.jpg)
ផ្សែងហោះចេញពីរោងចក្រនៅភាគខាងជើងប្រទេសបារាំង។ រូប AFP
ក្រុងវ៉ាស៊ីនតោនៈ ដោយដកហូតពន្ធក្នុងតម្លៃ ៧០ ដុល្លារក្នុង ១ តោននៃកាបូនឌីអុកស៊ីត (ឧស្ម័នកាបូនិច) ការយកពន្ធលើកាបូននឹងជាមធ្យោបាយដ៏មានប្រសិទ្ធភាពបំផុតក្នុងការកាត់បន្ថយការបំភាយឧស្ម័នផ្ទះកញ្ចក់។ នេះបើយោងតាមរបាយការណ៍របស់មូលនិធិរូបិយវត្ថុអន្តរជាតិ (IMF) ដែលបានចេញផ្សាយកាលពីចុងសប្តាហ៍មុន។
ប៉ុន្តែសម្រាប់ពេលនេះ ពន្ធលើកាបូននៅតែគ្មានប្រជាប្រិយភាព ជាពិសេសនៅប្រទស បារាំង ជាទីដែលផែនការដំឡើងកាបូនពន្ធពី ៤៤,៦០ អឺរ៉ូ ដល់ ៥៥ អឺរ៉ូ (ឬ ៦១,៦០ដុល្លារ) នៅពេលថ្មីៗ បានបញ្ឆេះឲ្យមានចលនាតវ៉ាប្រឆាំងពីសំណាក់ក្រុមអាវកាក់ពណ៌លឿង។
រដ្ឋាភិបាលបារាំងបានបង្ខំចិត្តផ្អាកផែនការនេះ ដោយសារបះបោរកាន់តែខ្លាំង។
កិច្ចព្រមព្រៀងទីក្រុងប៉ារីស ដែលបានអនុម័តកាលពីឆ្នាំ ២០១៥ ដោយប្រទេសជាង ២០០ មានបំណងដាក់កម្រិតកំណើនរួមនៃសីតុណ្ហភាពពិភពលោកមកនៅកម្រិតត្រឹម ២ អង្សាសេ លើកម្រិតសម័យមុនឧស្សាហកម្ម។
លោកស្រី Christine Lagarde ប្រធានគ្រប់គ្រង IMF និងលោក Vitor Gaspar ប្រធានផ្នែកកិច្ចការសារពើពន្ធរបស់ IMF ឲ្យដឹងក្នុងការអធិប្បាយមួយនៅលើគេហទំព័ររួមមួយថា៖ «ទិសដៅកំណត់សីតុណ្ហភាព ២ អង្សាសេ នឹងតម្រូវឲ្យធ្វើឡើងដើម្បីកាត់បន្ថយការបំភាយឧស្ម័នប្រហែល ១ ភាគ ៣ ត្រឹមឆ្នាំ ២០៣០ ហើយតម្លៃកាបូនលើពិភពលោក មានប្រហែល ៧០ ដុល្លារក្នុង ១ តោន»។
មេដឹកនាំទាំង ២ បានថ្លែងថា៖ «មានការយល់ស្របកាន់តែច្រើនឡើងថា ការកំណត់តម្លៃកាបូន គឺជាឧបករណ៍ដ៏មានប្រសិទ្ធភាពបំផុតតែ ១ គត់ ដើម្បីកាត់បន្ថយការបញ្ចេញកាបូន»។
ការយកពន្ធនេះអាចឲ្យមានការកាត់បន្ថយក្នុងការប្រើប្រាស់ថាមពល ការងាកទៅរកថាមពលកាន់តែស្អាត និងកៀរគរហិរញ្ញប្បទានឯកជន។ នេះបើយោងតាម IMF ។
ពួកគេថ្លែងថា៖ «វាផ្ដល់ប្រាក់ចំណូលចាំបាច់ជាច្រើនផងដែរ។ ប្រទេសទាំងអស់អាចប្រើប្រាស់ប្រាក់ចំណូលនោះ ក្នុងការផ្ដល់ហិរញ្ញប្បទានដល់កំណើនសេដ្ឋកិច្ចរបស់ខ្លួនប្រកបដោយបរិយាប័ន្ន និងមាននិនរន្តរភាព »។
ក្នុងរបាយការណ៍នេះ IMF បានឲ្យដឹងថា ក្នុងប្រទេស ចិន ដែលជាប្រទេសបំភាយឧស្ម័នកាបូនច្រើនជាងគេរបស់ពិភពលោក និងឥណ្ឌា ឬអាហ្រ្វិកខាងត្បូង ជាប្រទេសដែលពឹងផ្អែកយ៉ាងខ្លាំងលើធ្យួងថ្ម ពន្ធលើកាបូនដែលមានត្រឹមតែ ៣៥ ដុល្លារក្នុងមួយតោននឹងកាត់បន្ថយការបំភាយឧស្ម័ន ៣០ ភាគរយ៕ AFP/LA
