ៉ាងខ្លាំងដល់ហានិភ័យទំនុកចិត្ត»។
វិទ្យាស្ថានគ្រប់គ្រងការផ្គត់ផ្គង់ដែលឃ្លាំមើលយ៉ាងយកចិត្តទុកដាក់ដល់សន្ទស្សន៍ផលិតកម្មទូទាំងប្រទេស នៅអាមេរិក បានធ្លាក់ចុះមកនៅត្រឹមកម្រិតទាបបំផុតរបស់ខ្លួនក្នុងរយៈពេលជិត ៣ ឆ្នាំ កាលពីខែមិថុនា ដែលរងផលប៉ះពាល់ដោយតម្រូវការបរទេសខ្សោយ ដោយសារតែរោងចក្រជាច្រើនស្ទាក់ស្ទើរក្នុងការផលិតស្ដុកដែលពួកគេមិនអាចលក់បាន។
តួលេខពីប្រទេស ចិន និងអឺរ៉ុប បានចង្អុលបង្ហាញការធ្លាក់ចុះនៅក្នុងវិស័យរោងចក្ររៀងៗខ្លួនរបស់ពួកគេ ខណៈតម្លៃសន្ទស្សន៍របស់ផ្សារហ៊ុនចក្រភពអង់គ្លេស បានធ្លាក់ចុះមកនៅត្រឹមកម្រិតទាបបំផុតចាប់តាំងពីឆ្នាំ ២០១៣។
ក្រុមអ្នកអង្កេតបានឲ្យដឹងថា តួលេខ នេះអាចដាក់សម្ពាធបន្ថែមទៀតលើធនាគារកណ្ដាល ក្នុងការផ្ដល់ការគាំទ្រដល់សេដ្ឋកិច្ចជាមួយនឹងការ-លើកទឹកចិត្តថ្មីៗ។
ធនាគារកណ្ដាលអាមេរិកដែលត្រូវបានគេដឹងថា នឹងកាត់បន្ថយអត្រាការប្រាក់ នៅក្នុងកិច្ចប្រជុំគោលនយោបាយរបស់ខ្លួននៅខែនេះ និងការចេញផ្សាយរបាយការណ៍ការងារអាមេរិកនៅថ្ងៃសុក្រ នឹងត្រូវបានតាមដានយ៉ាងយកចិត្តទុកដាក់។
លោក Edward Moya អ្នកវិភាគជាន់ខ្ពស់ផ្នែកទីផ្សារនៅក្រុមហ៊ុន OANDA បានថ្លែងថា៖ «ភាគហ៊ុនអាចនឹងមើលឃើញក្រោយចេញទិន្នន័យសេដ្ឋកិច្ច ដែលនឹងគាំទ្រទឡ្ហីករណ៍ សម្រាប់ធនាគារកណ្ដាលអាមេរិក ក្នុងការផ្ដល់ការប្ដេជ្ញាចិត្តកាន់តែខ្លាំង ក្នុងការបន្ធូរបន្ថយ និងសម្រាប់ធនាគារកណ្ដាលសំខាន់ៗផ្សេងទៀត ក្នុងការបង្កើនកិច្ចខិតខំប្រឹងប្រែងរបស់ពួកគេ»៕AFP/LA